Mateus 18

O ade-ade o nyawa yoholu yosiapongu manga dodiao

21 Ḋabolo de o Petrus wahino o Yesusno de lo wotemo, <<Jou, nakoso ai dodiao wopipiricaya moi o dorou waaka ngohika, de bilasu ngohi una towisiapongu sidago tosipara ma muruo. Nagala sidago ma para tumudingi?>>

22 De o Yesus wotemo, <<Hiwa! Upa ka ma para tumudingi. Ngaroko una o dorou waaka ngonaka wosipara de ma ratu-ratu, duma una gena ngona bilasu nowisiapongu. 23 Sababu o Gikimoi wisitero maro o ade-ade o kolano moi la wodupa awi gilalo manga nagi watailako. 24 Ma nonomaka o gilalo moi awi nagi o pipi gena idala icarawa*18:24 o pipi gena idala icarawa: eko <<o talenta cala mogiowo.>> O pipi o talenta manena ma dala o nyawa moi awi gaji o taungu mogiowo de motoha gena ifoloi. una magena wisirisima ma kolanoka. 25 Igogou waakuwa o nagi magena wafangu. So ma kolano gena wosipareta wotemo, <O gilalo magena wisiija ka ma moi de awi peḋeka, de awi ngopa, de lo awi arata ḋangodu la awi nagi isifangu.>

26 Kagena de o gilalo una magena womabukuku wosuba ma kolano awi simaka wibaja, <Ya tuangi, kodo! Noisisabari ngohi. Igogou ngohi asa ai nagi ḋangodu tafangu.> 27 So ma kolano awi galusiri asa ibaoka, wamalo o gilalo una magena wigalusiri sidago lo wipalako, de wotemo unaka, <Ani nagi gena ḋangodu ngohi tapikika.>

28 Ḋaboloka, de o gilalo magena wosupu de una imakamake de awi dodiao moi ka wogogilaloli, awi nagi unaka cawali o pipi o cala muruo naga.*18:28 o pipi o cala muruo naga: eko <o dinar ratu moi>. O pipi o dinar manena ma dala o nyawa moi awi gaji o ngoosa saange. De una awi dodiao gena witago de wigohore, de lo witemo, <Ce! Ani nagi ḋangodu bilasu nofangu!>

29 De awi dodiao gena to una awi simaka wobukuku, wibaja de wotemo, <Ya ai dodiao, kodo! Noisisabarisi. Igogou, ngohi asa ai nagi tafangu.> 30 Duma o gilalo una magena wisidoohawa. Sidago una awi dodiao asa wisingosa o buika, sidago done to una awi nagi ḋangodu lo wofangu.

31 Ma orasi o kia imaakaka gena o gilalo ma somoa yokelelo, de ona manga sininga isusa. De o gilalo awi manara maro komagena ona itagi isingangasu ma kolanoka. 32 So ma kolano woise, de una asa witoosa. So o nyawa wasulo itagi o gilalo ma dorou magena wiaso la una wahino de wisitemo unaka, <Gilalo ma dorou! Ngona ani nagi ḋangodu tapikika, sababu ngona noibajaka. 33 Asitagala! Igogou, ngona bilasu ani dodiao wogogilalo una magena nowigalusiri la imatero de ngohi tonigalusiri ngonaka.> 34 Ma kolano gena foloi wingamo. So o gilalo ma dorou gena iwisingosa o buika, sidago una wofangu awi nagi ḋangodu-ngodu. Sidago kagena.>> 35 O Yesus o ade-ade gena wosiboloka, de wotemo,<<So komagena lo Ai Baba o sorogaka asa waaka ngini moi-moika, ka cawali ngini lo nia dodiao niasiapongu igogou de itiai.>>