Mateus 20

O Yesus ipipilo yasinoto wasiloha

29 Ma orasi o Yesus de Awi muri-muri o Yerikho ma doku magena yodongosa so itagi, de o nyawa yadadala Una wimote. 30 O doku ma ngoguka de kagena o ngeko ma dateka o nyawa ipipilo yasinoto igogeku. De ona yogiise Una nogena wakahino, de yomatoore, <<Ya, Jou! O Daud awi ngopa de awi dano moiku, kodo! Nomigalusiri ngomi!>>

31 So o nyawa yadadala ona magena yangamo de itemo, <<He! Nimapopongo!>>

Duma ona lo ka foloisi imatotoore, <<Suba, Jou! O Daud awi ngopa de awi dano moiku, kodo! Nomigalusiri ngomi!>>

32 Kagena de Una womatogu de waaso wotemo, <<O kia niodupa Ngohi taaka nginika.>>

33 De ona magena yosango, <<Ya, Jou! Ngomi miodupa mimasigelelo.>>

34 Kagena de Una ona magena wagalusiri de manga lako wapaḋa. De o orasi magena ḋabolo ipipilo asa imasigeleloka, de ona lo Una iwimoteka.