Mateus 21

O Yesus o Yerusalemka wowosa de yadadala iwisihoromati

maro o kolano moi

1 Ma orasi o Yesus de Awi muri-muri o Yerusalem yadumuka so ona imasidiado o doku Betfage o Tala Zaitunka, kagena de o muri yasinoto wasulo itagi iḋoma. 2 De Una wotemo onaka, <<Nitagi o doku magenaka. La kagena o dokuka niwosa, de ngini asa niakelelo o keledai ma beḋeka moi yapilikuka de lo ma goho moi. Ngai sinoto magena ma bobiliku niasose de niaahono kanena. 3 Nakoso o nyawa nisano nginika, de nitemo onaka, <O Jou wodupa wapake bai!> Ḋabolo de ona magena jai-jai bato nisimaha la aku niaaho.>>

4 O bi moi-moi ḋangodu magena bilasu idadi de imaaka la isiganapuka, imatero maro o kia iḋomaka o Gikimoi Awi demo ma nabi Yesaya wosilefo ḋaboloka, ena gena,

5 <<Bilasu nasingangasu o Yerusalemka yangodu,

<Niwinano, nia kolano he womasidiado.

Una womahadoku de o keledai ma ngopaku wopane,

gena o keledai ma gohoku.> >>

6 Ḋabolo de Una Awi muri yasinoto magena itagi, de ona asa yaaka maro o kia Una wobeseso onaka. 7 So ona o keledai magena de ma ngopa yaahoka, de manga juba yahoi so isinaho o keledai ma duduku. Kagena de Una wodola so womatamiye ma ḋokuka. 8 So ona itagi ikahika o Yerusalemka. Una asa wogila-gila, de kogena o ngekoko o nyawa yadadala manga juba isinaho de ma binukali o gota ma daara de ma sosokaka, kiaka manga doroka yaḋeheka, so isihaja ma ngale Una iwisihoromati. 9 O bi nyawa yadadala iḋoḋoma de ma binukali itotuuru Una wimote-mote gena, yangodu imasagaga itemo,

<<Powigiliri Una o Daud awi ngopa de awi dano moiku!

Igogou! Una wahino de o Jou Awi ronga.

So tanu Una magenaka o Gikimoi Awi laha wisicatu.

Hino powigiliri o Gikimoi Wikukuruye!>>

10 Komagena imaaka sidago o Yesus womasidiado o Yerusalemka, de o kota ma nyawa yadadala foloi lo ikalala gena, ona imatekekasano itemo, <<Una magena naguuna.>> 11 De o nyawa wimomote gena yosango, <<Una o Yesus, o nabi moi o Nazaretno o Galilea ma tonaka.>>