1 Anxe oose tenne ha’no’a borreessannelchi cubbo hujinabaashshaten. Yaane kinni ayyinna cubbo hujeexxe kaddoole Aabi bira tukke anfe’eennen isinna qullichcha Yessuusi Kiristoositen. 2 Isinna cubbo no’oxxee gattowwaali afisaaken: tinninna butta duuchchixxe cubbo’ate malee’e no’oxxe callixxeetebaan. 3 Mageniinka ajajuwwa heqqe’nonnole isoo egeneennexxa tennenni kokeeffantannon. 4 Isoo ege’neenne hiyya’n seera isika muuxabaak kinni isi dharichchaken; dhugaatinna isi giddo hexxebaan. 5 Yaane kinni ayyinna hiyyichcho iska heqqedhoole dhugaaten Magenoke’n isi afeexxi jaalala wo’mate; iso’n he’nenneke kandenexxa egena’ennelchchi tennenniten. 6 Ayyinna iso’n hedhaanne hiyyaak Yessuuusi maremeemmashsha marema isoo hassissaan.

7 Anke jaaluwwa ha’no’a borreessannexxi sirende’ni afinemmake birenge ajaja malee’e haarokebaan; kunni birek ajaji laqqinemmake hiyyichchon. 8 Wele darreenni ha’no’a borreesa’ennek dukkana saxxaa’naa dhugaatik ifi ifa’ni hedheemmaxxee iso’ninna ha’no’ni dhugaate kadeeke haaroke ajajan. 9 Ifake’ni hedheenneni hiyyaak dayyo ifika kinni gibaaki ta’anna isi dukkanate’ni hedheen. 10 Dayyo ifika eeyyaak ifake’n hedhaan; iso’ninna manjo guggufahcchiisaachchi hedhebaan. 11 Yaane kinni dayyo ifika gibaak dukkanate’n hedheen; isi dukkanate’n mammaremaan; dukkanatinna afabaashsha assitemaxxee haba’a me’a’neexxa ege’nebaan.

12 Tee oose

cubbo ha’nooxxi Yessuusike summinni ha’no’a gattowwaal hiyyendemmaxxee

ha’no’a borreessannen.

13 Koo annuwwa

edi wodda hedhemmaka isoo egendineemmaxxee ha’no’a borreessannen;

Tee dargaggeeyye! Ookkone fuggichcha injifatinemmaxxee ha’no’a borreessanneni;

tee oose Mageno Aabi egendine’een ha’no’a borreessannen.

14 Oose!

Sirende’ni hedhemmaka isoo egendine’en

Ha’no’a borreessannen;

dargaggeeyye

Ha’no worboolete kaddineemmaxxenna

Mageniink hiyyichchi ha’no’ni hedheemmaxxee,

ookkone fuggichchanna injiffatineemmaxxee

ha’no’a borreessannen.

15 Butta duuchcha yookaan butta duuchcha’n hedheechcho heene yaanuwwanna eetinoqqee; ayyinna butta duuchcha eeyyole Magenniinxi jaalala isi giddo hexxebaan. 16 Buutotinna butta duuchcha’n hedheechchi maalinxe fuggoxxa gaabben, illetixxa kajeella, karrate’ni holla butta duuchchanaa’nite malee’e Mageni Aabinaa’nitebaan. 17 Butta duuchchanna gaabbe isexxi saxxaan; Mageniinxa fedhii assaak kinni duuchchi woddi’a hedhaan.

18 Tee oose! Tinni muuxaminxe yannan; «Laqineeshshann Kiristoosi’i gareerak dagaann» ta’a midde heddi Kiristoosi’i gareeraakiir dage’een; muuxaminxe yanna kaddeexxa egennaanelchinna tenne’niten. 19 Insa’ne no’o giddii’n fulleen; kaddo malee’e insa’ne woldonni no’oxxe gamommabaan; insa’ne no’oxxe gamo silaa kandeele no’onninni gantamman; yaane kinni insa’ne duuchching no’oxxe gamo kada gonpheexxa ege’nishshatee no’onaa’n gargar hinge. 20 Yaane kinni ha’no’o isixxe Woyyitte hariiriten harirendinemmaxxee duuchching dhugaa egendinaani. 21 Ani ha’no’a borreessaanelchi ha’no dhugaa ege’na gophphineexxetebaan; yaane kinni dhugaa egendineemmaxxenna dhugaatenaa’ni dhari afema gophphaammaxxeeten.

22 Kiristoositebaa hiyyeexxi Yessuusi waakkataak gadhi darre dharichchi aate? Kunni Mageno Aabinna Weldii’i waakkataak Kiristoosike waakkatallon. 23 Weldii waakkataak duuchchi Aabi midde afebaan; Weldii amanaak duuchchi Aabi’ni amanaan.

24 Siretenaa’ni laqqinemmaxxi ha’no giddo galdowwaal; siretenaa’n laqqinemmaxxi ha’no giddo hexxoole ha’nonna Weldininna Aabi’ni hexxinaan. 25 Tinninna isi no’o’a uwweexxi adde duuchchi woddixxe hedhon.

26 Ha’no dedhisa’neeke mannixxee tenne’e borreesse’ennen.

27 Ha’no kinni Kirstoosinaa’n adhdhitineexxi hariirte ha’noo giddo hexxemmaxxee ayyinna ha’noo barissiisa hasisaaban. Yaane kinni dhugaate malee’e dharik kaddebaaxxi isixxi hariirte yaane duuchchinxe ha’noo barissiisaaxxa, iittinna dhugaate malee dharik kaddebaaxxa, ha’nonna Woyyichchi Hafuur barssiisemmashanni Kiristoosi’ni hedhdhe.

28 Yoona tee oose! Isi leelaa wodda sodaantebo’nok shenummati isoo uundona’anna dagaaxxa barra isi edo shoonka bo’noshsha iso’ni hedhdhe. 29 Isi qullichchake kadeexxa egendinoole qullumma assaak duuchchi isonaa’ni ilemeexxa egendinaan.