1 Isira'eelik ardi Duuchchi Woddike Gootti edo fuggoxxa huje: Isinna Midiyaamike mannixxe anga'n insa'ne sa'isse uwwe: insa'nena torbaane wogga duuchcha moone galchine: 2 Midiyaamitotixxi hunna Isira'eelke manna'n itti jabaatta'n me'ite: insa'neexxe buuton Isira'eelik manni sho'omaa booncho wolo'onna kollo giissedhe. 3 Isira'eelik ardi sanne facaansaa wodda Midiyaamito, Amaaleeqitonna middik manni daga'n lola ke'isaamman. 4 Insa'nenna ookkone boga'ni ofoleexxi Gaazake bogi giddo hexxeexxa midha balleesine birraamman: gedhebiinka, horiinkanna heddo harre oonfe insa'nenaa'ni adhdhinaammaxxe'e Isira'eelik manni'a mitteechchonna gatinsaammabaan. 5 Insa'ne ifika horenna ifika duunkaanuwwa adhdhineexxi dangaa wodda koro'miisiinke haagana fakkaantaamman: insa'nenna gaaluwwa laakkoonne dhaqqanbabaa qico'ni heddokeman. Insa'nenna dange boga dibbeessinaamman. 6 Tennexxe Isira'eelik ardi Midiyaamike mannixxe buutonni rakko insa'ne gelte: insa'ne gargaaro'a Duuchchi Woddike Goottibaa raarre.

7 Isira'eel ardi Duuchchi Woddik Gootti Midiyaamike mannixxe anganaa'n gargaaraashsha raarre wodda, 8 Duuchchi Woddik Gootti Isira'eelike ardibaa mitte wabeeko erge: iikki wabeekinna Dada Duuchchike Gootta Isira'eelik Magenibaa'ni aadhe dageexxi erga konneechchin butti'a hexxeen, «Ani garbumma hexxineemmake Gibtseke boganaa'n ha'noo fulcheennen: 9 Gibtseke ardanaa'ninna konne boga'n ha'no rakkisammake arda duuchchanaa'n ha'noo wodennen. Ani ha'noo edi'ni insa'nee shorre'e fulche'e boga insa'neekanna ha'no'aa uwwennen. 10 Ani Duuchchi Woddik Gootti ha'nooke Mageno kadennexxanna ta'a boga insa'neeka dhaaldinemmak Amooritotika dharichcha magenuwwa magenoonfatinabaashsha ha'no'n kuleennan: ha'no kinni anxa laqqinebaan.»

11 Ookkoneechchi uduma Duuchchi Woddike Goottik erganji «Ofira» hiyyemaake loolibaa dageexxi Abi'eezerixxe sannenaa'n ilemeeka Iyyo'asike fichchi giddo hedheeke haqichchi hunda ofo'le Iyyo'aasik belti Gedewoon Midiyaamito isoo uudabaashsha sho'omeexxi woyine miincamake booncho'n dinne uxxaamman. 12 Eettene oddo'n Duuchchi Woddike Goottik erganji iso'ni leellexxi «Ati jabakinna hunnaameessi manji! Duuchchi Woddik Gootti atinni welti hedheen.»

13 Gedewooninna hiyyeeqici; «Anke gootta! Eega Duuchchi Woddik Gootti no'onni welti hedheexxinni tinni rakko duuchcha hitta kadde no'o'ni dagge geltee? Annuwwi no'oki no'o'ni kulemmashshan Duuchchi Woddik Gootti hujammaxxi mambe'iinxi yaane duuchcha telcho haba hexxee? Gibtsee'n hitta fulcheexxa no'o'ni kulleemman. Yaane kinni Duuchchi Woddik Gootti no'oo waalee insa'ne eeneeshsha no'oo assinaashsha Midiyaamitotee sa'isse uwwe'en.»

14 Ookkoneechchi uduma Dada duuchchik Gootti isibaa wirri hiyyeexxi, «Kexxe me'i tenne affettexxe jabaxxe hunnani Isira'eelika arda Midiyaamitotixxe anganaa'n leexxa fulchitottaa ergaannek antebaa? Hiyye.»

15 Gedewooninna, «Hitta asseeta ani Isira'eel'i woda dande'anno? Gosa anxinna Minaaseke mini hadinaa'n hara goofaken: aninna mini hadi giddii'n hara shiixxoken» hiyye.

16 Dada duuchchik Goottinna «Ani atee gargaarannaxxee tennee assa dandeettatton: Midiyaamika ardanna mitti manjisha assite rubbatton.»

17 Gedewooninna hiyye hiisee qic, «Ati edo gaachchanna afoonnole ati dhugaandiin Dada Duuchchike Gootta kaddeettexxa kokachchiisaaka beessisa ani'a uwwi. 18 Hige tolcha shiqishe ati edo qophpheessannoxxe'e maganneten me'itoxxe.»

Duuchchi Woddik Goottinna, «Ati higge daggattoxxe turannon» hiyye.

19 Gedewooninna ifike minibaa e'yeexxi re'etika buruusa duule; isinna tomme kiilo geltaaxxa bulle aadheexxi lebele e'yeebaaka quncisa ra'isse: maalakanna qorete'n, la'akanna meshete'n uggeexxi qilxi hunda ofoleeke iimike erganji'a aadhe shiqishe. 20 Iimatik erganji «Maalakanna quncisa rassa tenne'n uggite hana la'a duni.» Hiyye ajaje. Gedewooninna ajajemeeshshan asse. 21 Duuchchi Woddike Goottik erganji biri'a shikki hiyyeexxi abixxeexxe siqoxxe qaccen maalakanna quncisa tuqe: giiratinna rassatenaa'n kexxe quncisakanna maala itte: ookkoneechchi uduma Duuchchi Woddike Goottik iimatik erganji sho'ome.

22 Gedewooninna uudeek dada duuchchike Duuchchi Woddike Goottike erganjo kadeexxa afeexxi «Dada duuchchike Duuchchi Woddike Goottaa! Atixxi ergana ani edo uurite'na uudennen ani'a aanne'e!»

23 Duuchchi Woddik Gootti kinni «Nage'i ati'a kadowwaal: mee co'o sodaattoxxen: rertabexxon.» 24 Gedewooninna ookko tolchimalcho giissexxi, «Duuchchi Woddik Gootti nage'iinke Duuchchi Woddike Goottan» Hiyye summa fulche: (kunni tolchimalchi telchi qico'ni Abi'eezerixe sanneke bogi giddo Ofira uurre hedheen.)

25 Eettene hashsha Duuchchi Woddik Gootti Gedewooni'i hiyyee qici: «Atike annixxe moona giddo torbaan wogga geyeeka jibichchanna ittann wele kanna aadhi: anni atiki Ba'aali hinaaxxe fakkuwwaa hujeeka tolchimalcho diigi: isi bira hedheeka ‹asheera› hine ye'na'neeka meyyaxxike magenuwixxa fakkuwwa enqite butuchchite huni: 26 Eettene oletixxe kooba iima Duuchchi Woddika Gootta atike Mageni'a eloshsha giissineeka tolchimalcho huji. Ookkoneechchi uduma langaka jibichcha aadhi: enqite butuchchite hundettexxa Asheeraxxa fakkuwwaxxa bille ha'ishshe jibichcha ookkone ciincatike tolcha assite shiqish.» 27 Gedewooninna erganijuwwi giddii'n tomme aadheexxi Duuchchi Woddik Gootti ajajemmashshan asse: mini hado isikanna qachchuwi giddo hedha'neeka manna sodaateexxi tennee yaane asseek barruunte kaddebaangi hashshatemman.

28 Gorsa qachchi giddik manni soodimaro ke'na wodda Ba'aali'a hujemeek tolchimalchi diigemeexxanna Asheeraxxi fakkuwwa xeerende bille fuldeexa uunde: okko'ni hujemeeke tolchimalcho'n langaka jibichcha gorraane ciincatike tochi'a shiqinsheexxa uunde. 29 Weli'aan weli «Tenne'e asseek ayyete?» Hineexxi lanqe: adda memmekinseechi uduma tenne'e asseek Iyyo'aasik belto Gedewoonite kadeexxa dhaqqanbe:

30 Ookkoneechchi uduma Iyyo'aasii'i «Ba'aalika tolchimalcho diigeexxenna bira hedheeka Asheeraxxa fukkuwwa enqe butichcheemmaxxe atike belto kadeemaxxe'e reyo isi'a hasisaamaxxe'e no'aa fulchi isoo hine.»

31 Iyyo'aasi kinni mufet iso'n ke'emake duuchcha'n hiyyee qici; «Ha'no Ba'aali'a baassitina'neemo? Yookaan anjirtino'aatee? Isi'a baassaak duuchchi soodo hosoqqe isoon shinnowwaal: yoona Ba'aali dhugaandinn magenoke kadoole ookkone tolchimalcho isinaa'ni diiga wodda ifinaa'ni silaati lolee hoyyedhamman.» 32 Tennexxee insa'ne, «Isi Diige'eek Ba'aalike tolchimalcho kadeemmaxxee dande'a'noole Ba'aali umo ifingeninni ifi iimi'n lole hoyyedhowwaal» hina'n eettene barra Gede'woonii'i Yiruba'aali hiyye summa fulche.

33 Ookoneechchi uduma Midiyaamito, Amaaleeqitonna middik manni mitteba bukki hiyyeexxi Yordaanoosika galaana foofe; Iyyizira'eelixxe wolo'o'n qecence. 34 Duuchchi Woddike Goottik hafuuri Gedewooni'n dirre; isina malagata ufuufe: Abi'eezerike mannixx sanne duuchcha isoo hordoffaashsha ye'e. 35 Minaasek mini hadi duuchchi manjo ergeexxi isoo hordofaashsha ye'ise; iittan Aseeri'a, Zabilon'anna Nefitaalemik mini hadi'a manjo erge; insa'nenna weli mannin welti duulo fulle.

36 Konneechchi uduma Gedewooni Mageno hiyyee qici, «Haasottetteshshan Isira'eelii'i anxe anga'n gargaartotta'a hassoottole 37 Dinne uxxinammaxxe aldumme'n gola'leeka gedhebiinxa orda uggannon; soodo gorsa weli bogi duuchchi bagee'na konne gola'leeke gedhebiinxe orda'n fixeenso'ole, haasottetteshshan Isira'eelii'i anjirona'a ane'e fildettexxa tenneni kokeessannon.» 38 Isi hiyyeeshshan isi'a kadde; Gedewooni gorsa soodimaro ke'e wodda golalooxxa orda gedhechchixxa miicaa wodda mitte qore wo'meeki wodi'i giddii'n fule. 39 Ookkoneechchi uduma Gedewoon Mageno, «Ballo ane'n mufattoxxe'e; mitte qortuma atee qoro; golalooxxe orda'n wele yaane hunjona'a amo seera ani'a uwwi; eettene yanna'n golalooxxi orda bagge'na qarqarake'n hedheek bogi duuchchi lashshi hiyyaashsha ani'a assi» hiyye. 40 Eettene hashsha Mageni ookkoneen beessisa asse; bogi duuchchi fixeesik lashshi hiyya wodda, golalooxxi orda kinni bagonxemman.