1 Ookkone baro'ni Isira'eel giddo moyanji hedhemabaan; Daanike mini mini hadi Isira'eelike mini mini hadixxe oddo'ni ifike hinaaka bogika qadaada afaa gonpheemmaxxe'e marre ofollaaka ifike hinaaka boga harsinaaman. 2 Tennexxee Daanito ookkone boga dooyinaashshanna qo'nisaashsha onde jabaka manna Tsoori'anna Eshita'oolike qachchuwwibaa ookko'a ergine; kunniirinna ifi ifika mini hado tukkeesakeeramman. Insa'ne ergeek manninna hiyyee qici, «Me'ee, ookkone boganna dooyye» hine.

Insa'nenna ookkone tulcha Efireemike bogiba Miikake miniba dangeexxi ookko'o galle. 3 Insa'nenna Miikake mini bira genneeshshanni dargaagrrsa Leewwixxa qonqo foone egenne; tennexxe ookko'o gorreexxi, «Ayyete atee'e kabaa aadhdhe dageeki? Kaba maa hujjaate? Kabaa daggeetek mayeetee?» Hine qorre.

4 Isinna, «Miikaa tennee yaane ani'a asse'e huje abidiseene; aninna qeese kadennen» insa'ne'aa hiyye.

5 Ookkoneechchi uduma insa'nenna, «Ori no'ok qajeeleexxa qajeelaa gopheexxa egenannoshsha ballo Mageno no'aa laqi» hine.

6 Qeesichchikinna, «Me'itinna'neeka ora Duuchchi Woddik Gootti ha'no'aa qajeelcheemmaxxe'e ha'no nage'ik me'ee» insa'ne'aa hiyye.

7 Tennexxee iikki ondi manni ookkoo'n ke'eexxi Layyishi dange; Siidoonito mitte soda'a belo nage'ik hedhammashshanni ookko'o hedhaamak manni ti'ni hiyye hedha'neexxa uunde. Iikki bogi duuchchiinxa yaane afeemmaxxe'e iikki ardi dureesakemman. Iittanni insa'nenna Sidoonake mannanaa'ni bayyante'e manjo duuchchanaa'ni gargar hingee qoffinni he'naaman. 8 Insa'nenna ifike dayyuwwa Tsoori'anna Eshita'ooli'aa hingee, insa'nek dayyuwwinna, «Martineexxi yaane hitta kaddee?» Hine qorre. 9 Iikki erga me'eemmaki manninna insa'nee hinee qici, «Iikki bogi yo'oshsha eloke kadeexxa uundeennen; yoonna ke'wee! Marrenexxi insa'nee'e lollo; ke'we malee'e sammi hitinaa? Ha'noonna martineexxi ookkone boga abidatee hoodinnoqqe'e, 10 ha'noonna ookko'o geltinaa wodda nage'ik hedha'neek ardi, Mageni anga ha'nooxxe'ni sa'isse uwwaaka mitte yaanenna xe'itebaaka ba'laka boga ha'no'aa isi uwwe'een.»

11 Ookkoneechchi uduma Daanixxe gosanaa'ni lolakee qophpheefateeka jaane dhibba manna Tsoori'anna Eshita'oolii'ni ke'neexxi me'ine. 12 Insa'nenna ookko'ni fulleexxi Yihudake bogi giddo Qiriyaatiyi'aarimi qecence. Yoonna Qiriyatiyi'aarimii'n boroti darree'ne hedheek boonchchi telchi qico'ni Daanike olla'a hiyyemmeek tennenaa'ni kexxeexxen. 13 Insa'nenna ookko'ni ke'neexxi tullichiinke Efireemike bogibaa me'ine Miikake minibaa dange.

14 Ookkoneechchi uduma Layyishika boga dooyeemmak iikki ondi manni dayyuwwa ifikee'e, «Konne minuwwi giddii'ni mitteke'ni Efuudi, Teraafem, bonceexxi fakkenna baqinse giisinexi misile hexxeexxa ha'no egendine'ee? Yoonna ha'no maa assa hasisaaxxa ege'ne» hiyye. 15 Tennexxe iikki dargaggeesi Leewwichchi hedhamake Miikake miniba gorreexxi nage'a isi'a shiqinshe. 16 Lolake qophpheefante dageemak jaani dhibbi Daanik manni eetene dalla'iinxe hula bira uureemman. 17 Iikki qeesichchi lolake qophpheefateeke jaane dhibba manninni welti eetten dalla'iinxe hula'ni uure'naa, ookkone boga dooyate'e dageemmak ondi manni Miikake mini giddo e'yeexxi bonceexxa fakkenna Efudii'i, Teraafemuuninna baqinse giisineexxa fakke adhdhine.

18 Kunni manninna Miikake miniba e'yeexxi bonceexxa fakkenna Efuudii, Teraafemuuninna baqinse giisineexxa fakke adhdhinee wodda iikki qeesichchi, «Maa assitina'nesi?» Insa'nee hiyye.

19 Inisa'nenna, «Sammi hiyyi! Ittanna bucuqqi hitoxxee! Ati no'onni welti dagge'e annakenna qeesete no'aa kadi. Ati'aa mitte minike qeesichcho kada mannii'ni Isira'eel giddo mitte minikenna gosatike qeesichcho kadde ergatendetele woyyabaa?» isoo hine. 20 Ookkoneechchi uduma iikki qeesichchi yo'oshsha gammade, isinna Efuudii'i, Teraafemuuninna bonceeexxa fakke aadhdheexxi ardik welti me'e.

21 Insa'nenna oose insa'nexxa, hore insa'nekika haagananna horanteechcho duuchcha edi'a sa'issineexxi udumi'a hinge me'ine. 22 Insa'nenna Miikake minibaa'ni shiixxo qico bayyante me'ineeshshanni, Miikaki olla'uwwi gargaarsake'e ye'emme bukki hine; insa'nenna Daanika mannanna hordonfeexxi dhaqqanbe. 23 Insa'nenna udumii'ni he'ne insa'ne'ni raarra'na, Daanik manni udumi'a higeexxi Miikaa'a, «Maa kaddeettee? Konnee manna duuchcha bukki assiteetteki mayeetee?» Hine qorre.

24 Miikanna hiisexxi, «Hitta, ‹Maa kaddette› hitine ha'noo anee qortina'ne? Ani giisedheenka anka magenuwwanna qeesichcho anka aaxxine me'itine'een; wele yaane ani'aa maachcho gatee?» Hine.

25 Iikki Daanik manni hiisexxi, «Aareeti hedheek manni rakko ate'ni geesisee'na atixxanna atike mini hadixxa lubbo gophphaboxxoshsha no'oxxe oddo'ni bucuqqi hitoxxee» hine. 26 Tennexxe Daanki manni tenne hiyyeexxi ora insa'neka ke'ne me'ine; Miikanna insa'nee dande'abaaxxa uudexxi ifike minbaa me'e.

27 Ookkoneechchi uduma Miika giisexxa fakkuwwanna ookkone qeesichcho aa'nexxi Layyishi me'ineexxi, nage'ikinna mitte soda'a belo hedhaamaka arda wolaantichchik shinne; ookkone qachchanna gunbe. 28 Insa'nenna he'naamak Sidoona'n yo'oshsha bayyateemmaxxenna insa'nenna ayyininna mittooma afa gonpheemmaxxe'e he'nammaxxe'enna weli mannin afema gophphammaxxe'e insa'ne'e injifataak mittikinna hedhemmabaan; iikki qachchinna afema'neek Beetirehobi biramman. 29 Insa'nenna ookkone qachchanna Isira'eel darree'ni ilemeeke insa'neke anna Daanke summinni Daani hine ye'ne, ookkone qachchik summi qara Layyishitemman. 30 Ookkonna Daanik manni ifi'aan magenoonfaaxxa fakkuwwa uurinse; Muusek belti, Gershoomik belti Yoonataaninna isixxi oose ookkone boga booji'endeexxa yanna qico'ni Daanke mini hadi'a qeesetemman. 31 Tennexxe Miika giisexxa fakkuwwa, Mageniik mini Seelo hedhema wodda duuchcha kuta belo magenoonfate.