1 Ookkone wodda Kenaanike bogi giddo hedhemake lola'ni leenjo adhdhebang gateek Isira'eelk gosa gosaka arda hega uudate'e Duuchchi Woddik Gootti ookkone boga'ni waalke ardi konneechinn butti'a hedheeken. 2 Isinna tenne'e asseechchi edo loliinxa leenjo afebaaxxi Isira'eelixxi horte hitta loldaa qico barachchiisatee calla hiyyeeten. 3 Bogake'n gatemmar ondi Filisixeemik ardik sooressuwwi, Kenaanito, Sidoonitonna Ba'aalihereemmixxe koobabaa'ni Hamati qico'n Libaanoosixxe koobuwa'n hedha'neer Hiititemman. 4 Insa'nena Duuchchi Woddik Gootti Muuse darre'n edike annuwwi'a uwwemmaka ajajuwwa Isira'eelka arda ulfeessinaaxxanna ulfeessinabaaxxa afatee Isira'eeli'a hega uudatemman. 5 Konne qicinn Isira'eelik ardi Kenaanito, Hiitito, Amoorito, Feeriizito, Hiiwaatonna Iyyaabusiton mitteba hedhate'n kexxe. 6 Isira'eelinna Dubarra insa'neeka aaxxe: ifika dubarranna insa'neexxe labbaxxe oose'a aadhinse; magenuwwa insa'nekana magenoonffante.

7 Isira'eelik ardi Duuchchi Woddik Gootti edo elobaaxxa yaane huje; Duuchchi Woddika Gootta ifika Magenonna waalleexxi Ba'aaliinna Asheeraa'a magenooffante: 8 Tennenaa'n kexxeexxa Duuchchi Woddik Goottixxi mufe Isira'eelik arda'n ibbe: Mesiphexoomika moyanjo Kuushaanii'i Feeshe'atayimixxe anga'n sa'isse uwwe: insa'nenna Kushaani Riishe'atayini'a saddeeta wogga garbumma galle. 9 Ookkoneechchi uduma Isira'eeli Duuchchi Woddike Goottibaa raarte; Duuchchi Woddik Goottinna insa'ne'e anjiraaka Kaalebika maa'nichcho Qeneezika belto Otini'eeli'i ke'isse. 10 Duuchchi Woddik Goottik hafuur iso'ni dirre: isinna Isira'eeli'n sooreessa kade; isinna lolakee fulee wodda Duuchchi Woddik Gootti Mesiphexoommiyaka moyanjo Kuushaani Feeshe'atayimi isixxe anga'ni sa'ise uwwe: isinna Kushaani Riishi'atayimi'i injifate. 11 Bogake'n shoole tomme woga'a nage'i kade tureechi uduma Qeneezik belti Otini'eeli reye.

12 Isira'eelik ardi higgeenni Duuchchi Woddike Gootti edo elobaaxxa yaane hujje; insa'nenna tennee assineemmaxxe Duuchchi Woddik Gootti Mo'aabika moyanjo Egilooni Isira'eeli caala jabaataashsha asse. 13 Egilooninina Amoonitotanna Amaaleeqito malcheexxi Isira'eel'i lole: temirk haqichi xuphphi hiyyeeka Iyarkoka qachcha anga ibirse'ne. 14 Isira'eelik ardi tommenna saddeeta wogga Mo'aabika moyanjo Egilooni hunda garbumma gale.

15 Higgen Isira'eelik ardi Duuchchi Woddike Goottibaa raare: Duuchchik Woddik Goottinna Binyaamito Geeraka belto bitaattichcha Naa'oodi'i leexa fulchaashsha ke'isse. Isira'eelik ardi Eehuudi'ni irbo uuneexxi Mo'aabika moyanjo Egiloonibaa ergine. 16 Eehuudi hojja onde tomme saanti meetire geyaak lamiin gama'n qara afeeka wolantcha ifi'a hujise middi darrexxe luqqe'n seemma giddo ka'le: 17 Irbotanna furdake Mo'aabike moyanjo Egilooni'aa adhdhe mare: 18 Ehudi irbo moyanjoke'e shiqisheechchi uduma irbo abixxeemmaka manna hadi'aan hinge me'inaashsha asse: 19 Ehudi kinn umi isinginni Geligeeli bira xabbine kaanseeke adibaaretike kinjuwwiba'a wirri hiyye ture: Egilonba'a higeexxi «Moyanjo ifike yaadinni ate'ni sho'e kulaannexxe yaane hexxeen.» Isinna «Sammi hiyyi.»

Tennexxe moyanjinna «Amme mee mittele gadho turre!» Hiyye insa'nena madadingi gadhi'a fule.

20 Eettene yanna'n moyanji xellephphoote'ni hedheeke qiidaxxa kuta'n qofit hedhe'na, Eeuhudi isibaa shiqeexxi «Magenibaa'n ati'a kulemeeke dhaansa afeennen.» Moyanjinna qophphi hiyye uure. 21 Eehuudinna wolaantichcha middixe luqqenaa'n bita'ixxe angan luqqisexxi moyanjiinka godoba ote: 22 Gonofi midde gatebaang wolaantichchi hedheeshshann godobake'ni danqareme duddurokenaa'ni xalli hiyye fule: mooro'i wolaantichcha buqe: Ehudinna wolaantichcha moyanjiinke godobanaa'n gosha gopheemmaxxe'e madhuma lo'o hite. 23 Ookkonneechi uduma Eehuudi gadhi'a fule: cufanakanna iso'n danqare. 24 Ehudi me'echi uduma moyanjuwiink erganjuwwi cufani danqaremee qico marre uunde: yaane kinni moyanji fooli'ake'n tureechcho insa'ne'n labbe: 25 Yo'oshsha gadhonni turre: yaane kinn cufan banema hine uunde gonpheexxi danqarsanjo aa'ne cufana banne: ookko gootti insa'nek reyee ba'linnange'n wabbi hiyye fanxaraaree'naa uunde.

26 Insa'ne ookkoon uurrine heqqe'na'na Eehuudi qeeredhe me'emman: xabbine kaanseek adibaaretika kino sa'e Seeritayimi'a baaje: 27 Ookko'o koobatike Eefireemike boga'n geyeeshshann Efireemike kooba callike boga'n malagata ufuufe: Isira'eelik ardinna isixxe akeetenni duuka hordonfe dirrine. 28 Isinna insa'nee hiyyee qici, «Ane'e hordoffe! Duuchchi Woddik Gootti naapha ha'nooka Mo'aabito anga ha'nooxxe'n sa'isse uwwaan.» Tennexxe insa'ne Ehudi'i hordonfe dirrine; Ookkoneechchi uduma Mo'aabito Yordaanoosii'i foofammaka galaana abixxati ookkone ora mitti manji midde sa'aabaashsha kunte. 29 Eettene barra'n calla tomme kuma geyaaka filemeeka Mo'aabitotika sannachchuwwa shinne: insa'ne giddi'n mittikinna baqate fuleek hedhebaan. 30 Eettene barra Isira'eeli Mo'aabito lolde injifatte: bogakeenna saddeeta tomme wogga duuchcha nage'i kade.

31 Ookkoneechchi uduma hedhemmaki sooreessi Anaatike belto Shaamigaaritemman. Isinna jaane dhibba Filisixeemika manna sangooletike gaafinn shiye Isira'eelika arda wode.