1 Iyyaasu reyeechchi uduma Isira'eeliki ardi, «Kenaanito lola ke'issatee gosa no'oxxi giddii'n ayyete sirete'n duulaak?» Hine Duuchchi Woddika Gootta lanqe.

2 Duuchchi Woddik Goottinna, «Yihudaxxi gosa edisse duuldowwaal: ani boga ookkonee insa'ne'a gicannon.»

3 Yihudake gosati minik manni dayyuwwa insa'neka Simoonixxe gosaka manna «No'aa qoqqoondeke bogibaa Kenaanitote'n duulokee amme no'onni welti me'ino no'onna ha'no'aa qoqqoode bogibaa welti me'inannon insa'nee hine.» Simoonixxe gosaki manni insa'neexxa duuka me'e. 4 Ookkoneechchi uduma Yihudak manni welti duule. Duuchchi Woddik Goottinna Kenaanitotixxe Feeriizitotixxe anga insa'nee sa'isse uwwe: insa'nenna Beezeqike manni giddii'n tomme kuma duulii manna shinne. 5 Eettene bakka'ni Adoonibeezeeqinni Beezeqike boga'ni futti hineexxi isinni welti lola inbe: Kenaanitotinna Feeriizito insa'nee injifante. 6 Adoonibeezeeqinna ookko'ni baaje, insa'ne kinni isoo gussine abinde uduma angatikanna lekkatika abuguddo wonxe. 7 Ookkoneechchi uduma Adoonibeezeeqinna: «Angatikanna lekkatika abugudduwwa wonxeemmaki torbaan tomme moyanjuwwa qore anxi hundii'n ibbammaxxa hanba qoce'na'ni inda'nemman: aninna insa'ne'n hujennexxa fuggoxxa huje Mageni anibaa hiisseen.» Insa'nenna isoo'o Iyyerusaalemi'a aa'ne dange isinna ookkoo reye.

8 Yihudak manni Iyyerusaalemika boga lolle anga ibilse'ne: ardakanna wolaantichchiki birre: qachchakanna giirati gunbe. 9 Ookkoneechchi uduma Yihudak manni koobatike boga'ni; Negeebi'ninna gammoojjichcha boga'n hedha'neeka Kenaanito lolatee duulle. 10 Yihudak manni Keebroon he'na'neeke Kenaanitote'n duulle: Kebiroon konneechchi edo Qiriyati'arbaaqi hiyyendaamman: insa'nenna Sesinii'i, Ahimaaniinna Talimayii'i lolle injifante.

11 Ookkoo'ninna Yihudaki manni Dabeerike boga'n bukki hiyye hedhee manna'n duule: eettene yanna'n qachchi «Qiriyatisefeeri» hiyyeme ye'emaamman. 12 Kaalebinna «Edise Qiriyatisefeerii'i abidaa manji'a meyyaxxa belto anxa Akisaa'a heerunsiisannoni» hiyye. 13 Kaalebik maa'nichchi dayyi Qeneezik belti Otini'eeli ookkone qachcha edise abixxe: tennexxee Kaaleb meyyaxxa belto ifixxa Akisaa'a heerunsiise.

14 Isenna Gotoniyaliba'a daggee wodda, anni iseki huccitaaka fichcha ise'a uwwaashsha kadhatto'a jabeessite kulde* Kaalebinna ise harrichchotenaa'ni dirriteeshanni, «Maachcho uwwonnaa hassaatte» hiyye ise'e laqe. 15 Isenna «Ani'a uuteteki fichchi gammojjete kademmaxxee wodi'iinxi muumme hexxee gama'n ani'a uwwe» hite: Kaalebinna ale aadinga baleessuwwa ise'a uwwe.

16 Muuseek balli Qenaanitotixxi gosa Yihudake ardinni welti kande meexxetiki haqichchi wo'meemmake qachchanaa'n ke'neexxi; Yihudiinke boga'n Aaraadii'n bita'i darre'n hedheeke gammoojjichchi bogibaa me'ine: ookko marreeba Amaaleeqitotixxe oddo'n ofolle. 17 Yihudake bogiki ardi Simoonike ardinni mitteba duuleexxi Tsaafaati hiyyemaake qachchi giddo he'naammaka Kenaanito injifante; ookkone qachcha balleesineechchi uduma «Horima» hinee isi'a summa fulchchine: 18 Yihudaxxi gosa Gaazaa Asiqeloonaa, Aqarooninna olla'a insa'neeka duuchcha abidde. 19 Duuchchi Woddik Gootti Yihudake bogike ardinni welti hedhemmaxxee tarbati boga lolle injifanteexxi abixxine: yaane kinni dhooqatike boga'n hedhemma manni sibiljiki hunjeexxa fadhadiinxa gaarre anfeemmaxxee bogakenaa'n shorra dandeennebaan. 20 Muuse haaso'emmashshan Kebirooni Kaalebi'a uune: isinna sase Enaaqixxa gosa ookkoo'n shorre. 21 Biiniyaamixxi gosa kinni Iyyerusaalemike bogi giddo he'naammaka Iyyaabusika manna ookko'ni shorrineemmabaan. Eettene yannanaa'ni telchi qico'n Iyyaabusiki manni Biiniyaamike ardinni welti telchi qico'ni mitteba firoomme hedhate'n hinge.

22 Yooseefixxi gosa Beetelike boga'ni duuldee wodda Duuchchi Woddik Goottinna insa'nenni hedhemman: 23 Yooseefixxi oose Beetelika boga dooyyaaka manna ergine. Ookkone qachchiki summinna qara Looza temman. 24 Dooyya fuleek manninna qachchi giddii'n fula'neeka mitte majo afeexxi «Konne qachchibaa hitta assinee e'yinanno qico no'o'ni kuldettele mitte yaane sila ati'a assinannan.» 25 Isinna qachchiinxa hula insa'ne'a leellishe: insa'nenna qachchi giddo hedheeka arda wolaantichchiki gorraane birre: ookkonee manjonna gamo isixxa duuchcha ittan tola waalle. 26 Iikki manjichchinna tureexxi Hiititotike bogibaa mareexxi qachcha ijaare «Looza» hiyye summa fulcheen: telchi qico'n summi ookkoneninni ye'emaan.

27 Minaasexxi gosa Beetisaani'n, Ta'inaaki'n, Doori'ni, Yibile'aami'n, Megido'ninna qarqarake'n hedhemmaka manna shorra gophpheemmaxxee Kenaanitotinna galduma insa'neeka ookko assedhatee murte. 28 Isira'eeliki manni jabaata'n dagee wodda Kenaanito hunnatixxa huje insa'ne'a hujaashsha hunnati ajajaamman: kaddo malee manna duuchcha fulchineemmabaan.✝

29 Efireemixxi gosana Geezerike boga'n hedhemmaka Kenaanito shorrineemmabaan: tennexxee Kanaaniki manni ookkon insa'neni welti hedhate'ni ke'ne.✝

30 Zabilonixxi gosa Qitirooni'ninna Benaahilali'n hedhemmaka manna shorrinemmabaan: tennexxee Kenaanito ookkoon insa'nenni weltti mitte afo'o kande hedhate'n ke'ne. Kaddo malee Zabilonike manni'a hunnatixxa huje hunjaashsha insa'ne hunnantaamman.

31 Aseerixxi gosa Akoo, Sidoonaa, Ahilaabi, Akizibi, Hileeba, Afeeqinna Rehoobi loola'n hedhemmaka manna shorrineemmabaan. 32 Tenne daafenni Aseerik manni insa'neeke bogi giddo hedhemmake Kenaanitoti welti mitteba firoomme hedhate'n ke'ne.

33 Nefitaalemixxe gosat manni Beetishemeshekenna Beeti'anatike bogi giddo hedhammaka manna shorrineemmabaan: tennexxee Neftaalemiki manni Kenaanitoti welti mitteba hedhate'n ke'ne. Kaddo malee insa'nenna Kanaanika manna hunnatixxa huje hujinsaamman.

34 Amoorik manni Daanixxe gosaka manna koobatike bogiba ookko he'naashshate malee'e diidiinke bogibaa me'inaashsha hasebaan. 35 Amoorik manni Hereesike, Ayyalooni Sha'alibiimixxe koobabaa'n hedhate'n ke'ne: yaane kinni Yooseefixxi oose (Eefireemixxanna Minaasexxa gosa) insa'neeke garba assine hunnatixxa huje hunjaashsha assinaamman. 36 Amoorike mannixxi gabalanna Adoomike mannixe gabalanaa'n Sela'ii'ni bita'i darree'n Aqirabiimixxe weldeenna qico'nitemman.