1 Iyyaasu Isira'eelixxe gosaka arda duuchcha ye'e Sekemi bukki asse. Geedhuwwa, akeekisanjuwwa, hayyichuwwanna ja'laabuwwa Isira'eelika duuchcha ye'e'na insa'nena Mageni edo bukki hine.

2 Iyyaasu arda duuchcha'n hiyye haaso'e qici, «Duuchchi Woddik Gootti Isira'eeliki Magen haso'a'n: ‹Qeerraake bari edi darre annuwwi ediki ha'nooki Efiraxiisike galaani wido dharichcha magenuwwa magenoonfanta'ne he'naamman. Konne annuwwi giddii'n mitti Abirihaamikenna Naakkoorike anna Taaratemman. 3 Yaane kinni anna ha'nooka Abirihaamii'i Efiraxiissike galaan widi darre'n hedheeke boganaa'n aadhe fulchee, Kenaanike boga duuchcha'ni me'aashsha akeekennen; horte isixxanna bira sa'issennen; Yissihaaqiinnaa isi'aa uwweenne.✝ 4 Yissihaaqi'a Ya'iqoobi'aanna Eesawu'u uwweenne; Eesaawu'anna Seyiirika koobatika boga isi'a qadaadake kadaashsha uwween. Yaane kinni Ya'iqoobinna oose isixxi Gibtse'a me'ine.✝

5 « ‹Ookkoneechchi udumi'a Muusenna Aaroonii'i erge'e Gibtseka arda lumoxxe rakkonni ganenne'e ha'noo ookko fulchenne.✝ 6 Edika ha'nooka annuwwa Gibtse'n fulcheenaa Abbaayyatibaa dange genne. Gibtseke manni insa'nee fadhadiinxe gaareninna fadhadiki Diimmoxxe Abbaayya qico ha'noo shorrinee wodda,✝ 7 yaane kinn insa'ne'e gargraaronaa'a anibaa oo'neen; aninna insa'nexxenna Gibtseke mannixxe oddo'n dukkanna hexxaashsha assennexxa ille ha'nooxxinni uudine'en. Ookkoneechchi uduma ha'no qeerraaxxa yanna qiilla gammoje giddo turtineen.

8 « ‹Boroti darrexxe Yordaanoosi'ni hedheeke Amoorake ardike bogibaa ha'no idagennen; insa'nenna ha'noo lolleen, ani kinni midditte ha'no'a uwwee insa'nee injifattinaashsha asse'e ha'no edi'n balleessen; ha'nonna boga insa'neka adhdhitine.✝ 9 Ookkoneechchi uduma Mo'aabik moyanji Sefoorik belt Baalaqi ha'noo lolo'a qophpheefate; ha'no yowwoo'anna Bele'aami hiyyemmake Bi'oorke beltibaa erge. 10 Ani kinni Bele'aami hiyyaaxxa laqa gibennen, tennexxe higgegenni ha'noo biifashsha assennen. Konne qicinni ha'noo Baalaqixxe anganaa'n gatisennen.

11 « ‹Ha'noonna Yordaanoosike galaana foofine'e Iyyaariko'a dagginnen; Iyyaarikoki manni, iittanni Amoorik, Feeriizito, Kenaanito, Hiititotik, Gergerisiitotiki, Hiwaakinna Iyyaabusaki manni ha'no'o lolmashanni; ani kinni insa'ne'e injifattinaashsha midditte ha'no'aa uwwennen.✝ 12 Lamiing Amoorake moyanjuwwa'n assenneshshanni insa'ne ha'no ed'ni baqanto'a alayyo insa'neni worenenni. Tenne assitineeki ha'noke wolaantichchinna ha'nooxxe gabennitebaan.✝ 13 Ha'noo hujjine elootinebaaka boganna jadhitinebaaka qachchuwwa'ni hexxinashsha ha'no'aa uwwennen; kassinebaka woyinetika hiddichchonna elotinebaake Eejerisixxa guuma ittina'ne hixxinan.›✝

14 «Ta'anna ha'noo Duuchchi Woddika Gootta ulfeesse dhugaati isi'a ajajendina'n mitte godobinni ergatte. Ediki ha'nooki annuwwi Eefiraxxisike galaani wido Gibtseke boga'n magenoonfantammaka dharichcha magenuwwa fugusitine Duuchchi Woddika Gootta calla Magenoonfatte. 15 Isoo magenoofata gibbinoole kinni edi wodda ha'nooki annuwwi Eefiraxxisike galaani wido hedhemma wodda magenoonfantaammaka yookaani ta'a giddo hexxineeke Amoorake ardike dharichcha magenuwwina'an hoone'a magenoonfatinaaxxa fi'le. Aninna anki mini hadi kinni Duuchchi Woddike Gootta Magenoonfantanon.»

16 Ardikinna «Duuchchi Woddika Gootta waale'e wele dharichcha magenuwwa magenoonfachhco no'onaa'n bayyato ise! 17 Duuchchi Woddik Gootti no'oki Mageni no'o Gibtseke bogixxe garbumanaa'ni fulcheen. Isi asseexxa mambe'iinxa yaane duuchcha uundeennen. Duuchchiinge ardike bogi giddi'n sa'na'n dangano wodda nage'iki no'o heqqeen. 18 Duuchchi Woddik Gootti duuchchiinga arda ittanni bogi giddo hedhammaka Amooraka ardanna no'o edi'n shorreen. Tennexxe no'o Duuchchi Woddika Gootta magenoonfanitannoni isi no'oke Magenon.»

19 Iyyaasu arda hiyyee qici, «Duuchchii woddik Gootti woyyichchakenna hinaantichcha Mageno kadeemmaxxe'e is'a ergatema shollaxxebaan. Jallatinaa woddanna cubbo hujjinaa wodda ha'no'a gattowwaali hiyyabaan. 20 Duuchchi Wodika Gootta waaldine'e wele dharichcha magenuwwa magenoonfatinoole eloxxa assa'n dageeke kadoolenna hige'e elobaxxa asse ha'noo balleessaan.»

21 Ardi kinnina Iyyaasu'u «Waawwo'o; no'o Duuchchi Woddika Gootta magenoonfatannoni» hine.

22 Ookko'ni Iyyaasu «Yoona Duuchchi Woddika Gootta magenoonfatinnon hitine haasotineexxa arabi ha'noong dhugaate» hiyye.

Insa'nenna «Eeti arabi no'oki dhuugaten» hine.

23 Iyyaasu, «yoona ha'noo giddo hedheeka dharichcha magenuwwa fugusse Duchchii Woddika Gootta Isira'eelike Magenibaa mitte godobinni higge» hiyye.

24 Ookkkonneechchi uduma ardi Iyyaasu'u, «No'o Duuchchi Woddika Gootta no'oke Mageno magenoonfantannon seera isikeena ajajemmannoni» hine.

25 Ettene barra Iyyaasu Sekemika arda Duuchchi Woddike Goottin welit kako aassise. Gallaaka seeranna insa'ne'a ugge. 26 Iyyaasunna konne sseruwwa Mageniinke seerike maxaafa'n borreesse. Ookkoneechchinni uduma mitte lumoka kinjo adhdheexxi Duuchchi Woddike Goottike Galmi bira hedheeke Qilxi hunda kaase. 27 Iyyaasu arda duuchcha «Kunni kinji Duuchchi Woddik Gootti no'o'ni haaso'exxa duuchcha laqeen. Tennexxe Mageno ha'nooka waaldinoole dhugaa kulaan» hiyye.

28 Ookkoneechchi uduma Iyyaasu duuchchiingi ardi ifi ifinge geegibaa wirri hiyye'e me'aashsha asse.

29 Ookkoneechchi uduma Duuchchi Woddike Goottik erganiji Neewek belt Iyyaasu dhibbanna tomme wogga'n lummedhe. 30 Isira'eeliki ardinna Ga'ashi hiyyendaaxxe kooba'n middi darre'n Efireemike kooba callike boga'n hedheeke Teminaseera hiyyemaake isike qadaada'n moonge.

31 Iyyaasu hedhoti hedhemmaxxa yanna duuchcha, Iiyyaasu udumanna hedhoti he'nemakenna Duuchchi Woddik Gootti Isira'eeliki ardi'aa asseexxa duuchcha egendeexxe geedhek baro duuchcha'ni Isira'eelki ardi Duuchchi Woddika Gootta magenoonfante.

32 Isira'eeliki ardi Gibtseke boginaa'n fulee wodda aa'ne fulleexxa Yooseefixxa miqe, Ya'iqoobi Sekeemik annaa Hamoorinaa'ni dhibba birreti sibiljinin hireemmake Sekemike boga'ni moogeme; bogi kunni Yoosefixxe horte'a geyeeke geegomman.✝

33 Iittanni Aaroonik belti Ali'aazaarinna reye; isinna kooba callike Efireemike bogi giddo hedheeke belto ifikee Finihaasi'aa hixik uwwemeeke Gibaake boga'ni moogeme.