1 Iyyerusaalemiki moyanji Adoonitsedeqi, Iyyaasu Ayika qachcha abideexxi lole balleeseexxa, iittanni Iyyaariko'ninna isike moyanjo'n asseexxa duuchcha, Gayi'ninna isike moyanjo'n asseexxa, iittann Geba'oonik manninna Isira'eelike ardinni weli aage nage'ik insa'ne bira hedheexxa laqe. 2 Tennenaa'ni kexxeexxa isinna isik ardi yo'oshsha alanneemman, ittinna Geba'oonik qachchi lumminnekenaa'n kexxeexxa heddi moyanjuw galchaammak qachchuwwishsha kadiyot Ayike qachchanaa'n sa'emmaxxeenna giddo hedhammak manni lolake'e ege'nemeek kademmaxxeeten. 3 Tennexxee Iyyerusaalemiki moyanji Adoonitsedeqi shoole moyanjbaa, Hohaami hiyyemaaka Kebiroonike moyanjibaa, Piraam hiyyemaake Yaarmuutike moyanjibaa, Yaafi'a hiyyemaake Lakkishiike moyajibaanna Daaberi hinammake Egiloonike moyonjibaa hiyye ergee qici; 4 «Geba'oonik manni Iyyaasuninna Isira'eelik ardin nage'iki he'naashsha weli aagemmaxxe'e anxe gamo kaddinee'na mitteba hinge insa'nee'e lollona'a amme» hiyye.

5 Ookkoo'n oddi Amoorak qachchuwik moyanjuwwi, Iyyerusaalemiki moyanji, Kebiroonik moyanji, Yaarmuutik moyanji, Lakkishiik moyanjinna Egiloonik moyajni duuchchiingi mitteb ifika loliika manna bukki assinennexxi Geba'oonika qachcha erqe kayyii'n bunqe lolle.

6 Geba'ooniki manninna Iyyaasu hedheeba Isira'eelik ardi ofo'leeb Geligeeli'a erga ergineexxi, «koobuwwa callike boga'ni he'nammaki Amoorak qachchik moyanjuww duuchchi mitteba bukki hiyye no'o lolo'a qophpheefatemmaxxee no'o garboole atixxa gargaartottaa hashsha barrate hitoxxeni rakke dagi» hine kulle. 7 Tennexxe Iyyaasunna duuchchiing isike loliink mannana lolaake ege'nemeek mannini welt Geligeeli'ni fule me'e. 8 Duuchchi Woddik Gootti Iyyaasu'u, «Insa'nee'e injifattottaa middit ati'a uwwaanaxxe mee sodaat insa'ne giddii'n mittikinna atee uurre lolaaki hedhebaan» hiyye.

9 Iyyaasunna hashsha duuchcha Geligeeli'ni Geba'ooni'a me'a'ni galeexxi mare si'atebaaka Amooraka manna lole. 10 Duuchchi Woddik Gootti Amoorak loliink manni Isira'eelika loliinka manna alaye bararaqaashsha asse; Isira'eeliki loliink manninna wele Geba'oonik loliinka manna gor'e shiya'n wele gateek Beetihoroni darree'n koobat hundii'n adaddeeshumma me'inammaba hedhemmak Azeeqanna Maqeedake qachchchi qico'n shorre. 11 Amoorak manni adaddeeshumma Isira'eelik loliink manni edii'n baqatamma wodda Duuchchi Woddik Gootti Azeeqa gennaa qico'n iimi'n lumolla kaade insa'ne'ni ganisiise kaadeti reyeek manni Isira'eelik loliinki manni shiyeeki irra yo'okeman.

12 Duuchchi Woddik Gootti Amoorito Isira'eelik ardixxe anga'ni sa'isse uwweexxe barra'ni, Iyyaasu Duuchchi Woddika Gootta Isira'eeli'i edo hiyyee qici;

«Tee arishsho Geba'ooni iima uurri;

Tee baate Eeloonixxe dhooqa iima uurituun.»

13 Tennexxe Isira'eelik ardi naapha ifike'n halo fulaa qico'ni,

Arishshoo uuritemmaba gatte;

Agenjikinna hedhemmabaa'n le'mebaan.

Tinninna Yashshaarike maxaafa'n borreessende hexxeen.

Arishsho iimatixxe oddo'ni uurrite; e'yitebaang barra duuchcha hosse.✝ 14 Ookkoneechchi edi darrenna kadi yookaan uduma ettene barrashsha Duuchchi Woddik Gootti manjiinka haaso'a laqeexxi barra hara hexxebaan. Dhugaandinn Duuchchi Woddik Gootti Isira'eeli'a gamote kade'e loleemman.

15 Ookkoneechchi uduma Iyyaasunna isik loliink manna Isira'eelik mann hedhemmabaa Geligeeli'a wirrine hinge.

16 Ondiing Amoorak moyanjuww baqate fuleexx Maqeedake qachchi bira hexxeexxe wolo'o giddo sho'ommeemman. 17 Kunni ondiing moyanjuww Maqeedake qachchi bira hexxeexxe wolo'o giddo sho'ommeexxa anfe Iyyaasu'n kulle. 18 Iyyaasunna hiyyee qici, «Lumollamma kino goggo'mishine wolo'otixxa hula cuffe ookko'o heqqaaka mannanna ugge. 19 Ha'no kinni ookko'o turitti noqqe higgine udumii'n naapha shorritina'n lolle mee baqatefu qachuww insa'neki giddi'a mee e'yowaal! Duuchchi Woddik Gootti ha'nook Mageni insa'nee injifatinoo'a middite hanno'a uwween.»

20 Shiixxook manni calli baqate fule ifike qachchike dalla'i giddi'a e'ye lubbo gatoolenna Iyyaasunna Isira'eelik ardi duuchchiinga manna gorra'e shiye bire. 21 Ookkoneechchi uduma Iyyaasuk loliink manni duuchchi nage'ik hegeexxi isi hedhemmaba Isira'eeliki ardi ofo'lemmabaa Maqeeda'a dange.

Tennenaa'n kexxeexa bogi ookkone giddo Isira'eelik arda'n mittikinna bucuqqi hiyyaammak hedhemmabaan.

22 Ookkoneechchi uduma Iyyaasu, «Wolo'otixxa hula banddin okkone ondiinga moyanjuwwa anibaa iyyedagge» hiyye ajaje. 23 Tennexxe wolo'o banneex okkone onde moyanjuwwa Iyyerusaalemik, Kebiroonka, Yaarmuutika, Lakkishikanna Egiloonika moyanjuwwa fulchineexxa, 24 Iyyaasuba'a iyyedage; Iyyaasunna Isira'eelika arda duuchcha ye'exxi isika loliinka manna ajajammak manni dageexx gooba insa'nek ha'naashsha ajaje; insa'nenna hiyyemmashshanni assine.

25 Iyyaasunna insa'nee, «Sodaatinoqqe, alaltinoqqe, jabaatte, ti'ni hiyye yoona lolendinammake naapha duuchcha'ni Duuchchi Woddik Gootti tennee assaan» Hiyye. 26 Ookkoneechchi uduma Iyyaasu ondiinga moyanijuwwa shiyyexxi renisha onde haqichcho'n fanse; insa'neki renshinna galgali qico'n fanisemeeba ture. 27 Arishsho e'yitamma wodda Iyyaasuke ajajinni moyanijuwwiinka rensha haqiqetenaa'n dirrinse'e edi wodda sho'omemmaxxe wolo'o giddo hunne. Lumolla kinonna gogo'minshe'e wolo'otixxa hula cunfe. Iti kinonna techchi qico'i okkooni hexxe.

28 Eettene barra'ni Iyyaasu Maqeeda hiyyemaaka qachcha lole abideexxi moyanjokanna shiye; qachchi giddo hedhemmaka manna duuchcha mittikinna gatebaang shiye bire. Maqedaka moyanjo shiiyee qici edi wodda Iyyaarkoka moyanjo shiyemmashshaten.

29 Ookkoneechchi udumi'a Iyyaasunna isiki loliinki manni Maqeedaa'n fule'e Libina hiyyemaake qachcha lole'e miidhe. 30 Iittanni Duuchchi Woddik Gootti qachcha moyanjignni Isira'eelixxe anga'n ibise. Iyyaasu qachchanna qachchi giddo hedhemmaka manna duuchchin bire. Qachchiinka moyanijonna Iyyaarkoka mojanjo shiyemmashsha shiye.

31 Ookkoneechchi udumi'a Iyyaasu isike loliinke manninni welt Libininaa'n duule Lakishi buqe lole'e miidhe. 32 Duuchchi Woddik Goottinna langaxxe loliinxe barra'n Lakkishii'i Isira'eeli'a sa'isse uwwe. Iyyaasunna langa baro isee'e abixxee Libinaka qachcha assinemasha ookkone qachchi giddo hedheka manna duuchcha shine bire 33 Ookkone wodda Geezeriki moyaji Horaami Lakkishii'i gargaaro'a dageemman; Iyyaasunna isonna isika loliinka manna lole miidhe; insa'ne giddii'n mittekinna luboti gateeki hedhemmabaan.

34 Ookkoneechchi udumi'a Iyyaasu isike loliinke manninna welt Lakkishii'n duule'e Egiloonii'i buqe lole miidhexxi; 35 Eettene barra'ini qachcha anga ibilse manna wolantichchiki shine birre; Lakkishii'n assinemmashshanni qachchi giddo hedheeka manna duuchcha shinne birre.

36 Ookkoneechchi uduma Iyyaasu isiki loliink manni welt Egiloonii'i duuleexxi Kebiroonii buqe lole'e midhexxi, 37 Insa'nenna okkone qachcha moyanjiinxe anganaa'ni, iseke loola'n hedheeke hadi giddike qachchawwi giddo futti hineeka duuchcha shinne birre. Iyyassunna Egilooni'n assemmashshann qachcha balleesinaashsha murte uwwe; okkone qachchi giddo hedhemmake manninaa'n mittikinna lubbot gateeki hedhemmabaan.

38 Ookkoneechchi udumi'a Iyyaasu isike loliinke manninni illee iima higexxi Debirika qachcha lole midhexxi. 39 Insa'nenna ookkone qachcha moyanjokanna loola iseka duuchcha ibindeexxi wolaantichik shinne birre; qachchi giddonna hedhemmachcho duuchcha mittenna gatinsebaang kutti assine. Iitanni Libina'ninna moyanjo iseke'ni iitanni Kebirooni'ni assineexxa duuchcha kaba Debiri'ninna moyanjo iseke'ni lenbe assine.

40 Konne qicinni Iyyaasu boga duchcha: koobatika boga Negeebii'i, ookkone dhidhimii darreka gammoojichcha boganna koobatixxe adaddeeshummaka boguwwinni mitteba konne boguwwika moyanjuwwa duchcha anga ibilse; Duuchchii woddik Gootti Isira'eelik Mageni ajajemmashshanni duchchiinga shiye bire male mittekanna lubboti waaleek hedhebaan. 41 Iyyaasunna Qaadesi Berinee'n Gaaza qico'n Gooshenike loolika boga duuchcha, Geba'ooni qico'n hedheeka boga duuchchiinga lole injfate. 42 Iyyaasu konne moyanjuwwanna insa'neka boga duchcha mitte duulo'ni injifateeki Duuchchi Woddik Gootti Isira'eeliki Mageni Isira'eeli'a lolammaxxeen.

43 Ookkoneechchi uduma Iyyaasu isike loliinke manninna welt Isira'eeliki ardi ofo'lemmaba'a Geligeeli'a wirri hiyye hige.