1 Ardi duuchchi Yordaanoosii'i foofechchi uduma Mageni Iyyaasuu'u hiyyee qici, 2 «Ardi giddii'n gosatike mini mininaa'n mitte mitte manjo duuchching mitteba tommenna lame manna melli 3 Iittanni Yordaanoosike galaanixxe oddo'ni ookkone qeesole uurritemabaa'n tommena lame kinno aa'ne dunke ha'noo'ni welt foonfeexxi dokko galdinaaxxe bakka'n ugginaashsha ajaji.»

4 Iyyaasunna mitte mittenge Isira'eelike gosatike mininaa'n baallonsemaka tommena lame manna ye'e. 5 Insa'neena hiyyee qici, «Duuchchii woddik Gootta hanooke Mageniinke kakotike taabooti edo saxxineexxi Yordaanoosike galaanixxe oddoba'a sa'we; mitti mitti ha'no'nig Isira'eelike gosatike minike laakkosixxe qixxe'n mitte mitte kinjo dugumoote'n dukke. 6 Kunninna ha'no giddo beessisake kado'aten; heger ha'nooxxi oose ‹Tinni kino mayiinxe?› Hite ha'no qortoole, 7 Yordaanoosik galaan Duuchchi woddike Goottike kakotike taabooti edo uurreexxa, iittanni taaboti Yordaanoosika galaana foofa wodda Yordaanoosik galaanike wodi'i uureexxa, tinni kino Isira'eelike ardi'a duuchchi woddixxe qalli kaddeexxa insa'ne'ni kulle.»

8 Isira'eeltotinna Iyyaasu inisa'ne ajajemmashshanni assitte; Duuchchi woddik Gootti Iyyaasu'ni kulemma qicinni Isira'eelike gosati minike laakossuwwixxe qixxe'n tommena lame kino Yordaanoosike galaani giddii'n aaxxeexxi hexxammaxxe kaanbeba'a aaxxe foofiyyot ookko uggite. 9 Iyyaasunna kakotika taaboota dukkammaxxa qeesole uurite hexxemmabba Yordaanoosike galanixxe oddo'ni wele tommena lame kino uurisse; tinni kinonna telchiqico'n eetene bakka'ninn hexxeen.

10 Muusenna Iyyaasu'n uwwemmake ajajishsha Duuchchi woddik Gootti arda'n kulaashsha Iyyaasu'u ajajemmaxxi muuxendaa qioc'ni taaboota dukkeemmaxxi qeese Yordaanoosike galaanixxe oddo'ni uurrite turte; ardikinna rake foofe.

11 Ardi duuchchi foofe luggeeshshanni Duuchchi woddike Goottik taabootinna iitti qeese ard insa'ne'e uuda'naa foonfe. 12 Roobelike gosati minikinna Gaadike gosatik mini gamisa Minaasek gosatik mini Muuse insa'ne ajajemmashshanni ifika loliinka miya adhdhineexxi ardakee arda edinse foonfe. 13 Shoole tomme kuma kadaak bagedokanna wonte ifixxa adhdhineexxi lolatee qixxeefanteexxi Duuchchi woddik Gootti edo Iyyaarikoke diidibaa foonfe. 14 Eettene barra'n Duuchchi woddik Gootti Iyyaasu'u Isira'eelike ardi edo duuchhca iso'o lumise; ardikinna Muuse ulfeesammashshanni Iyyaasunna hedho isixxike baaro duuchcha'ni ulfeesine. 15 Ookkoneechchi uduma Duuchchi woddik Gootti Iyyaasu'u hiyyee qici: 16 «Dhugaa kulatika taaboota dukkeexi qeese Yordaanoosike galaananaa'ni fuldaashsha ajaji» hiyye. 17 Iyyaasunna qeese «Yordaanoosik galaananaa'n fulle» hiyye ajaje. 18 Qeesetinna Duuchchi woddike Goottika kakotika taaboota dukkeexxi Yordaanoosike galaani giddii'ni fuliyyoti lekka insa'nexxi bago buttina tuqqeeshshanni Yordaanoosiki galaan bakka ifixxe'ni illeema hige; eddixxa ifixxa bakka wo'me yaa'ate'n ke'e.

19 Siretik agenjixxe tommixxe barra'ni ardi Yordaanoosi'i foofeexxi Iyyaarikoke qachchanaa'n boroti darre'n Geligeela kaanbe olte. 20 Iyyaasunna Yordaanoosike galaana'n aadhdhemmaxxa tommena lame kino Geligeela kaase. 21 Isira'eelika ardanna hiyyee qici, «Heger oose ha'nooxi, ‹Tinni kino mayiinxesi?› Hiteexxi annuwwa ifika qortoole, 22 ‹Isira'eelik ardi Yordaanoosi'i bago buttii'ni fooffeen› hitine insa'ne'ni kulle. 23 No'o foonfano qico'ni Duuchchi woddiki Gootti ha'nok Mageni diimmoxxa abbaayya basseemmashshanni ha'noonna fooffinaa qico Duuchchi Woddik Gootti ha'nook Mageni Yordaanoosika galaana ha'no edo basseen. 24 Tennee asse'elchchi Duuchchii woddike Goottixxi hirre jabaxxe kaddeexxa buttattike arduwwi duuchchi ege'naashshanna Duuchchi woddika Gootta ha'nooka Mageno sodaatinaashshaten.»