1 Yooseefike angafa belto Minaaseke ardi'a uwwemeeki qadaadi konneechchi butti'a hedheeken. Minaaseki angafa Gele'adiki anni Makiri loliik ege'nemeeke janna kadeemmaxxee Galadikanna Baasaanika boga isike qadaada kadaashsha uune. 2 Yordaanoosi'n dhidhimi darre'n hedheeki bogi wele gatteexxe Minaasexxe ooseke, Abi'eezerike, Heleqike, Asiri'eelike, Sekemike, Heferikenna Shemida'ike aanchi aanchi ardi'a uwweme. Yooseefike belto Minaasexxe labbaxxe ooseeki aanchi aanciki ardi konneechchinn buttiaa hedheeken.

3 Tselehaadi Heferik belti, Heferii'i Geli'adiki belt, Gele'adi'i Makiriki belit, Makiri Minaasek belton. Tsele'adi kunni dubarra male'e labbaxxa oose afeemmabaan; isike ondi dubarri summi Mahila No'a, Hogila, Milkanna Tirtsa hiyyemaamman. 4 Inisa'nenna qeessichcho Ali'aazaaribaa Neeweka belto Iyyaasuba'anna ookkone akekisanjuwwibaa marreexxi «Duuchchi Woddik Gootti Muuse no'aa no'oxxe gosake labbalinshann geego uwwo'a ajaje'en» hine. Tennexxe Duuchchi Woddiki Gootti ajajemashan Iyyaasu insa'n'a insa'nexxe gosake labbalinshann geego uwwe.✝ 5 Minaase'a Yordaanoosike galani'n boroti darre'n hedheeke Gele'adikenna Baasaanike bogi gadhidare welebaa'n tomme insa'ne geyaaka qoobo anfenn 6 Minaasexxi horte dubarri kinna labbaliinshanni geyaaka geego alfineemmaxxe'e Gele'adiki bogi wele gatteexxe Minaasexxee horte'a uwweme.

7 Minaaseke minike ardke geegixxi gabala Aseerike minike ardixxe gabalana'n kexxeexxi Sekemii'ni boroti darre'n hedheeke Mikimetaatike qachchi qico'n marte geltaan; ookkonna bita'i darre'n saxxexxi Enitaaphu'ahik ardi hedheeka boga mitteba abiddaan. 8 Taapuhak bogi Minaase'a geeyake geegomman; kaddomale Taaphuwwake bogixxe gabala'n hedheeki shiixxooki qachchi Efireemixxe horteke geegomman. 9 Gabalatinna ookkoo'ni kexxexxi Qaanake galani qicon geltaan; Qaanake galaani bita'i darre'n hedheeki qachchuwwi Minaase'e geegi giddo hedheeke kadoole ookko'n giddon Efireemixxe horteki qachchuwwinna hedhemman; Minaasexxi gabala mididare'n Qanaga galanixxa duuka Mediteraanixxe Abbaayya'n marte uurrtaan. 10 Tennenaa'n kexxeexxa dhidhimii darrexxi lamingixxi gabala Mediteraaniyanixxe Abbaayya kaddaa wodda bita'ii darree'n Efireemi middi darre'n kinni Minaasexxe horteke geegomman; middi darre'n Aseeri boroti darre'n Yisakoorixxe horte'a geyeek qadaadamman.

11 Iittanni Minaaseke qadaada kadeeki Yisakoorkinna Aseerike bogi giddo hedheeki qachchuwwinna qarqara hedheeki shiixxarammi qachchuwwi; Beetisheninna qarqara iseke'ni hedheeka shiixxaramma qachchuwwin, Yibili'ami qarqara iseke'n hedhemmake shiixxramma qachchuwwik, Indoorik ardi, Ayindoori, Ta'inakinna, Megido, kunni duuchchi qariqara hedhemmake shiixxaramma qachchuwwi welti Minaaseke geego kade; sakkake laakkoosa'ni Naaphotiten* 12 kaddo malee Minaasexxe horte ardi Kanika arda shorreexxi konne qachchuwwa dande'e abidebaan. Tennexxee Kenaanik ardi ookkoo'ni fulebaang gate. 13 Isira'eeliki ardi hunna lephpha'ni me'oolenna Kenaanika arda duuchcha shorrebaan; yaane kinni jabaxxa huje hunnati hujinsa'nemman.✝

14 Isira'eelii Yoosefi miniki ardi Iyyaasu «Duuchchi Woddik Gootti eebbisena'a horte no'oxxi ba'laxxen, maye no'a mitte hixika qoobbo calla uutette?» Hiyye qore. 15 «Iyyaasunna horte ha'nooxxe ba'laxxe kunni Efireemi koobacallik bogi ha'no'a shiixxedhoole martinexxi Feeriizitotinna Raafayike ardika boga a'ne.»

16 Insa'nenna «Kunni koobacalliki bogi no'o geeyakebaan; Iyyizira'eelixxe dhooqaki Beetishanke qachchikinna qarqara hedheeke shiixxaramma qachchuwwiki ittann diidicallike boga'n hedheeki Kenaanik manni duuchchi loliinxe gaaruwwa afe'en» hine.

17 Iyyaasu Isira'eeli Efireemike mini'ana Yordaanoosi'ni dhidhimi darre'n hedheeke Isira'eeli Minaaseke minika arda hiyyee qici: «dhugaandinn ha'nooxxi horte ba'laxxen; hunna ha'nooxxinna jabaxxen; ha'no qoobbi mitte hixa calla kadabaan. 18 Yaane kinni kooba calliki bogi ha'nooke kadaan gongoma andine gabalate'n gabalati qico'n abixxitine'e afike assedhe; Kenaanik ardi loliinxa fadhadiinxa gaaruwwanna jabaxxa hunna afeke kadoolenna ha'no insa'nee bogakenaa'n goshshine'e shorra dandeettinaan.»