1 Leewwik gosatik minik aanchi aanchike ardiki sooresuwwi qeesichcho Ali'aazaaribaa, Neeweke belto Iyyaasubaanna Isira'eelixxe gosake minike aanchi aanchike ardike sooresuwwibaa marre. 2 Kenaanike bogi giddo Seeloke qachcha'n insa'nebaa marreexxi «Duuchchi Woddik Gootti Muuse'n hedhe no'o'a he'nannoki qachchuwwinna qarqara qarqarake'n hore alla'latee kadaaki bogi no'aa uwwemaashsha ajaje» hine.✝ 3 Tennexxe Duuchchi Woddik Gootti ajajemmashshann Isira'eeliki ardi Leewwike minike ardi'a konneechchi butti'a hedheeka qachchuwwanna hore alla'latee kadaaka boga ifi ifike qoobbonaa'n uwwe.

4 Taakaki hixi Qa'aatike ardi'a ibe; Leewwike minike qeesichcho kadedheeke Aaroonixxe oose'a tommenna sase qachchuwwa Yihudake, Siimi'onikenna Biiniyamike ardike bogana'n hixiki qoonde 5 Wele gateeke Qee'aatike ardi'a Efireemike, Daanikenna dhidhimi darre'n Minaaseke ardike boganaa'n tomme qachchuwwa hixiki qoonde 6 Gershoonike ardi'a Yisakoorike, Aseerike, Nefitaalemikenna boroti darre'n Baasaani hedheeke Minaaseke ardike boganaa'n tommenna sasi qachchuwwi uwweme.

7 Meraarike aanchi aanchike ardi'a Roobelike, Gaadikenna Zabilonike ardike boganaa'ni tommenna lami qachchuwwi uwweme.

8 Muuse'n darree'n Duuchchi Woddik Gootti ajajemmashshanni Isira'eeliki ardi konne qachchuwwanna horiinxe alla'la'a kadaaka boga Leewwike minike ardi'a hixiki qoode. 9 Yihudakenna Simoonike ardike qachchuwwanaa'n konneechchi butta summik kulemeek qachchuwwi uwweme; 10 Taakkaki hixi insa'ne'a ibeemmaxxee Leewwike minike qeesichcho Aaroonixxe horte kadeeke Qe'atike ardi'a uwweme 11 Yihudake koobati bogi giddo hedheeka Qiriyati'arbaaqi hiyyemaaka qachcha qarqarake'n hedheeke hore alla'latee kadaake boginninni welt insa'ne'a uwweme; isenna Kebiroon kunni Aribaqi hiyyemeek Enaaqike annamman. 12 Kaddo malee qachchi qarqariki fichchuwwanna qarqarake'n hedhemmaki shiixxarammi qachchuwwi edi wodda Kaalebii'i Yifaaneke belti'a qadaadake kadaashsha uwwemeemman 13 Iittitanni danoti manjo shiyeeki manji halo fulo'a hasaake manjinaa'n baajeexxi hedhammake qachchuwwi giddii'n Kebirooninna Libina qarqara qarqara'n hedheeke hore allalla'latike bogginni welti qeesichcho Aaroonixxe horte'a uwwe. 14 Yaatirik qachchi, Eshiteemo'ak, 15 Holooniki, qarqara qarqarke'n hore alla'latike boginninni welt, Debiri, qarqara qarqarake'n hore alla'latike boginninni welti, 16 Ayyinii'i, qarqarake'n hore alla'latike boginninni, Yuuxa'a, qarqarake'n hore alla'latike boginninni, Beetishemeshii'i, qarqarake'n hore alla'latike boginninni Yihudakenna Siimi'oonike gosa gosati minike ardike boginaa'n qoodemee insane'a uwwemeeke sallane qachchuwwan. 17 Biiniyamike gosati ardike boganaa'ninna qoodeme insa'ne'a uwweemmaki qarqara qarqarake'n hore alla'latike boginninni welti shooli qachchuwwi Geba'ooniki Geba'iki, 18 Anatootikinna Aalimoonike qachchchuwwan. 19 Qeese Aaroonixxe horte'a qarqara qarqarake'n hedheeke hore alla'latike boginninni welti tommeenna sase qachchuwwi insa'naa uwweme 20 Wele gatteexxe Leewwike gosati minixxe Qe'aatixxe horte'a Efireemike gosati minike ardike boganaa'n konneechchi buttaa hedheeki qachchuwwi qoodemee insa'ne'a uwweme.

21 Koobatike Efireemike ardike bogi giddo hedheeki, danoti manjo shiyeeki manji baajeexxi lubbo gataammaki Sekemi qachchi qarqarake'n hedheeke hore alla'latike boginnnni welti, Geezeriki qachchi 22 Qibitsayimikinna Beetihoronki qachchi qarqara qarqarake'n hedheeke hore alla'latike boginni welt shoole qachchuwwan.

23 Daanike gosati minike ardike boganaa'n qoodemee insa'ne'a uwwemeeki qarqara qarqarake'n hedheeke hore alla'latike boginninni welti shooli qachchuwwi Eliteeqek, Gibetoniki, 24 Ayyaloonikinna Gaatirimooni.

25 Dhidhimii darre'n Minaaseke gosati ardike boganaa'n qoodemeexxi qarqara qarqarake'n hedheeke hore alla'latike boginninni welt insa'ne'a uwwemeeki lami qachchi Ta'inakinna Gaatirimoniten 26 Kunni qarqara qarqarake'n hore alla'latike boginni welti tommi qachcuwwi gateemmaki Qee'aatike gosati miniki ardi'a uwwemeeken.

27 Leewwike gosati minixxe horte'a, Gershoonike ardi'a uwwemeeki bogi konneechchi buttia hedheeken; boroti darre'n Minaaseke ardike boganaa'n qarqarake'n hedheeke hore alla'litike boginni welt uwwemeeke lame qachchuwinnaa'n mitti danoti manjo shiyeeki manji baajammake Baasaani giddo hedheeke gollanite he'naaxxa Goola qarqarake'n hore alla'latike boginninni welti Eshiteeraten. 28 Yisakoorike gosati minike ardike boganaa'n insa'ne'a qoodeexxi uwwemeeki qarqara qrqarake'n hedheeke hore alla'latike boginninni welt shooli qachchuwwi, Qisoonik, Dabiratiki, 29 Yarmuutikinna Eeniganiimiken. 30 Aseerike gosati minike ardike boganaa'n qoodemeexxi insa'ne'a uwwemeeki shooli qachchuwwi, Mishi'aalik, Abidoonik, 31 Heliqatikinna Rehoobitmmaen. 32 Nefitaalemike gosati minike ardike boganaa'n qoodemeexxi insa'ne'a uwwemeeki qarqara qaraqake'n hedheeke hore alla'lalatike boginninni welti Geliila giddo hedheek manjo shiyeeki manji baajammaki sasi, Qaadeesik Hamotidorikinna Qartaanike qachchuwwan. 33 Gershoonike gosati minike ardi'a uwwemeeki qarqara qarqarake'n hedheeke hore alla'latike boginninni welt duuchchiing mitteba tommenna sase qachchcuwwan. 34 Leewwitotenaa'n gateeke Meraarike ardia'a Zabilonike ardike boganaa'n qoodemeexxi uwwemeeki qarqara qarqarake'ni hedheeke hore alla'latike boginninni welti shoole qachchuwwi Yooqine'aamik, Qaritaki, 35 Dimoonanna Nahilaaliten. 36 Roobelike gosati minike ardike boginaa'n qoodemeexxi insa'ne'a uwwemeeki qarqara qarqarake'n hedheeke hore alla'latike boginninni welti shooli qachchuwwi Beetseeriki, Yahaatsik, 37 Qedemootikinna Mefa'aatikeeran. 38 Gaadike gosati minike ardike boganaa'n qoodemeexxi insa'ne'a uwwemeeki qarqara qarqarake'n hedheeke hore alla'latike boginninni welti shooli qachchuwwi Gela'adike bogi giddo hedheeki Raamotik qachchi danoti manjo shiyemmaki manji baajaki, Mahinayimik, 39 Haseeboninna Iyyazeeriten 40 Gatteemmaxxe wele Leewwike minike Meraarike ardi'a qoodeme uwwemeeki tommenna lame qachchuwwan.

41 Isira'eelike bogi giddo hedheeki Leewwike ardki qarqaraken hore alla'lammeke boginni welt shoole tommeenna saddeeta qachchuwamman 42 Kunni mitti mittiniingi qachchuwwi qarqara qarqarake'n hore alla'latike boga afeemman.

43 Tennexxe Duuchchi Woddik Gootti edike annuwwi'a uwwo'a kako aagemmaka boga Isira'eeli'a uwwe; insa'nena boga abixxine'e ifike ase'ne ofole 44 Duuchchi Woddik Gootti edike annuwwi'a kako aagemmashshanni insa'neke bogi giddo nage'iki he'naashsha asse; Naaphuwwa lolle injifanitaashsha asseemmaxxe'e, huuni naaphinna edo uurre insa'ne'e lola dande'ebaan 45 Konne qicinn Duuchchi Woddik Gootti Isira'eelike ardi'a aageexxi duuchchiinxi kako muuxxendee male'e mittetinna gatteexxi hexxebaan.