1 Yordaanoosi'ni dhidhimi darre'n hedheeke ookkone koobatikenna gammoojjichcha boga'n iittanni Meditiraanixxe Abbaayyaxxe gabala'n Libaanoosixxe kooba qico'n hedheek Hiititotik, Amooritotik, Kenaanitotik, Feeriizitotik Hiwiitotikinna Iyyaabusitotik moyaanjuwwi tennee laqee wodda; 2 Iyyaasunna Isira'eelika arda lolo'a mitteba bukki hiyye dage.

3 Geba'ooniki manni kinni Iyyaasu Iyyaarikonna Ayika qachchuwwa maa asseexxa laqeeammaxxee, 4 isoo sobatee mudhdheexxi, galaalseemmaxxe gala'axxa dullatte kollonjuwwanna Woyinetixxa booka giddo hexxeexxa erbendeexxa kollonjuwwa harrete'n feene. 5 Daddarenide muddeexxa seemmuwwanna oddo'wine. Erbendeexxa kophuwwanna uggudhine. 6 Iitta assineechchinni udumi'a Isira'eeli ofoldemmaba'a Geligeela marreexxi Iyyaasunna Isira'eelika arda «No'o bayyi bogana'ni dangenne mannani; dangenchinna ha'nooni welt nage'iinka seera uggudhinonnaaten» hine.

7 Isira'eeliki ardi kinni Geba'oonka manna «Ha'nonni welt hitta weli aaggotika seera uggudhinanno? Akimagaada dedha ha'no no'o giddo hexxinaaxxe hexxeen» hine.✝

8 Insa'nenna Iyyaasu «no'o atike erganjuwwa kandannoni» hine. Iyyaasu kinni «ha'no haba'i manna? Haba'n daggineera?» Hiyye qore.

9 Inisa'nnenna hiissineexxi, «Duuchchi Woddik Gootti ha'nook Mageni Gibtseke boga'n asseexxa yaane lanqennaxxee no'o bayi boganaa'n dangeneeke mannan. 10 Iittanna Yordaanoosii'n boroti darre'n Asitaarooti hedhammake lame Amoorike moyanjuwwa maa asseexxa lanqeneni: Kunni lami moyanjuwwi Asitaaroti giddo hedhaamake Haseebonk moyanjo Siihooninna Baasaanike moyanijo Oogitemman.✝ 11 Akeekisanjuwwi no'okinna bogi no'oki giddo hedha'neek ardi duuchchi, ‹Gala'a orakee galaalsitine'e anga abixxe; ha'noonna martineexxi insa'nenni afemme; no'onna garboole ha'nooxxe kandannon; insa'nenna no'onni kako aagge hiyye› no'o hine. 12 Tennee galalsinennexxa gala'a udde! No'oke mininaa'ni ke'ne kaba'a daniganowodda kunni waasi eebbakemmani; ta'a kinni hitta bage'e buqunne qico udde! 13 Tennee qalqalluwwa'n woyinetika bulbulo worrenna'wodda haaroxxemman; ta'a kinni hitta daddarende qico uudde! Orinke bayyinnenaa'ni kexxeexxa oddo'winennexxe seemmanna uggudhineennexxi ko'phe darende luggiteen.» 14 Isira'eeliki manninna dagemmake mannixxe gala'anaa'ni shiixxoxxa adhdhine yaane kinni Duuchchi Woddika Gootta lanqeechchi hedhebaan. 15 Iyyaasunna inisa'ne'ni welt jaalome nage'iki he'naashsha seera ugge. Isira'elike ardiki akeekisanjuwwinna seera ookkonee heqqe'naashsha kakante.

16 Seeri uggeme sakka baro Isira'eeliki ardi kunni manni olla'ake kade inisa'nenni welt hedha'neexxa Isira'eeliki ardi laqe. 17 Tennexxe Isira'eeliki ardi ke'e me'exxi sase barra uduma iiki ardi hedheeke qachchuwwibaa geye; inisa'nek qachchuwwinna Geba'ooni, Keefiira, Be'eerotina, Qiriyatiyi'aarimi hiyyemammakeerani: 18 Inisa'nee gennabaashsha ardiinki akeekisanjuwwi Duuchchii woddika Gootta Isira'eelike Mageniinke summinni kakantemmaxxee Isira'eeliki ardi inisa'ne'e shiya waale. Tenne yaanenaa'ni kexxeexxa Isira'eeliki ardi duuchchi ifike akeekisanjuwwa'ni guggumeen. 19 Yaane kinn akeekisanjuwwi iikki; «No'o inisa'ne'ni gennabe'noshsha Duuchchii woddika Gootta Isira'eelike Mageniinke summinni kakattinaaxxe'e inisa'ne'ni miinabe'non. 20 Assinano qici, insa'ne'aa kakanteennaxxa kako diingee'naa Mageni no'o'ni mufatabaashsha insa'ne hedhoti he'naasha amme shiya waallo. 21 Yaane kinni ardi duuchchi'a haqqe bonca'ninna wode'e ikkilla'ni he'nuni» hine. Tennexxe iikki akekisanjuwwi shiqishemmake yaadishshanni yaane kadde.

22 Iyyaasunna Geba'onika arda ye'iseexi «Kaba biringe manna kaddine bayyii'ni dangenneni hitine maye'e anee sobbine? 23 Sobo haasotinemmaxxee Mageni hanoo'ni mufate'en; tennexxe ardi ha'noki anke Mageniinke galmi'a haqqe boca'ninna wode'e ikkila'ni duuchchi wodda garbake kade hedhaan.»

24 Inisa'nenna Iyyaasu; «No'oke Gootta! Eeti assinennexxeni Duuchchii woddik Gootti ha'nooki Mageni ha'no giddo hexxina'neke bogika arda isiki erganji Muuse shiye bire boga ha'no'a uwwo'a ajajeexxa ege'nenneni; tenne iitta assinennechchi ha'noo sodaantennaxxee lubbo gantonaa hineeten. 25 Ta'a yoona atixxe anga'ni he'neenneni, eetetteshsha no'o assedhi.»

26 Tennexxe Iyyaasu Isira'eelike manninni Geba'onika manna shiyabaashsha hoyyemmaxxee mittikinna inisa'nee shiyeeki hedhemmabaan. 27 Yaane kinni eettene yaana'n Iyyaasu geba'aoniki manni Isira'eelike ardi'a garbake kade'e haaqqe boonca'n wode'e iikkillaashshsha Duuchchi Woodik Goottike tolchimalchiba ergatemmaashsha asse. Insa'nenna telchi qico'n Duuchchi Woddik Gootti iso'o magenoonfanto'a fi'lemma booncho'n tenne huje'ni ergatemate'n he'neen.