1 Ookkoneechchi uduma Iyyaasu Roobeelika, Gaadikanna dhidhimi darre'n hedheeka Minaaseke minika arda ye'e bukki asseexxi, 2 hiyyee qici: «Duuchchi Woddike Goottik erganji Muuse ajajemaka duuchchiinga ajaja muuxxineen, anaanna ajajendine'e hiyyennexxa duuchcha heqqexxineen.✝ 3 Konne wodda duuchcha Duuchchi Woddika Gootta ha'nooka Mageni'a ajajendine'e gosa ha'nooxxa Isira'eelika arda gargaartinee malee waaldineexxi yanna hexxebaan. 4 Ta'a yoona Duuchchi Woddik Gootti ha'nooki Mageni kako aagemmashshann ha'nooxxe gosa'a Isira'eelike ardi'a nage'a uwween. Tennexxe Duuchchi Woddiki Gootti Erganji Muuse'a ha'no'aa uwweemmake Yordaanoosike galaani boroti darre'n hedheeke abixxinemmake bogibaa higgine me'we. 5 Yaane kinni Duuchchi Woddike Goottik erganji Muuse Duuchchi Woddika Gootta ha'nooka Mageno eetinaashsha, ora isike duuchcha'n me'itinaashsha, ajaja isika muuxxinaashsha, isibaa shiqqineeke kaddinaashsha ittanni mitte godobininnaa mitte wodaninni isi'a ergatenidinsha ajejemmaka ajajanna seera isika jabaatine heqqedhdhe.»

6 Ookkoneechchi uduma insa'nee Iyyaasu hancufa biife'naa ifike minibaa me'ine. 7 Minaaseke minike gamisi ardi'a Muuse Baasaaninaa'n boga uwweemman; gateeke gamisi'a kinni Yordaanoosike galaani'n dhidhimi darree'n gosa insa'nexxike bogi birii'n Iyyaasu boga insa'ne'a uwwe. Iyyaasunna mine insa'nekiba'a me'ino'aa geegeesse wodda eebbise'e; 8 «Ta'a yoona ha'no heddo hore, heddo birreti sibiljo, worqe, sageettoti sibiljonna heddo seemma boojitinee aaginammaxxee konne boojitinemmachcho duuchcha gosa ha'nooxxinni welt qoodemme» hiyye.

9 Tennexxee Roobelik, Gaadikinna gamisi Minaaseke miniki ardi Kenaani bogi giddo Seelo hedheke Isira'eelike ardi birri'n ke'neexxi Muuse darre'ni Duuchchi Woddike Goottike ajajinni insa'ne'aa uwwemeemmake Gele'adike bogiba'a illee iima hinge.

10 Roobelik, Gaadikinna gamisi Minaaseke miniki ardi Kenaanike bogi giddo Yordaanoosike galaani bira hedheeke Gelilotika qachcha genneexxi heenobaaka tolchimalcho giissine. 11 Weli gateeki Isira'eeliki ardi Roobelik, Gaadiikinna Minaaseke miniki gamisi ardi Kenaani bogi giddo Yordaanoosike galani qarqara Isira'eelike geego'n hedheeke Geliloteke qachcha'n tolchimalcho giissineexxa laqe 12 Isira'eeliki ardi tenne laqeexxi duuchching Seelo dage bukki hiyyoti insa'ne'n duulo'a qophpheefate.

13 Tennexxe Isira'eeliki ardi qeesichcho Ali'aazaarika belto Finihaasii'i Gele'adike bogi giddo hedheeke Roobelike, Gaadikenna Minaaseke minike gamisi ardibaa'a erge. 14 Isinni welt tommi sooresuwwi hedhemman. Insa'nenna mitti mitting Isira'eelixxe gosake mitte mitte minixxe tukke kandeemmake aanchi aanchi ardike sooresuwwan.

15 Inisa'ne Roobelike, Gaadikenna boroti darre'ni hedhaaka Minaaseke minike gamis ardi hedhemmake Gele'adike bogibaa dangeexxi hinee qici: 16 «Duuchchi Woddike Goottik ardi hiyyee qici ‹Hitta Duuchchi Woddika Gootta Isira'eelika Mageno hordofa waaldine iitta hexxeexxa elobaaxxa yaane asitina? Umo ha'nooke'n tolchimalcho giissiyote'e Duuchchi Woddike Gootti'n jalatinee'n.✝ 17 Duuchchi Woddike Goottik ardi mufeti miidhemaqashsha assiteexxi telchi qico'ninna no'o daaffa'n hexxeexi Fegorixxi cubbo hanqatammaletee? 18 Techcho ha'no Duuchchi Woddika Gootta hordofa gibbinee jallatinoole.

« ‹Soodo isi Isira'eelike arda duuchcha'n mufataan. 19 Ta'a kinni bogi ha'nooki batto'oole Duuchchi Woddika Gootta Magenoonfantaabi hedheeke Duuchchi Woddiki Gootti galaake bogiba'a fooffe; malee'e wele tolchika booncho ijaritinee Duuchchi Woddike Gootta'n yookaan no'on jallitinoqqe'e. 20 Zaarahiki belti Akaani, balleesse bira hassisammaxxa yaane balleesse biragophiyoti ajaja sa'e wodda Duuchchi Woddiki Gootti mufate'e Isira'eelike arda duuchcha ganebaa? Akaani calla balleessa isixxe ganebaan.› »

21 Roobelik, Gaadikinna Minaaseke miniki gamisi ardi Isira'eelixxe gosake minike aanchi aanchi ardike akeekisanjuwwa'n hiyye hiissee qici, 22 «Lumoki Mageni, Isi duuchchingike Goottan! Isi lumoke Mageno Duuchchi Woddike Goottan! No'o maaye'e tenne assinennexxa Isi'i ege'ne'en; ha'noona no'o maye'e assinennexxa egendino'a eenaannen. Duuchchi Woddike Gootta'n jalline'e seera isika sa'noonnole no'o shiwwe. 23 Konnee tolchimalcho giisiinennechchi Duuchchi Woddike Gootta'n jalline'e ciincatika tolcha, midhatika tolcha yookaan mittoominka tolcha iti tolchinona'a hine'e kaddoole Duuchchi Woddiki Gootti no'o uudowwaal.

24 «No'o giissineechchi tene'aate kaddebaaki dagaake baro'n hanooxxi horte no'oxxa oose ‹ha'no Duuchchi Woddike Gootta Isira'eelike Mageninni maa mittumma alfine? 25 Duuchchi Woddik Gootti no'onna ha'noo Roobelikanna, Gaadika ardi mittumma anfabe'noshsha Yordaanoosika galaana oddo no'oxxe'n gabala ugge'en; tennexxe duuchchi Woddike Goottinni mittumma afinebaan› hina'ni hinee sodaantennexxe callaaten. Konne qicinn horte ha'nooxxi oose no'oxxi Duuchchi Woddika Gootta Magenoonfantabaashsha hoyyitaaxxe hexxen.

26 «Tennexxe no'o ‹giissinennek tolchimalchi ciinco'aka yookaan wele tolcha itti tolchinona'atebaan› 27 Wele darree'ni ciinco'aka tolcha no'oka, wele uwwa no'oxxanna mittomiinka no'oka tolcha aa'nennexxi Woyyichcha booncho'ni Duuchchi Woddika Gootta magenoonfantaanoshsha tolchimalchi no'oxxenna ha'nooxxe oddo'ni iittanni daggaaxxe ila duuchchi'a dhugaa kulatee kadaan. Tennexxe edi'a ha'nooxxi horte no'oxxa horte ‹Duuchchi Woddike Goottinn darree'ni geego affinebaan› hiyya dandeenabaan.

28 «Akimagaada no'onna, ‹Edi'a no'onna kadi horte no'oxxa iitta hina'noole kunse edik annuwwi no'ok giissemmaxxa Duuchchi Woddike Gootika tolchimalchik fakkeenna uudde; tinni no'oxxenna ha'nooxxe oddo'ni dhugaa kulatee kaddaashshate malee ciincatika tolchanna wele tolcha tolchateetebaan hine'e kullannon› » hinennen. 29 «No'o Duuchchi Woddike Gootta'n jallantebe'non; ciinicatika tolcha yookaan wele midhatika tolcha yookaan wele tolcha shiqilshatee hende'e wele tolchimalcho giissati Duuchchi Woddika Gootta magenoonfata waalebeno. Galdumiinke duunkaan edo uurraake Duuchchi Woddike Gootta no'oke Mageni'a giissemeeke wele gargar hedheeka tolchimalcho giissedha no'onaa'ni hanqatto!» Hine.

30 Qeesichchi Finihaasinna isinni welt ardi erige'na'a dagemaki Isira'eelixxe gosaki mini aanchiinke ardiki sooresuwwi Roobelik Gaadikinna Minaaseke miniki gamisi ardi hiyye haaso'exxa lanqe wodda yo'osha gamande 31 Tennexxee Ali'aazaarik belt qeesichchi Finihaasi Roobelika, Gaadikanna Minaaseka arda, «Ha'noo Duuchchi Woddike Gootta'n jallitineebaan; tennexxe Duuchchi Woddiki Gootti no'oni welt hedheexxa egeneeneni; Isinna mufate Isira'eelika arda ganabaashsha assitineen» hiyye.

32 Ookkoneechchi uduma qeesichcho Ali'aazaarik belti Finihaasinna iikki akeekisanjuwwi Gele'adi hedhemmake Roobelikenna Gaadike ardibaa'n Kenaani boga'n hedhemmake Isira'eelike ardibaa hinge dangeexxi kaddeexxa yaane duuchcha Isira'eelike arda'n kulle. 33 Isira'eeliki ardinna laqeexxe yaane duuchchi'a gammadeexxi Mageno galateeffate. Ookkoneechchi uduma Isira'eeliki ardi Roobelikanna Gaadike ardika boga lole'e balleessatixxa yaane mari'e waale.

34 Roobelikinna Gaadik ardi kunni tolchimalchi Duuchchi Woddik Gootti calli isi Magenoke kadeexxa no'o duuchchiinge'e dhugaa kulaten hine. Tennenaa'n kexxeexxa tolchimalchinka summa: Dhuugaa kulatee hine fulchine.