1 Duuchchii woddik Gootti Isira'eelika arda Iyyarkoka qachchanna isi giddo hedheechcho duuchcha biri hiyyemmaka ajaja muuxebaani. Yihudake gosati mininaa'ni Zaarahike menenaa'ni Akaani hiyyemaak Kermik belti, Zebidiki akka'i, Mageniinka ajaja sa'e hoyyemmachcho ifi'a adhdheexxe Mageni Isira'eelike arda'ni mufate.

2 Iyyasu «Iyyaariko hedhe Ayi hiyyemaake qachcha dooyyo'a shiixxo manna erge» Ayiki qachchi Beeti'eelii'ni boroti darre'ni hedheeke kadaa wodda Beeti'awwe hinaake qachchi'a shiqotemmani. Mannikinna Iyyaasu ajaja muuxe; 3 Ookoneechchi uduma manni Iyyaasubaa «Ayik qachchi shiixkooke kadeemmaxxee isoo loliyotee lami yookaani sasi kumi manni calli duulo malee'e duuchchiinga manna ergitoxxeni» hiyye. 4 Tennexxe sase kumaa kadaaki Isira'eeliki ardi duuleexxi Ayika qachcha lole: yaane kinni Ayiki loliinki manni edii'ni baqate. 5 Ayik manninna Isira'eelika loliinka manna qachchiinxe hulanaa'ni Sheberite henaaxxe gooddo qico'ni shorra'ni shiya'ni soddomanna jaane manna bire. Isira'eeliki ardinna lumoshsha sodaate.

6 Eettene yanna'n Iyyaasunna Isira'eeliki akeekisanjuwwi yaandemmaxxee seemma ifi fixxa daddarre umoke'ni buko fiffinxe: Duuchchi Woddike Goottike taabooti edo wabbi hine galgali qico'ni turre. 7 Iyyaasunna soodata'ni «Dada duuchchike Duuchchi Woddike Goottaa! Konnee arda Yordaanoosi mayeeta foossitette? Amoorik ardi no'o biro'a sa'isite uutottaatte? Mayee Yordaanoosi'i foofebe'nongi widonni gatisa gophphette? 8 Anke Gootta Isira'eeli naaphi edii'ni baqateeni ani maata hiyyano? 9 Kenaanitotinna weli ookkone bogiki ardi duuchchi tenne yaane laqaan; tennexxee no'o'ni duule no'o biraaxxe hexxen; bogake'n hedhabaashsha assinan yoona lumooke summi'a hite assitattexxi machcho?»

10 Duuchchi Woddik Gootti Iyyaasuu'u hiyyee qici «ke'i! Mayee wabbi hiteette? 11 Isira'eeliki ardi balleesineeni: ajajenaka anka seera heqqedhebaani, hoyyemeechcho ifi'a adhdhe ifixe karranni welt massedheeen. 12 Tennexxee Isira'eeli naapha iseka lolde injifata gophpheeki ise umi isengeeninni baxxaashsha murte saxxemmaxxee naaphi iseki edi'n baaja malee uurite loldabaan. Baleese hiyye ajajeennachcho odo insa'nexxenaa'n balleesinaaxxee ani insa'neni welt hedhabo'non.

13 «Ke'i! Marte arda qulloonsite hitatto qici, ‹Tee Isira'eel, farrate kaddeexxi yaane ha'nooxxe oddo'ni hexxemmaxxee tenne farra ifii mii'ni fulchedha gophphinoole naapha ha'nooka injifata dande'a gophphinaaxxa Isira'eelik Duuchchi Woddik Gootti Magen haaso'emmaxxee soodi'a ifi qophpheesate'e biso ha'nooka qulloonse.

14 « ‹Tennexxe sodo gorsa ardi gosa gosanni shiqowaali; Mageni kulaaxxi gosa mini minini shiqowaali; Mageni kulaaxxe gosaki mini ifi ifike mini hadinni shiqowaali Mgeni kulaake mini hadiki manni qofi qofinni shiqowwaali; 15 Farra iyyedagaachchi afemeeki manji Duuchchi Woddik Gootti aagemmaxxa kako sa'iyyoti Isira'eelike arda'n salphinne iyyedageemmaaxxee isoo. Isika mini hadona horateechcho duuchcha gunbowaali.› » 16 Langa baro gorsa Iyyaasu Isira'eelika arda gosa gosanni shiqishe; ookkoneechchi uduma Duuchchi Woddiki Gootti balleessa Yihudake gosati mine'n hexxeexxa leellishe; 17 Iyyaasu Yihudiinxe gosaka arda shiqishe; ookkoneechchi uduma Duuchchi Woddiki Gootti balleessa Zaarahiik min qofinni foyeme; Zarahimenek mini hado mini minik shiqishe; Zaabidika mini hado qofitinni fule. Yihudanna shiqishee'naa Duuchchi Wooddiki Gootti foye. 18 Zaabidinemika mini hadonna duuchchiinga shiqishee'naa Duuchchi Woddiki Gootti balleessa; Zaabidike akka'o'ni Kermike belto'n Akaani'n hexxeexxa lelishe.

19 Iyyaasunna Akaani'i «belto anike! Duuchchi Woddika Gootta Isira'eelika Mageno ulfeesitee aadde aagi; hujjettexxa yaane shoxxebexxongi ane'n kuli hiyye» hiyye.

20 Akaaninna hiyyee qici, «Dhuuganidinn Duuchchi Woddika Gootta Isira'eelikaa Mageno balleesseennek anten; balleessa anxinna 21 Boojineenneke miyi giddo yo'oshsha biiffa'neexxa iimmii'ni butta geltaxxa Babiloonike mannixxa seemma, 2 kiiloo qico kadaaka birretika sibiljonna kiilotika gamisa kaddaaxxa worqe afe'e yo'oshsha gaabbennexxe'e aadhdheenne. Konneechchuwwanna anke duunkaani giddo birretika sibiljo hunda gatise'e worqe hana ugge'e moogennen.»

22 Ookkoneechchi uduma Iyyaasu manna ergee'naa insa'nenna duunkaanetibaa gongine marre; ookko farrate kadeeka miyuwwa birretika sibiljo hunda gatise'e moogee'na anfe. 23 Insa'nena duunkaane giddii'ni fulichineexxi Iyyaasunna Isira'eeliki ardi heedhebaa iyyedangeexxi Duuchchi Woddike Gootti edo uggine.

24 Iyyaasunna Isira'eelike ardi duuchchi welt Zaarahika belto Akaani'i aa'neexxi birretika sibiljo, iimi'n butta geeltaammaxxa seemmanna worqe Akaanixxe labbaxxenna meyyaxxe oosenni welti qotiyuwwa harruwwanna gedhebuwwa isika ittanni dunkaananna miya isika duuchcha bukki assine'e Akoorixxe dhooqaba iyyedage 25 Iyyaasunna, «Ati tenne rakko duuchcha no'o'n iyyedageten Duuchchi Woddik Gootti techcho eetteneeni rakko ate'n iyyeedageen» hiyye. Ookkoneechchi uduma Isira'eeliki ardi Akanii'i kinjiiki cancaqe shiye. Isika mini haddonna kinjiki cancanqeexxi miya isika duuchcha giirati gunbe 26 Akaani'ni telchi qco'n heexxeexxa lumoxxa kinotixxa tuullo tuule. Ookkoneechchi uduma Duuchchi Woddik Goottinna mufe waale. Tennexxee eettene bakkak summi Akoorixxe dhooqa hiyyeme.*