1 Duuchchii woddik Gootti erganji Muuse reye uduma Duuchchi Woddik Gootti Muuseka erganjo Neeweka belto Iyyaasuu'u hiyyee qici, 2 «Erganji anki Muuse reyedheen; atinna Isira'eelik ardi duuchchi kexxine ani ha'noo Isira'eelike ardi'aa uwwaanneke boga'ni e'yitino'aa Yordaanoosika Galaana foofattee qixxeefatte. 3 Muuse'ni uwwenexxe addachiishanni ha'nooxxi lekka haxxaa booncho duuchcha ha'no'aa uwwannon. 4 Ha'nooke bogixxi gabala qiilla gammoojjenaa'n Libaanoosi qico'ni, lumoka galaani Efiraaxisinaa'n Hiititotika boga duuchcha abideexxi dhidhimi darree'ni lumoxxe abbaayya qico geltaan. 5 Hedhoti hexxeteke barro duuchcha'n ayyinna atee dande'aaba; Muusenni welti hedhennashshanni atinninna welt hedhannon; haranga atee waalabe'non; ate dedhabe'non.✝✝

6 «Edike insa'neke annuwwi'a uwwonaa kakateennaka boga dhaallashsha konne arda akeekkaa'etek atete kaddeettaxxee jabaati, worbi.✝ 7 Atinni calli jabaati worbi anki garbichchi Muuse ate'ni uwweemmaka ajajuwwa duuchcha xexe'achchoti heqqedhi; me'itatoke booncho duuchcha'ni ati'a qajeldaashsha konne seerinaa'n middi bitta'i'anna higgoxxe. 8 Kunni seeriink maxaafi atike afo'inaa'ni qo'oqqe'e; isi giddo borreessemeechcho duuchcha xexxe'achchoti heqqexxattoshsha iso'o alalchi; tenne assitottole heddettexxi ati'a wo'mitaan, qajeldaan. 9 Martatoba duuchcha'n Duuchchi Woddik Gootti atik Mageni atinni welti hedhaammaxxee mee co'oo jabaati, ti'ni hiyyi, alaltoxxe culphisoxxe» hiyye atee ajajeenabaata?

10 Iyyaasunna ardiinka sooreesuwwa hiyyeexxi ajajee qici, 11 «Kaanbe giddi'aa e'yitineexxi ardake'n hitinaa qici, ‹Gala'atanna qixxeeffatte; ta'anaa'n saffinne sase barra giddo Yordaanoosii'i fooffinaan; Duuchchi Woddik Gootti ha'nook Mageni ha'no'aa uwwaaka qadaada dhaaldinaan› hiyyi» hiyye.

12 Iyyaasunna Roobeelika Gaadikanna gamisa Minaaseka gosati minika arda hiyyee qici, 13 «Duuchchii woddik Gootti ha'nook Mageni ‹Konne boga ha'no'aa uwweexxi ha'noo hafuura adhdhisaan› hiyyeexxi erganji Muuse Ookkonne boga ha'no'aa uwwanno hiyya'ni ha'noo ajajeemmaka ookkonne ajaja qalli hiyyee. 14 Aruwwa ha'nooxxinna oose ha'nooxxi, iittanni hori ha'nooki Muuse ha'no'aa uwweeke Yordaanoosi'ni dhidhimii darreke boga'ni ookkoo he'nowwaali; yaane kinni ha'nook loliink manni duuchchi lolake'e ka'lineemmake miyininni ha'nooke dayyuwwi'a edinse foonfowwaal. Ha'noonna ha'nooke dayyuwwa'ni aandine'e fooffe; insa'nenne gargaarre. 15 Duuchchii woddik Gootti ha'noo ti'ni asseemmashshanni dayyuwwa ha'nooka ti'ni assaa qico'ni insa'nenna kinni Duuchchi Woddik Gootti ha'nook Mageni insa'ne'aa uwwaaka boga dhaala qico'niten. Ookkoneechchi uduma ha'noonna higgineexxi Duuchchi woddike Goottiki erganji arishsho fuldaamma darre'ni Muuse ha'no'aa uwweeka Yordaanoosinaa'n boroti darre'n hedheeka boga dhaaldinaan» hiyye.✝

16 Inisa'nenna Iyyaasu'n hineexxi hiisinee qici «Ati no'o'aa ajajeettexxa duuchcha assinannon; no'oo eriggitattobaa duuchcha marrannon. 17 Muuse'a duuchchiinxenni ajajemmeenneshsha ati'aanna ajejemmannon; Duuchchi Woddik Gootti atik Magni calli Muusenni hedhemmashsha ta'anna atinninna welt hedhuun. 18 Atike ajaja'n jallataakinna atike hiyyichchi'a ajajemabaak duuchchi shiyemowwaal; atinni calli worbi, meeco'o jabaati!»