1 Muusenna Mo'aabike diidanaa'n ke'exxi Naabawwuxxa kooba da'me: Iyyaarikoo'ni middi darre'ni hedheeke Feesiga hinaaxxe koobaka boga duuchcha leellishe: Ookko'ni Duuchchi woddiki Gootti iso'o boga duuchcha mareme'e to'ataashsha asse: tinninna Gele'aadike boganaa'n ke'isseexxi middi darre'ni hedheeke Daanike qachchi qicco'ni, 2 Nefitaalemika boga madada; Efireemikanna Minaaseka boga; boroti darrenaa'n Meediteraanyaantixxe abbaayaxxe gabala qico'n hedheeka Yihudika boga duuchcha; 3 Negeebikanna meedawutik, Iyyarkoxx wolo'onaa'n meexxeti qachcha hina'neexxe Iyyaarikoxxe wolo'onaa'ni, Zo'aari qicco'ni hedheeka boga duuchcha leellishe. 4 Duuchchi woddiki Gootti Muuse'e, «Sanne insa'neexxe uwwonnaa Abirihaami'a Yissaaqi'a Ya'iqoobi'a uwwano hiyye ofo'o sa'eennake bogi konneten: Yoona illeti uuddattoshsha asseennen: ookko mara kinn ati'a hasissabaan» hiyye.✝

5 Tennexxee Duuchchi woddike Goottik ergamj Muuse Mo'aabike boga'n hedhemma wodda Duuchchi woddiki Gootti haaso'emmashshanni ookkonni lummedhe. 6 Duuchchi woddiki Goottinna Beetipe'orike qachchi edo Mo'aabike boga'n hexxeexxe wolo'o'n moogeen: yaane kinn telchii qico'ni isi moogemee boonchonga kokate uude ege'naak ayyina hedhebaan. 7 Muuse lummedhee wodda wogga isixxi dhibbanna lame tommemman: yaane kinni ille kookootteemmabaakenna; uduudakanna jaba manjommani. 8 Isira'eeliki ardi kora hunnaaxxi barra saxxaaqico'n sase tomme barra Muuse'a yaanda'n Mo'aabik diida'n oo'neeni.

9 Muusenna anga ifixxa Neweke belto Iyyaasu'ni hana uggeemmaxxe'e Neneweki belti Iyyaasu beekumiink hafuuri iso'ni wo'me; Isira'eelik ardinna Iyyaasu'a ajajeme. Duuchchi Woddiki Gootti Muuse ajajeemmaxxa duuchcha ardi asse.

10 Duuchchi woddiki Gootti alba ifik edo haasosseeke Muuseshsha hedheeka wabeek ookkonechchinni kayya Isira'eeli giddo afemeba'a.✝ 11 Duuchchi Woddik Gootti Muuse'e ergee'naa eettene manbe'iinxa yaanuwwanna beessisuwwa duuchcha Gibtseke boga'n Feri'ooninna jalqabuwwi edo tennee duuchcha asso'a ergeemmaxxa erga muummeeseek isishsha hedheek wabeekichch ijje hedhebaan. 12 Muuse Isira'eelike ardi duuchchi edo assemmaxxee jabaxxanna sodaachchissaaxxa yaanuwwa duuchchanna asseeki weli wabeekichchi ijje hedhebaan.