1 Yordanosi'i fooffine'e ha'no dhaaldinaaka boga heqqitinaashsha ha'no barsisonna'a Duuchchi woddiki Gootti ha'nook Mageni ane'ni uwwe'eki ajaji, seerinna aada konneeran. 2 Kunninna konne'e ha'no'aa uwwaannexxa aadanna ajaja isika duuchcha heqqexxine wogga ha'nooxxi qeerrexxaashsha, ati, atixxi oosenna insa'nexxe oosexxi oose hedhoti hexxineeke baro duuchcha'ni Duuchchi woddika Gootta ha'noka Mageno sodaattinnaashshaten. 3 Koo Isira'eelike arda laqqee! Edike annuwwi ha'nookik Duuchchi Woddike Goottik Mageni ha'noo addachiiseemmashshanni elokenna shamake boga'ni eloxxi ati'a kaddaashshanna horte bira saxxotta'a ajaja isika xexxe'achchoti heqqedhi.

4 Koo Isira'eelike ardaa laqi! Duuchchi woddiki Gooti no'oki Mageni mitte Magenon. 5 Duuchchi Woddika Gootta atika Mageno mitte godobin, shenitte hedhonni, shenitte hunnanni eeyi. 6 Telcho ati'a uwwaanneka konnee ajajuwwa godoba galchedhi. 7 Atixxe oose'ninna barsiisi: mine atike'ni ofoldato woddanna: ora me'itatto wodda; diiphphatto woddanna kexxatto wodda konne ajajuwwixxe'e jabeesite barisiis. 8 Atixxe anga'ninna beessisiinsha konnee ajajuwwa usu'dhdhi; kallachake'ni uggudhdhi. 9 Mine atikixxe gubane'ninna dalla'iinxe huluwa'ni konne ajajuwwa borreesi.

10 Duuchchi woddiki Gootti atik Mageni ati'a uwwo'a edika annuwwa atike'e Abiraami'a, Yisaaqi'anna Ya'iqoobi'a kako aageemmake boga'ni ate'e e'yishaa wodda ookko'o ati ijaartebexxoka lumollakanna elolla qachchuwwa,✝ 11 Atike kadebaaka elolla yaane duuchchinni wo'meeka minuwwa uuddeebexxoxxa wode'iinxa baluwwa, kaassebexxoka woyinetika hiddichchuwwanna ejersiinka haqichchuwwa ati'a uwweena'a itte godditatto wodda, 12 garbu hexxaattak Gibtseke boganaa'n ate'e fulcheeka Duuchchi Woddika Gootta deetabexxoshsha ifi heqqedhi. 13 Duuchchi Woddika Gootta atika Mageno sodaati: isi calli'aanna ergatemi; summi isikinni kakati.✝ 14 Qarqara atike'ni hedheeki ardi magenooffata'neeka wele magenuwwa hordoffoxxe'e; 15 oddo atixxe'ni hedheeki Duuchchi Woddiki Gootti atik Mageni hinaatticha Mageno kadeemmaxxe'e ate'ni mufe isixxi ha'itaammaxxe'e bogi iimii'ni atee balleessoqqe; 16 Maasahi'n hiyyemaammake booncho'n hega uuddinemmashsha Duuchchi woddika Gootta ha'nooka Mageno hega uudinoqen;✝ 17 Duuchchi Woddik Gootti ha'nok Mageni ha'no'a uwweemmaka ajajuwwa, akeettuwwanna aaduwwa xonxoommachchoti heqqedhdhe. 18 Eloxxi ati'a kaddashshanna Duuchchi Woddiki Gootti edike annuwwa atike'e uwwo'a kakate'e addachchiiseemmaka ookkone'e eloka boga e'yite dhaaldota'a Duuchchi Woddike Gootti edo qajeelanna eloxxa yaane assi, 19 Duuchchi Woddik Gootti haaso'emmashshanni naapha atika duuchcha ifi edii'ni shorritatton.

20 Dagaake baro'ni belti atiki «Duuchchi Woddik Gootti ho'nook Mageni ha'noo ajajeemmaxxi akeettuwwa, galdumikinna seeruwwixxi tika maachcho?» Hiyye atee'e qoroole, 21 hitato qici; «No'o Gibtse boga'ni Feri'oonike garbuwwamman: Duuchchi Woddik Gootti kinni jabaxxe hirre ifixxenni Gibtsee'ni ho'oo fulcheen. 22 No'o ille no'oxxinni uundaa'naa Duuchchi Woddik Gootti lumollammanna sodaachchisaaka, mambe'uwwa beessisuwwakanna maso yaanuwwa Gibtse'ni, Feri'oonininna mini hado isike duuchcha'ni asse. 23 No'oo kinni edike annuwwa no'okee'e uwwo'a kakate addachchiseemmake bogiba'a no'oo e'yisho'anna uwwo'a ookkoo'ni no'oo fulcheen. 24 Telcho kaddeemmashshan duuchchi wodda eloxxi no'o'aa kaddaashsha lubboti he'noo'naa konnee galduma muunxonna'a Duuchchi Woddika Gootta no'oka Mageno sodaantannoshsha Mageni no'oo ajajeen. 25 Yoona konnee seera duuchcha isi no'oo ajaajeemmaxxe qixxe'ni Duuchchi woddiki Gootti no'ok Mageni edo xonixxoommante heqqe'nonnole itti no'o'a qullummate kaddaani.»