1 «Horattetteke heddo lalo, gedhebi, giddii'n Duuchchi woddike Gootta atke Mageni'a tolcha shiqishshato wodda mitte tafa afeeka hore shiqishshoxxe: iitta hexxeexi bushshaxi yaane duuchchi woddike Gootti edo diqatendeexxen.

2 «Duuchchi woddiki Gootti atiki Mageni ati'a uwwa'nee qachchi giddi'n mitteke'n hedha'neek labbaki yookaan meyyaxi Duuchchi woddike Gooti edo elobaaxxa yaane hujje seera xe'ishshaaxxera hexxeen: 3 Ittan anka seera sa'iyyot wele magenuwwa magenooffateek, konnechchuwwira'anna hiyyo, arishsho, yookaan baate, yookaan urjuwwa'a sagadeek✝ 4 Iitta hexxeexxa odo laqqatto wodda hudhudhdhu assite uudi: yaane kinn iitta hexxeexxa elobaaxxa yaane Isira'eelik ardi hujo'ole; 5 Iitta hexxeexxa yaane huje'eka ookkonee manjichcho labbakenna kado mmeyyaki qachchi giddii'n aaxe fulchite kinjik cancaqqe shiyi. 6 Rewo murendeeke'e lami yookaan sasi manji dhuga fulche kuloole shiyemowwaal: yaane kinn mitti manji calli dhugaa fulche kuloole ikki manjichchi shiyemoqqe.✝ 7 Manjichchi shiyemaa wodda sirete'n dhugaa fulche kuleek manni kino hana ibisowaal: itti aane weli ardinna kinot cancaqowwaal: tenne'e assati iitta hexxeexxa elobaaxa yaane oddo atixenaa'n fugussi.✝

8 «Manjiinxa munde lolaasati, buttii'n ke'ne manjo gegge'ati, manjo shiyati; tenne fakkaattaxxe elobaaxxe yaanenni qachchi giddo hexxeexxe weli gonphe'a murtetixxi uwwa atee'e rakkissa'noole Duuchchi woddiki Gootti atik Mageni fi'leeke boonchiba'a marte; 9 Leewwixxe gosanaa'n qeesete kadeexenna ookkone wodda hayyo kadeeke'e yaane tennee kuli: yaanetanna isinni ati'aa murowaal. 10 Atinna Duuchchi woddiki Gootti fila'nee booncho'n hexxe'e uuna'nexxa murte deetoxxe: insa'neeka haaso'anna godobik xonxoommatte heqqedhi: 11 Uuna'neexxe akeette'ninna seerinni duuchchiinxa huji: middi'aanna bita'i'a higga'n mishikki hitoxxe. 12 Hayyichcha yookaan Duuchchi woddike Gootta atike Mageni'a ergatema'eenke Qeesichchi'a ajajema gibe'e iso'ni hincinno'e haaso'a'neeki manji hedhoole iso shinnowwaal. Konne qicinni elobaaxa yaane duuchcha Isira'eelike ard giddii'ni gondoortatton. 13 Ookkonechchi uduma manji duuchchi tenne laqe sodaatan: iitta hexxeexxa elobaaxxa yaane muuxatee'e hujaaki hedhabaan.

14 «Duuchchi woddki Gootti atik Mageni ati'a uwwa'neke bogibaa marte boga dhaalde bootessexxechchi uduma qarqara anike'n hedheeke ardishsha moyanjo fi'lo hitettele.✝ 15 Duuchchi Woddik Gootti atik Mageni ati'aa fileeka mayanjo fi'la dandeettatton: fi'litaatek moyanjinna atixxe sanne giddii'n kaduun, gosa atixxi gadho kadeeka gadhika manjo moossisa hasissabaan. 16 Iikki moyanji ifike sannachuwwi'a heddo fadhado afee'eke kadiyo hasissabaan: Magen ardi Gibtse'aa higabaashsha fadhado hiro'a ajajoqqe'e.✝ 17 Moyanji heddo melaalle aadhoole Duuchchi Woddika Gootta hordofabaashsha kuttammaxxe'e melaale fakkanshoqqe: heddo worqenna sibiljo birre sa'isse ca'moqe.✝ 18 Motumate'n offo'laa wodda konne seerixxa Leewwitotixxi qeesoole ikkille mirqisanjo maxxafa'n ifi'a borreessowwaal. 19 Konnee maxaafa ifi bira abixxeexxi lubboti hedheeke bari qico'ni haaseessowaal: iitta assoole Duuchchi Woddika Gootta isika Mageno ulfeessinaa qicona maxaafi konne giddo borreessemeedheeka seeruwwakanna galdumuwwa xonxoommatatinna addatenshat muunxa'neechcho kadeexxa ege'naan. 20 Isi horte ifixinni Isira'eelika gosa gosaka arda qeerra baro moona'n he'naashsha, Duuchchi Woddike Goottike seeranaa'n iittanna elqenna kayya higoqqe wele dayyuwwa irra ifi lumoke assedhe uudoqqe.