1 Ookkoneechchi uduma Duuchchi Woddiki Gootti anee ajajemmashshanni illee iima hingeen; Eritiriinxe Abbaayyaka ora qiilla gammoojjebaa me'inneen; Seeyirixxe koobatike bogika qarqara qeerraxxa yanna gadaadonneen.✝

2 Ookkoneechchi uduma Duuchchi Woddiki Gootti ane'ni hiyyee qici: 3 «Konne koobatike bogike qarqara'n gadaadoottineen; ta'a kinni middi'a higge. 4 Ardakanna konneechchinni butti'a hedheeka ajajuwwa ajaji; Seeyirike boga'n hedha'neeka ha'nooka dayyuwwa ‹Eesawwuxxe horteke bogi giddii'n saxxine me'itino'aten; insa'nenna ha'noo sodaantaan; kaddoolenna ha'noo jabaxxa xexxe'achcho asse.✝ 5 Seeyirixxi kooba Eesuwu'a geego asse uwweenaxxe'e ani boga insa'nekenaa'ni lekka ha'nooxxenni haxxinaaxxe bakka qicika boga ha'no'a uwwa gonphammaxxee insa'ne'a lolakee tirtistinoqe'e. 6 Ookko ittinaaxxe itanna kadi ha'witinaake wode'e birretike sibljin insa'nee'ni hidhdhitinaan.› » 7 Duuchchi Woddiki Gootti ha'nooki Mageni huccitineexxe ha'noo eebbise'een; tennee qiqilli hiteexxe qiilla gammoojje giddo me'itinee wodda ha'noo heqqeen; tennee shoole tomme wogga Duuchchi Woddik Gootti ha'noonn welti hedhemmaxxee mittichchinna ha'no'aa xe'yeemmabaan.

8 Tennexxee Seeyir hedhaammaka dayyuwwa no'oke Eesawuxxe horteka Edoomika boga sa'ne me'inene; Eelaatinaa'ninna Etsiyoonigabbirii'n dagemmaka Araabike gammoojje orika Mo'aabi'a me'inenne. 9 Ookkoneechchi uduma Duuchchi Woddiki Gootti ane'n hiyyee qici: «Mo'aabitotike boginaa'n hoonee boganna ha'no'aa uwwa gophaannaxxe insa'nee rakkissinoqqe'e. Lolakeenna insa'ee tirtirsitinoqqe'e; Eerii'i Looxixxe horte'a qadaadake kado'a uwweennen.»✝

10 Ookko, jajjabbi laakkoossik bira sa'eek, Enaaqitotishshanna ejjumma qeerrarrammi Eemiimik manni hedha'eemman. 11 Insa'nenna Enaaqitotishshanni Raafayitote hiyyemma'nee ege'nemme'emman; yaane kinni Mo'aabito insa'neeka summa Eemito hine'e ye'na'emman. 12 Hoorito edi wodda Seeyiri'i ha'na'emman; Eesawuxxi horte kinni ookkoo'n insa'nee shorrite fulchite; Duuchchi Woddik Gootti qadaadake kado'a uwweemmake boga'n Isira'eeli assitammashshanni insa'nenna Hoorito shorrineexxi boga insa'neke'n ookko offole.

13 Ookkoneechchi uduma Duuchchi Woddiki Gootti no'oo, «Ta'anni kexxine'e Zaareddika galaana fooffe» hiyye; no'onna Zerdixxa oyyo foonfenne. 14 Qaadeesi Berne'e waalle fullenexxe yannanaa'n Zaareddika galaana foonfanno qico'n sase tommenna saddeeta wogga mudde. Eettenee yanna lolakee geyeek eettene ilak labballi duuchchi, Duuchchi Woddik Gootti insa'ne'n ediseexxi kakatemmashshanni kaanbe giddii'n munde. 15 Kutti asse'e kanbe giddii'n insa'enee bira qico'n Duuchchi Woddike Goottixxi anga insa'nenaa'n illee iima higgeemmabaan.

16 Ardi giddo hedhaammak loliink manni duuchchi reyeechchi uduma, 17 Duuchchi Woddiki Gootti anee hiyyee qici, 18 «Mo'aabike bogixxa gabala Eeri qachchi giddii'n saxxine me'itinaan. 19 Rakkissinoqqe'e; lolakeenna insa'nee tirtirsitinoqqe'e; ookkone boga Looxixxe horte'a qadaadake kado'a uwweennen.»

20 Tinni kabanna ookko hexxemmaxxe Raafayitotike boga hiyyeme ege'nemme'eman; yaane kinni Amoonito insa'neka summa Zemzumito hinee ye'na'emman. 21 Zemizumito jajjabba, laakkoossik birasa'neekenna Enaaqitotishshanni ejjuma qeerrarrammakeman; Duuchchi Woddik Goottinna Amoonito bire; Insa'nenna Amonito shorineexxi eettene insa'nexxe bakka'n ofolle. 22 Duuchchi Woddik Gootti Eesawuxxe horte edii'n Hoorito bire wodda Seeyiri giddo hexxeemmaxxe isixxe horte'a assema qicishsha insa'ne Hoorito shorrine fulchineemmake boga'n techchi qico'n offollaashsha asse'een. 23 Gaaza qico'n hedheeke olla'uwwi giddo hexxaammaxxa Eewito uuddaxxenni: Keftoori'n fulde daggeexxa Keftoorito Eewito birteexxi insa'neeke boga'n offolde.

24 «Ta'anni kexxineexxi Arinoonixxa oyyo fooffe; Amoorichcho Haseebonika moyanjo Sewooniinna boga isika ha'nooxxe anga'n sa'isse uwweennen; isika boganna dhaalate'n ke'we; isoonna lolle. 25 Iimati buttaa hedheeke gosa gosake arda duuchcha'n ha'nooxxi alalshanna sodaachchisa galdaashsha assiyyo tenne telchixxe barra'n safano; insa'nenna odo ha'nooxxa lanqeexxi sodante chulphinssan.»

26 Qideemootixxe qiilla gammoojjenaa'n Haseebonke moyanjo Sewooni'n nage'a geessisaashsha erganjuwwa hiyye ergee qici, 27 «Atike bogi giddii'n sa'na'nnoshsha eeti no'aa uwwi; oragenaa'n middi bita'i'a gorraabe'non. 28 Indannoxxa itanna ha'winannoka wode'e birretike sibljinni hidhdhinannon. Lekka callinni sa'nonna'a eeti no'aa uwwi. 29 Seeyiri giddo hexxaammaxxi Eesawuxxi hortenna Eeri giddo hexxaammaxxi Mo'aabito no'aa assinemmashshanni atinna Duuchchi Woddik Gootti no'ok Mageni no'aa uwwa'neeke boga'n e'yatee Yordaanoosika galaana foofinaa qico'n eetii no'aa uwwi.»

30 Yaane kinni Haseeboniki moyanji Sewooni eetii uwwebaan; tinni kaddeechchi Duuchchi Woddik Gootti ha'nook Mageni ta'a assemmashshann iso'o sa'isse ha'nooxxe anga'n uwwo'a haseemmaxxe godoba isika jabeesseexxi ifinna dukaashsha asse'eman. 31 Duuchchi Woddiki Gootti anee, «Kunse Sewooninna boga isika ha'no'n sa'isse uwwo'a ke'een; ta'anna isoo injifattineexxi boga isika dhaaldino'a ke'we.»

32 Sewooninna isik loliink manni duuchchi Yahaatsike lollo'a fullee wodda, 33 Duuchchi Woddiki Gootti no'ok Mageni isoo anga no'oxxe'n sa'isse uwwe; no'onna isoo isixxa labbaxxa oosenna isika loliinka manna duuchcha mittenba birrenne. 34 Eettene yanna qachchuwwa isika duuchcha adhdhinennexxi giddo hedhaammaka labballo mellaalle oose insa'neexxenninni mitteba birrenne; mittekanna gatinsebe'no. 35 Hore insa'neekanna qachchuwwa insa'nekenaa'n aa'nennexxa booji'o kinni ifi'a adhdhinennen. 36 Arinoonixxe dhooqake kasa'n hedheeka Aro'eelika qachchanna dhooqa giddike qachchanaa'n Gele'adi qico'n hedheeke qachchuwwinaa'n mittikinna midde no'oo dande'e hoyyeba'a; Duuchchi Woddik Gootti no'ok Mageni duuchchiinga no'o'n sa'isse uwwe. 37 Kaddo malee'e Duuchchi Woddik Gootti no'ok Magen no'oo ajajemmashsha Amoonitotike hoone bogibaa yookaan Yaaboqi galaan ya'ammabaa hedheeke boga'n yookaan tullichuwwake'n hedheeka qachchuwwa dootine me'itinebaan.