1 Lami manji loleme ku'late'e murittetixxe songobaa dangoole miicemeeka tola; mice'eka kinn balleesanjo assine murrowaal, 2 Ookkonechchi uduma balleessanjo kutiki kulchiisa; yookaan godobiki diiphisse'e duddoro kutik kulchiisaashsha murrichi ajajowwaal: kulchiisa'neekinna murrichchi hedheeba me'e ganema'ni murrema'neek balleessa isixxishshanden. 3 Shoole tommi kulchiisa dandeennaan: shoole tomme sa'a hasissabaan: ookkonechchi iima kulchiissitotol gode atixxa salphissette hiyyoten.✝

4 Midha huccitatto wodda qotiyo afo'o habooqqoxxe.

5 Dayyuwi mitteba hedhee'na'a insa'nee giddii'n mitti labbaka i'lebaang rewoole, reyemmakixxi are isike fir giddo marte heeruma hasissabaan; ookkone reyemmakiki dayi ise'e dhaale galchowaal wosiilummatika seeranna muuxowwaal. 6 Iitta hexxeexe yaane kadda wodda edise ilemeeki labbaki belti reyeemmake manjichchike summinni ye'emowwaal: konne qicin Isira'eelixxe gosa'n reyeeke manjichchixxi booso baxxabaan.✝

7 Yaane kinn reyeeke manjichchik dayyi isee'e aadhate'e hoodoole qachchiinke sooreessiba marte'e «Anke aro'ik dayyi ane'e aadha haseebaan: herelchi Isira'eelike ardixxe oddo'n sanne sa'issate'e hasebaan» hite kuldowwaal: 8 Okkonechchi uduma qachchi giddo hedheek sooreessuwwi manjichcho ye'ne haaseesse'nowwaal: ta'anna isee'e aadha gophanoole. 9 Reyemmake manjichchixxi are qachchiinke sooreessuwwi edo isiba'a shiqqowwaal: mitte lekkaka kophe isonaa'n fulchiteexxi albake'n hancufa tuffe «Dayyo ifike'e sanne wobbisabo'non hiyyaake manji'a iitta hexxeexxa shookissaaxxa yaane muuxa hasissaan» hitowwaal. 10 Okkone manjichchike mini hadixxi horte Isira'eelike ardi edo kophe lekkatenaa'n ibbe'eke manjike mini hado hine cee'mina'naa ye'ema'ni hedhaan.✝

11 Lami manni lolemeex weli gooba hudhaa wodda mittiinxi are aro'o ifikee baassite weli labballiinka biso dhaphphi assite abiddoole; 12 Mitte mararte belo anga isexxa kuntowaal.

13,14 Kiilot yookaan mike egenebaak miyuwwinni elqe kayya ganda'n manjo sobboxxe. 15 Duuchchi woddiki Gootti atiki Mageni uwwa'neeke boga'n qeerra baro hexxotaa fayyakanna addatendeexa kiilonna mike ege'neeka miya calla la'oonfat: 16 Duuchchi woddiki Gootti atiki Mageni iitta soba'n elobaaxe xaqaro huja'neeka manna duuchcha eeyabaan.✝

17 Ati Gibtsee'ni fuldette wodda Amaalqitoti manni hunjeexxa huje deetoxxe'e. 18 Insa'ne Mageno sodaata'neeke mannabaan: ati me'ita'n gophphe luggitette wodda uduma gateemmaka duuchcha shinnee birreen: 19 Tennexxee Duuchchi woddik Gootti atiki Mageni boga ati'a uwweeke qarqarake'ni hedheemmake atike naaphuwwa duuchchinaa'ni ate'e gargaaraa wodda buttate'n ayyinna insa'nee haba gante hiyyaak hedhabaa qicin Amaaleeqika manna duuchcha bululoke asseen! Atinni tenne'e ijje deetoxxe!✝