1 Mageniinki erganji Muuse lummedhebaang ediga'ma Isira'eelike ardi'a uwweek hancufi konneechchinni butti'a hedheen;

2 Muusenna hiyyee qici:

«Duuchchi woddiki Gootti Siinaxxe koobanaa'n dageen:

Edoomii'n soodimarixxe arishshoshsha ifa uwween:

Faaraanixxe koobanaa'n insa'ne'a ifise:

Isinna laakkonne dhaqqanbabaaxxe woyyoole isixxinn welti;

middi ga'manaa'n giiratik bubenji hedhemman.

3 Duuchchi woddik Gootti dhugaandinni arda isika eeya'neen:

woyyoolle isixxa duuchcha heqqaan:

Insa'nenna lekka isixxi hunda guluffante heeshshi qokki hinani;

atika ajajanna lanqaan:

4 Isira'eelike ardi fichcha kadeeka;

Muuse no'o'a uwweek seera heqqedhaan.

5 Gosa gosake mini ardiink sooresuwwi Isira'eelike ardinni welti hingeexxi;

mitteba bukki hina wodda,

Duuchchi Woddik Gootti Isira'eelika arda Yishuuri'i moyee galcha'nemman» hiyye.

6 Muuse Roobelixxe gosake mini hadixxee hiyyee qici,

«Fedhee qiconna midde Roobeelixxe gosake miniki laakkoossi heeno'moolenna

ballo Roobelixxe gosaki mini hadi hedhot hedhdhowwaal, reyoqqe» hiyye.

7 Yihudaxxe hiyyee qici,

«Duuchchi Woddike Gootta Yihudaxxa soodachcho laqi,

isike firba'anna iso'o idag;

anga atixxenni isi'a faachcheeffata;

maganneten naaphik lolemaaxxa yanna iso'o gargaari» hiyye.

8 Isinna Leewixxe hiyyee qici:

«Tumiimi atixxinna Uuriimi atixxi,

Leewwi'i Mageniinke manjixxe kaddowwaal;

Maasahi hiyyemma booncho'n iso hega uudete;

Mariibike wodi'i biranna isinn welti morondette.✝

9 Isi atixxee hiyyeexxi anniinxeenna ama ifikixxee haaso'aa wodda;

‹Ani insa'nexxe'e ege'nennechchi hedheban› hiyye.

Ani dayyuwwa isika fowabo'non;

oose isixxanna waale'en.

Hiyyichcho atikee ayyete ajajeme;

kako atixxanna heqqedhe.

10 Galduma atika Ya'iqoobi'a;

seerakanna Isira'eelk ardi'a barsisaan:

Ati edo dakkadha gunbaan:

ciinceessinaaka tolchanna

tolchisanjoke'n idangaan.

11 Duuchchi woddike Goottaa! Hunna isixxa duuchhca eebbis;

isixxe angaxxe huje'ninna gamad;

Iso'n ke'aakara hunna gophisi

naapha isikanna langaxxa nammi hiyyabaashsha assi» hiyye.

12 Biiniyaamixxe gosake mini hadixxe'e:

«Duuchchi woddik Gootti iso'o jaallateek soda'a belo nage'ik hedhowwaal:

hunnaameessi Mageni barra duuchcha isoo heqqaan.

Duuchchi woddike Goottixxe anga hunda gollifatee hedhaan» hiyye.

13 Yooseefixxe gosake mini hadixxe'e hiyyee qici;

«Duuchchi woddiki Gootti iimi'n gana'neek xeeninnii;

butta dhi'moti hunda hedheeke wedi'in;

boga insa'neeka eebbisowwaal.

14 Arishshoti raxxaaxxi eloxxi gumma hexxuun,

baatetinna maye maye'n aagaxxa midha ibissuun.

15 Ittani qara he'nemmaxxe koobuwwa insa'neexxenni

gooruwwat gadho gatteexxi bakka duuchcha midhati calq hitowaal:

16 Bogi insa'nek duuchchi elolla yaanenni wo'mowwaal:

giira ittee'naa buba'neeke ko'molchi giddo leelleeke Duuchchi Woddike Goottik badhaadhi isi'a bira sa'owwaal.

Kunni duuchchi dayyuwwi isikixxe oddo'ni galchalloke kadeemmake

Yooseefixxe sammo'ni ugginowaal.

17 Yooseefik gaachchanni sangooletishsha sodaachchisa'neeken:

gaafuwikinna xaaxxiinke gaafisha jabaken:

Isinna arda duuchcha otaan:

bogi iimii'ni shorraan:

Efireemik tomm kumuwwi

Minaase boonchikinna ittan kumaken» hiyye.

18 Isinna Zabilonixxe'e hiyyee qici:

«Koo Zaabilooni hobolot me'itette wodda,

atinna Yisakoori duunkaana atinge'ni hexxe gammadi.

19 Gosa gosatika mine koobat hani'a ye'na

ookonna seeriinka tolcha tolchina.

Insa'ne abbaaya giddixxa birasaxxeexxa durumma

maanchiinsha giddixxa sho'endeexxa karra alfina» hiyye.

20 Isinna Gaadixxe gosake mini hadixxe'e hiyyee qici;

«Gaadika boga ba'liseeka Duuchchi woddiki Gootti lummedhowwaal:

ciqiletanna xiyyo gane dhoosate'e;

Gaadi neenqishsha ookko'o hedhaan.

21 Galchatik qoobbi isixxe anga'n hedheemmaxxe;

ifi'a shaqqak boga fi'leen:

Ardiinxi hayyoole bukki hiteemma wodda

Duuchchi Woddike Goottik yaadinna

seeri Isira'eelike ardi'a muuxeen» hiyye.

22 Isinna Daanixxe gosak mini hadixxe'e hiyyeqic;

«Daan Baasaanina'ni xogge sa'ake,

neeqiinke beltanjon» hiyye.

23 Nefitaalemixxe hiyyee qici:

«Nefitaalemi Duuchchi Woddike Goottik gaachchaninni yo'oshsha eeyyeme'en;

isixxa eebbanna badhaadheen;

edo yo'oshsha eeyyemee manjon:

abbaayyatanna abbaayatika bita'ika boga dhaala» hiyye.

24 Aseerixxe gosake mini hadixxe'e hiyyee qici:

«Aseeri wele gosak mini hadi duuchchanaa'n irra duroome calqe hiyyowwaal:

isinna dayyuwi giddii'n jajemowwaal:

abbaayyatanna abaayatika bita'ika boga dhaala.

25 Qachchuwwi atikixxi huluwwa sibiljikinna sageettoti itti jabaatuun,

baro atikee duuchcha'inna nege'i ati'a kada.

26 «Koo Yishuuruni atee gargaaro'a iimuwwati hana, duumanchake'ninna gaachanna ifikenni me'aake atike Magenishsha hedheek ayyinna hedheba'a.

27 Dhuuchi woddi'a hedhaak Magen golla atiken

duuchchi woddixxi hirre isixxi kipha no'oken: naapha ati edii'n shorraan: booso insa'neexxa ‹balleessitattoshsha assitan›

28 Tennexxe Isira'eeli qofin nage'ik hedha;

iimi'n woji coccoba,

Midhatinna woyinetixxi booka hexxeeke boga'n

Ya'iqoobixxa hortenna tuqaaki hedhebaani.

29 Koo Isira'eelike arda! Ati eebbisendeetteke manjon;

Duuchchi woddiki Gootti atee wodee'eke;

Atishsha shalo gale'ek ayyet?

Isi wonte atixxenna gargaarsanjoken;

naaphi maxxisa'ni atibaa dagaa wodda

umo insa'neeka cancaqqatton» hiyye.