1 Ookkoneechchi uduma illee iima hinge'e alalle Baasaanika ora abixxine me'inenne; Baasaak moyanji Ooginna ifike sannachchuwwi welti Edire'i hiyyemaake booncho'n no'oo lolatee ke'e. 2 Duuchchi Woddiki Gootti anee, «Isoo, boga isikanna sannaachcha isika duuchcha anga atixxe'ni sa'isse uwwe'ennaxxee isoo sodaattoxxe'e. Haseeboni hedheexxi galchaammaka Amooritotika moyanjo Sewooni'ni assitettaxxa iso'ninna assi.»

3 Tennexxe Duuchchi Woddiki Gootti no'ok Mageni Baasaanika moyanjo Ooginna isika sannaachcha duuchcha anga no'oxxe'ni sa'isse uwwe; no'onna mitte midde gatinsebe'nongi insa'ne'e birrenne. 4 Eettene yanna qachchuwa isika duuchcha abindenne; Oogixxa galcha, Baasaani giddo Argobixxe galcha'ni duuchca'n hedheeke jaane tomme qachchuwwinaa'n no'o abindebe'noki gateek mitti qachchinna hedhemabaan. 5 Kunni qachchuwwi duuchchi qeerrarramma kinjiinke dalla'uwwike cufanuwwikenna danqarisanjuwwik giissemeemmakemman; Iittanni dalla'i belok heddi olla'uwwinna hedhemman. 6 Mitte mittenge qachcha'n hedhemmaka labba meyyaka, oose insa'neexxanna mitteba kutti assati Haseebonke moyanjo'ni Sewooni'ni assinenneshsha konneeranna bakka insa'ne'e balleessinenne. 7 Hore duuchchanna qachchuwwakenaa'n boojineechcho duuchcha kinni ifi ifi'aa adhdhinnenne.

8 Eettene yanna'ni kunni lamiing Amooritotike moyanjuwwi Yordaanoosinaa'n boroti darre'ni hedheeka, Arinoonik galaanana'ni Herimoonxxe kooba qico'n hedheeka boga duuchcha abixinennen. 9 Sidoonito Harmoonni'eemi'i Siiriyooni hite yexxa wodda Amoorito kinni Saaneer hinaan. 10 Suubbichcha boga'n hedheeka qachchuwwa duuchcha, Gele'adika boga duuchcha, Salkaani qico'ninna Edire'i qico'n hexxeexxa Baasaan duuchcha, iittanni Baasaani giddo afemaaka Oogixxe galchaka qachchuwwa anga iblsinenne. 11 Raafayitotenaa'n hafi gate'eemmak Baasaanike moyanjo Oogi callaman. Isixxi taqenna sibljik giissedeexxe, ejjuma sallane ciqile, ba'linni kinni shoole ciqilemman. Isenna techchi qico'n Reebaat hiyyemaake Amoonitotike qachcha'n afendaan.

12 Eetennee yanna abixinenneke boganaa'ni Arinoonixxe dhooqa bira hedheeke Aro'eerii'ni ke'isse middi darre'ni hedheeka boga, higgeen lebeexi tullichiinka Gele'adika boga gamisa qachchuwwi insa'neenginninni welti Roobelitotenna Gaadike gosake mini hadi'a uwwenen. 13 Gateemmaka Gele'adika boganna Oogixxe galcha giddo hedhaaka Baasaanika boga duuchcha Minaasexxe horteka gamisa uwwennen. Baasani hedheeka Argobbixxi kuta duuucha Raafayitotike boga hiyyeme ege'nemeekeman. 14 Minaasexxe horte kadeeki Iyya'iiri, Geshuure qico'ninna Ma'ikatitotixxe gabala qico'ni hedheeka Argobika boga duuchcha adhdhe; iikki boginna isike summinni ye'eeme; tennenaa'ni kexxaaxxa Baasaani techchi qico'ni Haabooti Iyya'eerite hiyyenda'neen. 15 Gele'adi'ninna Maakiiri'aa uwwenen. 16 Yaane kinni dhooqatika gamisa gabalate assati Gele'adii'ni Arnoonixxe dhooqa qico'ni, ookko'ninna Amoonitottixxe gabala kadeeke Yaaboqike galaani qico'ni hedheeka galchatika boga Roobelitoteenna Gaadike gosak mini hadi'a uwweennen. 17 Dhidhimi darreke bogixxi gabala, Arabi afema'neek Yordaanoosi kadaa wodda, tinninna Feesikaxxe koobbuwwa hunda Kineeretinaa'n maxinetixxe abbaayya hiyyenda'neexxe Arabixxe abbaayya qico'niten.

18 Eettene yanna'ni ani hiyye insa'nee ajajene qici «Duuchchi Woddiki Gootti no'oki Magen konne boga qadaada asse'e ha'no'aa uwween; kaddo malee'e hunna afeek ha'nook manni duuchchi lolakee qophpheeffante ha'nooke dayyuwwi Isira'eel edo fule foofa hasissaan. 19 Kaddoolna are ha'nooxxinna oose ha'nooxxi heddo hore affineexxa ege'neennaxxee hori ha'nookinna ha'no'aa uwwennake qachchuwwi giddo hedhowwaal; 20 tinninna Duuchchi Woddiki Gootti kaba ha'no'aa assemmashshanni dayyuwa ha'nookanna hafuura adhdhiso'aanna Duuchchi Woddiki Gootti ha'nooki Mageni Yordaanoosi widii'ni insa'ne'aa uwwa'neeka boga insa'nenna iittanni dhaalla qico'niteni. Ookkoneechchi uduma ha'no mitti mittingi ha'no'aa uwwenneeke qadaadibaa higginaani.»✝

21 Ookkonne wodda Iyyaasuu'u hiyyee ajajenne qici, «Duuchchi Woddik Gootti ha'nooki Mageni konne lame moyanjuwwa'ni asseexxa duuchcha ille atixxinni uuddeeteni; ta'anna saxxe me'itaatteke moyanjuwwa duuchcha'ni Duuchchi Woddiki Gootti tenneenni lebe assaani. 22 Duuchchi Woddiki Gootti ha'nook Mageni ha'no'aa lolaammaxxe insa'nee sodaattinoqqe'e.»

23 Eettene yanna hiyyeennexxi Duuchchi Woddika Gootta soodateenna qici, 24 «Dada duuchchike Duuchchi Woddike Goottaa! Atika lumminnenna atixxa jabaxxa hirre anee garbichcha atike'n leellisha saffeeten; iimate'ninna buttate'n ati assitatoxxa yaane assa dande'aak magen ayyeete? 25 Duuchchi Woddike anike Goottaa! Yordaanoosi widi darre hedheeka ookkonee shaqqaka boganna eloxxa Libaanosixxa kooba uudonnaa ani'a eeti uwwi» 26 Duuchchi Woddiki Gootti kinni ha'nooxe buuttonni ane'ni mufatemmaxxee anika hiyyichcho laqebaani; Duuchchi Woddiki Gootti anee hiyyee qici, «Gelte'eni yoona» konneechchi uduma «tenne yaanexxee ane'n haasottoxxe'e. 27 Kexxe Feesigaxxe kooba hana qabat dhidhimi darre'ni middi darre'ni bita'i darre'ninna boroti darre'ni uudi. Ati Yordaanoosi'i foofa gophphaattaxxee ookkonee boga iile callinni uudi.✝ 28 Yaane kinni arda akeekeexxi ookkone boga'ni e'ye dhaallaashsha assaaka Iyyaasu ergite tirittirisita'n, jajjabeesi.» 29 Tennenaa'ni kexxexxa Beetipe'ori qarqara hexxeexxe dhooqa giddo turrennen.