1 Muusenna Isira'eelike ardik sooreessuwwi arda hiyye ajajee qici, «Techcho ani ha'no'a ajajaanneka konnee ajajuwwa duuchcha heqqe. 2 Duuchchi Woddik Gootti ati'a uwwa'neke bogiba'a e'yate'e Yordaanoosi fooffineechchi uduma, heenoxxa lumollamma kino uurrissettexxi ise'ni hana boo'e issi. 3 Edike annuwwi atikiki Duuchchi Woddik Gootti Mageni uwwanno hiyye addachchiisemmaka shamoke bogiba'a Duuchchi Woddik Gootti atik Mageni ati'a uwwa'neke bogiba'a e'yate'e yoordaanosi'i fooffatto wodda konnee seerika hiyyichcho duuchcha tenne kino hana borreessi. 4 Atinna Yordaanoosi'i fooffetteshanni, techcho ani ate'e ajajenneshshanni tennee kinuwwa Geebalxe Kooba iima kaasi, atinna ise'ni hana boore issi. 5 Ookko'o Duuchchi Woddike Gootta atike Mageni'a, sibljiinke miyinni tuqqebexxok kinoti tolchimalcho giissi. 6 Duuchchi Woddike Gootta atike Magenika tolchimalcho bocendebaaxxe kinonni huji, iso'ni hana Duuchchi Woddike Gootta atike Mageni'a ciincatika tolcha shiqishi. 7 Ooko'o mittoomiinka tolcha tolchi, itatanna iti Duuchchi Woddike Gootta atike Mageni edo gammadi. 8 Tenne kino hana konne seerika hiyyichcho duuchcha ca'a assite'e itti borreessi» hiyye.
9 Ookonechchi uduma Muuse qeesoletanna leewwito, duuchcha Isira'eelika arda hiyyee qic, «Koo Isira'eelike arda, sammi hitine caqasi, Ati techcho Duuchchi Woddike Gootta atike Magenike arda kaddeetten. 10 Duuchchi Woddik Gootta atike Mageni'a ajajemi: techcho ati'aa uwwa'neeka ajaja isikanna aada isixxa heqqedhi» hiyye. 11 Muusenna eettene barra arda hiyye ajajeeqic, 12 Yordaanoosi'i fooffineeshshanni: Simooni, Leewwi, Yihuda, Yisakoori, Yoosefinna Biiniyaami gosa gosaka arda eebbinso'a Geriizaanixe Kooba iima uurrinowwaal. 13 Roobeli, Gaadi, Aseeri, Zabiloni, Daaninna Nefitaalemiir Geebaalixxe kooba iima badinotee'e gosa gosake ardi'a uurrinowwaal.
14 Leewwito hafuura gikki assite Isira'eelike arda duuchcha'ni hine kullaa qic,
15 «Angatixxa oge ege'neeki manjichchi Duuchchi woddike Gootti ga'mii'ni misechchixxa fakke boce hujaak, yookaan magenuwwa giissedhe sho'iki uurrisedhaak manji badinemeeke kaduuni» hiyye.
Ardi duuchchi «Kaddowwaal!» Hiyyowwaal.
16 «Anna ifika yookaan ama isixxa salphisaak badinemeeke kadowwaal!» Hiyye.
Ardi duuchchi, «Ameen!» Hiyyowwaal.
17 «Jaali ifikixxa gabala dhiiba'ni gabalate'ni hexxeexxa kino hoyyaaki manji badinemeeke kadowwaal!»
Ard duuchchi «Ameen!» Hiyyowwaal.
18 «Ille ba'eeka fuggo oribaa'a akeekaaki manji, badinemeek kadowwaal!»
Ard duuchchi «Ameen!» Hiyyowwaal.
19 «Wele bogike manjo'ni, annanna ama afebaakenna aro'o shi'witeexxe manjichcho'ni dhugaa dassaaki manji badinemeeke kaddowwaal!» Hiyye.
Ard duuchchi «Ameen!» Hiyyoweaal.
20 «Anniixxe arenni welti diiphaaki manji anniixa ma'na batteessemmaxxe'e badinemeeke kadowwaali»
Ardi duuchchi «Ameen!» Hiyyowwaal.
21 «Manjiinsha hori biniinchik diiphaak manji badinemeeke kadowwal!»
Ard duuchchi «Ameen!» Hiyyowwaal.
22 «Wele amanaa'ni yookaan wele annanaa'ni ilendeexxe ifixxe dayyonni yabaabulaaki manji badinemeeke kadowwaal»
Ardi duuchchi «Kaddowwaal!» Hiyyowwaal.
23 «Aretixxe amanni welti yabaabulaaki manji badinemeeke kadowwali»
Ardi duuchchi «Ameen!» Hiyyowwaal.
24 «Sho'omee manjo shiyaaki manji badinemeeke kadowwaal»
Ardi duuchchi «Ameen!» Hiyyowwaal.
25 «Qajeela manjo shiyate'e matta maallaqa adhdhaaki manji badinemeeken»
Ardi duuchchi «Kaddowwaal!» Hiyyowwaal.
26 «Konne seerika hiyyichcho heqqedhe muuxabaaki manji badinemeeke kadowwal»
Ardi duuchchi «Ameen!» Hiyyowwaal.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)