1 Edike annuwwi ha'nook Duuchchi woddiki Gootti ha'nook Mageni dhaaldino'a ha'no'aa uwweeke boga'n hexxinaaxxi yanna duuchcha xonxoommachoti heqqedhiyyo hasissaaxxi aaduwwanna seeruwwi konneechchinn butti'a hedheekeran. 2 Ookkone dhaldina'neeke boginaa'n fulchitinaak gosa gosak ardi qeerrarramma koobbuwwa'n, gooruwwate'ninna mitte mittenge barqaaqeeke haqichchi hunda magenuwwa ifika magenooffatammaka boonichchuwwa duuchcha balleessitine birre. 3 Tolchimalchuwwa insa'neeka findigge magenooffantammaxxa insa'neexxa soodduwwanna butuchche; Asheera hiyyemaaka meyyake magenixxe fakkeka insa'neeka utuphuwwa giirate'n gubbe; insa'neeke magenuwwixxa fakkuwwa kukkuttine hindineexxi summa insa'neeke magenik ookkone boonchuwwa'n dedhemaashsha asse.✝

4 Ha'no Duuchchi Woddika Gootta ha'noka Mageno magenooffattina'neekir kunni addatebaak ardi insa'neeka dharichcha magenuwwa magenooffantammashsha kaddinoqqe'e. 5 Yaane kinni Duuchchi woddiki Gootti ha'nook Mageni summa isike'e galduma kadaasha gosa gosa ha'nooxxi giddo isi fi'laaka booncho harse; ha'noonna ookkone boonchiba'a me'we. 6 Ookkone booncho'ni ciiceessemaaka ha'nooka tolchuwwinna wele tolchuwwa ha'nooka tommekena'ni mitte, gargar hexxeexxa uwwa, werrega ha'nookanna eeti ha'nooxxenni uutinaaxxa uwwuwwa, lalo ha'nookenaa'n gedhebokenaa'ninna, re'etennaa'ni edise ilemeeka idagge. 7 Ookkonna Duuchchi woddike Gootta ha'nooke Mageni edo ittinaani; Duuchchi Woddik Gootti ha'nook Mageni ha'noo eebiseexxe hujinaaxxe duuchchinni atinna atik mini hadi gammaddinaan.

8 Telcho assinannashsha, mitti mittinig ifi'a fakkaatteexxa assemmashsha ha'nonna assitinoqqe'e, 9 Mayee'e? Hafuura adhdhitinaake Duuchchi woddiki Gootti ha'nook Mageni ha'no'a uwwaneeke geegiba'a ta'anna geltineebaan. 10 Kaddo malee Yordaanoosi'i fooffineexxi Duuchchi woddiki Gootti ha'nook Mageni geegoke asse ha'no'a uwwa'neeke boga'ni ofoldinaa wodda, soda'a belo hexxinaashsha, qarqara ha'nooke'ni hedheeke naapha duuchchanaa'ni ha'no'o hafuura adhdhisaan. 11 Okkoo'ninna Duuchchi woddiki Gootti ha'nook Mageni summi isikenni eyyemmashsha fileemamke booncho'ni ani ajajennechchuwwa ciinceessemaaka tolchuwwanna wele tolchuwwa, tommittettanna wele uwwa duuchcha iitanni eeyyanite ifixxinni Duuchchi Woddike Gootti'a uunannon hineexxa geego duuchcha bukki assitine'e idagginaan. 12 Ookonna ha'no, labbaxinna meyyaxi ha'nooxxi oose, ha'no'a erigatemaake labbakinna meyyakenninni, iittanni qadaada mitte afebaang ifi ifinge qachchuwwi giddo hedhaammakee Leewwitondinni welti Duuchchi Woddike Gootta ha'nooke Mageni edo gammaddinaan. 13 Ciinceessitattoka tolcha futti hitetteba shiqishshoxxe heqqedhi. 14 Tolcha atika duuchcha shiqishshatto boonni gosa atixxi giddo hedheeke mitte manjike boga'inna Duuchchi Woddik Gootti fileeke booncho'n calla'ni kaddowaal; ciiceessinaake tolchanna kaddo welekanna ani kulenneke boonno calla'n tolchitatton.

15 Kaddo malee'e Duuchchi Woddik Gootti ha'nook Mageni karra uwweexe qixxe'n, hoonee qachchuwwa'ninna kaddo'o sano hanooxxi eeteeba halchitineecho duuchcha du'litine ita dandeettinaan; gadansiinkanna geedummatika maala indammashsha qullichcha kadeek yookaan kadebaak manji ookkonee maala ita dande'aan. 16 Yaane kinni munde butta duni malee'e ha'wittoxxe'e.✝ 17 Duuchchi Woddike Gootti'a huccitettexxe midhanaa'n, woyinetika bulbulo, ejersiinxa zayite yookaan horatettechchonaa'n lalo, gedhebo, angafa kadeechcho Duuchchi Woddike Gootti'a ifixxe eeyyanni uwwanno hite'e ofo'o saxxettechcho duuchcha futti hitette booncho'n ittoxxe'e. 18 Duuchchi Woddik Gootti atik Mageni ati'a filaake boonno'n, labbaxxenna meyyaxxe oose atixxenni, mini giddo ergatenda'neexxe labbaxxenninna meyyaxxe oosenninni iittanni atike qachchuwwi giddo hexxa'neexxe Leewwitoninni welt tennee ita itatton; ookko hujje alfitetlcho elochcho duuchcha'n gammaddatton. 19 Boga atike'ni hexxaattoke baro duuchcha'n Leewwito mee waali.

20 Duuchchi woddiki Gootti atik Mageni uwwanno hiyye addachchisemashanni boga atika ba'lisaa wodda, maali atee halchisaa wodda «Heena fuldatto qico'n iti» hiyye. 21 Duuchchi woddiki Gootti fi'leek boonchi ikki ati birii'n bayyato'oole halchisaa wodda duuchcha Duuchchi Woddik Gootti ati'a uwweeke hori giddi'n lalo yookaan gedhebi giddii'n eetetteka fi'lite ani kulenneshshanni dula dandeetatton; maalakanna minenni ittatton. 22 Fedheek manji batto'eeka yookaan batto'ebaaka gadansakenna kaddo'o geedummati maala itammashshanni ookkon maala ita dande'aan. 23 Yaane kinni munde giddo hedho hexxemmaxxe'e munde ha'witoxxe'e; mundendinni hedheeke horika maalanna ittoxxe, heqqedhi. 24 Munde wede'insha butta dhangalaas male'e ittoxxe.✝ 25 Duuchchi Woddike Gootti edo eeyendaashsha ati'anna ati uduma dagga'neexxe atixxe oose'a eloxxi kaddaashsha munde ha'witoxxe'e. 26 Yaane kinn woyyitte atixxa uwwanna geego atika duuchcha adhdhite Duuchchi Woddik Gootti fileemmake boonchiba'a aaxxe missiyyi. 27 Ciincatika tolcha, maalakanna munde duuchha, Duuchchi Woddike Gootta atike Magenike tolchimalcho'ni shiqishi; wele tolchuwwixxi munde Duuchchi Woddike Gootta atike Magenike tolchimalchi bira dhangalaassowaal; yaane kinni maala iti. 28 Ati'anna ati uduma dagga'neexxe atixxe oose'a eloxxi kaddaashsha ani'a ati'a uwwaa'neeka ajajuwwa xonxommatte heqqedhi; tenneenna assitatto wodda Duuchchi Woddike Gootta atike Mageni edo eolxenna gammachchiissaaxxe yaane assitette hiyyoten.

29 Boga insa'neke'n adhe assitatto wodda Duuchchi woddike Gootti arda ookkone asse biraan; atina boga insa'neeka dhaaldee ofoldatton. 30 Yoona ardi kutti hiyyeechchi uduma insa'nee hunjaammaxxa huje, hujati fonxoro giddo e'yitoxxe'e; «Aninna insa'neeshshanni assannon» hita'n konnee gosa gosak ardi dharichcha insa'neeka magenuwwa hitta magenooffanta'nemma hite laqqoxxe'e. 31 Ati Duuchchi woddika Gootta atike Mageni'a magenoofatatek kunni ardi dharichcha ifike magenuwi'a magenooffantammashsha kadiyyo hasissabaan; insa'ne dharichcha magenuwwa magenooffantaa wodda hunja'neexxi huje duuchchi hara elobaaxxenna Duuchchi Woddike Gootti edo busha yaanen; insa'ne wele waalin finna ina'neeggaa ifike tolchiinke booncho'n magenuwwa insa'neekee giirate'n ciinceessinaan.

32 Ta'a yoona ani ate'n kulennexxa duuchcha assi; iso'n hana mittechchonna lebboxxe'e; mittetanna xe'ishshoxxe'e.✝