1 Duuchchi woddiki Gootti atik Mageni uwwa'neeke bogibaa marte ifike asseexxenni mitte godobinni ofoldatto wodda; 2 Uwwa'neeke boga'ni huccitattoxxe midhanaa'n umiinxa uwwa agaladete'n Duuchchi woddike Gootta atike Mageniki summi ye'emaashsha fi'leeke boonno'n aaxe mari: 3 Eettennee yanna baalloomake'n hedheeke qeesichchibaa martettexxi «Ani telcho Duuchchi Woddik Gootti atik Mageni no'oxxe oose'a uwwo'a annuwwa no'oke'n kako aageemmake bogibaa dagennexxa kokeesa'neen» hiyyi. 4 Qeesichchikinna agalade aadheexxi Duuchchi woddike Gootta atike Magenike tolchi edo uggaan: 5 Ookkoneechchi uduma Duuchchi woddike Gootta atike Mageni edo hitatto qici «Anni anki okkoo'ni okko sa'a'ni me'a'neek Sooriyixxe gosake manjomman: heenoka ifika mini hado aadheexxi Gibtseke bogibaa mare keessumumma ofo'leen: heeno'meemmak lumoke, jabakenna, hore bira sa'aan hite haaso'i. 6 Gibtsek manni kinni no'oo rakkise, salphisee, garba insa'neke assine no'o hujinseen. 7 No'onna no'oke annuwwike Duuchchi woddike Gootti Magenibaa raarrenneni: Magenikinna raare no'oxa laqeex rakko no'oxa; gonphetanna miiccama no'oka uudeen. 8 Tennenaa'n kexxeexxa Duuchchi woddiki Goottinna lumoxxe hunna isixxenninna jabaxxe hirre isixxenni leellishat; lumoxxe soda'anni lumoke beessisinni manbe'iki Gibtsee'ni no'o fulcheen. 9 Kabaa'a aadhe dageex malebikinna adoti duroome celqe hiyyeeka shaqqaka boga dhaalchiseen. 10 Tennexxee ani isi anaa'a uwweexe karranaa'n angafa kadeechcho igageennen» Konneechchi edi'aanna agalade Duuchchi woddike Gootti edo uggite magenooffat. 11 Ati'anna mini hado atike Duuchchi woddiki Gootti atik Mageni assemmaxxe qixxe'n eloxa yaane gammaadina'n galateeffatte: Leewwitotinna ha'nonni wolti hexxa'neexi keessumma konne galatiinke ayyaana'n insa'nenna qoodemmowwaal.

12 Sakkaxxe wogga'n umiinxa uwwa duuchcha shiqishshattoxxe wogga'n, angafa yaane duuchcha bukki assitee birtettechchi uduma qachchi giddo hedheeke Leewwitotee, keessumumma ofo'leeke manni'a, hadi reyeexe oose'anna aro'i reyeemmaxe melaalle'a uutee'naa goddine indaashsha uwwi.✝ 13 Ookkonechchi uduma Duuchchi woddike Gootta atike Mageni edo hitatto qici, «Ati ane'ni kuldetteshshanna woyyomeeka qoobbo anka mine ankenaa'n aadhe Leewwitotee, wele boganaa'ni dageeke manni'a, anna afebaakeenna aro'o shi'witeexxee uwweennen. Atike seeri gadho me'ebe'non; mitti dedhennek midde hedhebaan. 14 Oodhishshaten hedhenna wodda woyyichcha qoobbonaa'n mitechchonna itebe'non; batto'enne woddanna konne woyyoomeechchinaa'n mitechchonna adhdhebe'non; reyeeke manni'a shiqaake tolchi'a aadhennechchi hedhebaan; Duuchchi Woddike Gootta anke Magenika hiyyicho laqeennen; ajaja isika duuchchanna muuxeennen. 15 Iimate'n hedheeke woyyichcha atike galduma'n hexxe uudi; arda atika Isira'eeli'aanna edike annuwwa no'oke'e kako aaggeettashshanni, no'o'a uutetteka konee shamoka boga eebbis» hiyyi.

16 «Duuchchi woddiki Gootti atiki Mageni konnee seeranna aada heqqexxattoshsha techcho ajaja'en: atinna mitte qalbeninn mitte heduminni heqqedhi. 17 Duuchchi woddike Gootta atike Mageno kadeexxa egende isi hiyyaake seera'n galdotaa, ajajakanna seera isika heqqedhateenna ajajematee techcho kokeessiteetten: 18 Tennexxee Duuchchi woddiki Gootti haaso'emmashshanni ati techcho isi'a gargaritt hexxe foyendeetteke ard asse fi'le'een: atinna ajaja isik duuchcha heqqexxattoshsha kula'neen.✝ 19 Tennee assitottole dadeemmake ard duuchchi irra galatik, summik gurrikinna ate'e lummiso'a ati'a haaso'emmashshan isi'a gargar hedheeke arda assa'neexa ate'ni kule'en» hiyye.