1 Oddo giddii'n wabeek yookaan oojjo oojjotaak ke'eexxi, beessisa yookaan mambe'a assitaaxa yaane assannon atee hiyyoole. 2 Haaso'eeki beessisi yookaan mambe'a yaanuwwa duuchcha muuxendeele ati egendeboxxoxxa wele misechchixxa fakkuwwa magenooffanto hiyyoole, 3 Duuchchi woddika Gootta ha'nooka Mageno godobi mittin eeti'na'nexxa koko'a hase'e; mise iso'o erga gopheebaan ookkone wabeekixxa yookaan oojjanijiinxa laqqinoqqe. 4 Duuchhci woddika Gootta ha'nooka Mageno hordoffe; isoo ulfeesse: ajajuwwa isikanna heqqedhdhe; hiyyichcho isika laqqe; isoo magenooffatte; isini welti mitte godoba kadde. 5 Garbumma hexxinemmake Gibtse boganaa'n qullo fulcheeke Duuchchi Woddike Gootta'n jallitinaashsha assa'neeka oojjanjo yookaan ani wabeekaken hiyya'neeka duuchcha shiltine birre; iitta hedheeki manji Duuchchi woddike Gootta ha'nooke Mageno'ni hidda oltitinabaashshanna isi ajajeemmake orinaa'ni gargar higgino'a haseeten; tennexxee ha'no tenne elobaaxa yaane oddo ha'nooxi giddii'n fugusse.

6 Amati darre'n dayyi atik yookaan belti atikinna belto atixxi, eetattoxxi atixxi are yookaan lubbottishsha eetaattek jaali atik sho'ik «Marrennexxi wele magenuwwa magenooffanto» hiyyoole, atinna kadi edik ha'nook ege'nebaaka magenuwwa, 7 Bogiinke kassinaa'n ke'ise boginke kasiqico'n, shiqote kaddo'o bayya qarqara atike'n hedheeke gosa gosake ardike magenuwwi ate'e dedhiso'a wo'laanoole, 8 Kaddo malee iitta hedheeke manjika gorsa ijje adhitoxxe'e; haaso'a isika midde laqqoxxe; iitta hedheeke manji'a arjuntetinna shaqqunteti isi'a o'witoxxe waaldoxxe'e. 9 Iso'n wele manjjixi anga ibbebaa edi darre godoba gurtebexxong atinni shiy; okkoneechchi uduma weli gateeki mannina kinjik cancaqqe* shiyowaal. 10 Garbumma hexxetteke Gibtseke boganaa'n fulcheeke Duuchchi woddike Gootta atike Magenonaa'ni ate'e gargaritti hisso'a hasemmaxxe'e lubbo fuldaa qico'n iso'o kinjiki cancaqi. 11 Konnechchi uduma Isira'eeliki ard duuchchi kaddeexxa yaane duuchcha laqeexxi sodaatan: tennexxee langaxxa iitti elobaaxxi yaane kexxabaan.

12 Duuchchi woddiki Gootti atiki Mageni hexxotta'a uwwa'neeke qachchuwwinaa'n mitti giddo atee 13 fuggo manni ha'no giddii'n ke'eexxi ati egendeboxxoka «Wele magenuwwa marre magenooffanto» hine'e qachcha insa'neekika arda dedhinsa'noole, 14 Tennee laqqatto wodda tinni yaane hitta kaddeexxa hundii'n ke'issite'e dhukkussiisse laqi; iita hexxeexxi elobaaxi yaane oddo ha'nooxe'n kada isexxi dhugoottoole 15 Ookone qachchi giddo hedha'neeka manna hore insa'nengenninni mitteba shilte bir; booso ookkonee qachchixxa balleesi. 16 Konne qachchi giddo hedheeke mannixxi karra duuchcha bukki assitettexxi qachchiinxe oddo'n uggi; ookkonechchi uduma qachchi konne giddo hexxemmaxxa karra duuchhca Duuchchi Woddike Gootta atike Mageni'a tolchake assitettexxi giirate'n ciinceessi; tolcimalchokanna langaxxa hunjabaashsha olete kadde gatuun. 17 Duuchchi woddiki Gootti isixe elobaaxe mufenaa'ni higeexi mararitteti sa'aashsha Duuchchi Woddike Gootti'aa foyyendeexxe karranaa'n mitteechonna ifi'a gatirsexxoxxe; konnee ajaja heqqexxottole edike annuwa atikee aagemmaxxe kakoshshanni ate'e eeyyeexxi laakoossa atika bira sa'issaan. 18 Telcho ani ate'ni uwwaanneka ajajuwwa heqqexxottolenna Duuchchi Woddiki Gootti atik Mageni atenaa'n hasa'neexa eloxa yaane hujjaattole tennee haaso'eexa duuchhca ati'a muuxa muuxaan.