Langassatikaa Maaafa 9

Isira’eelike Ardixxa Ajajema Gopha

1 Koo Isira’eelike ardaa Laqi: iima geyaaka dalla’a afeeka lumolla qachchuwwa afeekara ati irra lumokenna jabake kadeeka gosa gosaka arda fulchite e’yitotta’a Yordaanoosii ta’a fooffatton. 2 Enaaqito jajjabakenna qeerrarrama ardamman: insa’neenna egendeeten «Enaaqito ayyete insa’ne’e injifata dande’aa?» Hinaa’na’a laqqeeten. 3 Kaddo malee’e bubbaaxxe giirashsha ati edii’ni edise foofaak Duuchchi woddike Gootta atike Mageno kadeexxa telcho ege’ni: insa’neenna balleessaan ati edonna insa’nee’e injifataan: atinna Duuchchi Woddok Gootti ate’ni hiyye addachchiisemmashanni insa’nee’e fulchitatton: ikki woddi insa’ne’e kutti assite birtatton. 4 Duuchchi woddiki Gootti atik Mageni inisa’nee ati edii’n fulcheechchi uduma «Konne boga dhaalona’a Duuchchi Woddik Gootti ane’e kaba’a aadhedageechchi qullumma anxeetebaan» hite godobi giddo heddoxxe’e. Duuchchi woddiki Gootti konne gosa gosake ardaa ati edii’ni shorra’neeki insa’neexxe fuggo hujexxe buuto’ate malee’e atixxe qullummaatebaani. 5 Boga insa’neke’n e’yite dhaaldatok atixxe qullumma yookaan qaajeelumma atixxeete kaddebaangi edike annuwwa atikee Abirihaami’a, Yisaaqi’anna Ya’iqoobi’a aageemmaxxa kako muuxatee’e Duuchchi woddiki Gootti atik Mageni konnee gosa gosaka arda insa’neexxe fuggonaa’ni kexxeexxa ati edii’ni insa’ne’e shorraammaxxeten. 6 Tennexxe’e Duuchchi woddiki Gootti atik Mageni konne shamoka boga dhaaldota’a ati’a uwwa’neeki qulumma atixeete kaddeebaaxxa ege’ni; ati gooba micciirteetteken.

Jabbe Worqetixxa

7 Duuchchi woddika Gootta atika Mageno qiilla gammoojje’ni hitta isoo mufachchiissettexxa kassi hiyyi; hara deetoxxe’e. Ati Gibtsee’ni fuldettexxe barranaa’n ke’isse’e konne booncho’ni geltattoxee Duuchchi woddike Gootta’n jallattetteshshanden. 8 Koorebike booncho’ni Duuchchi Woddika Gootta mufachchiissine’en isinna ha’no’o biro’a yo’osha mufate ke’e. 9 Aninna bocendeexxa kinuwwa Duuchchi woddiki Gootti ha’noonni welti ageemmaxxa kakottixxa bocendeexxa kinuwwa aadhdhona’a koobati hana fulenne wodda mitechchonna itebe’nongi, wodeekanna hawweebe’nongi shoole tomme barranna hashsha turenen:✝9:9 Fula. 24:18. 10 Duuchchi Woddi Gootti lame bocendeexxe kino’ni anga ifixxenni borreesseexxa borro ane’ni uwwe: ha’no bukki hitineemmaxxe barra’ni Duuchchi Woddik Gootti koobate’ni giira giddo hedhe’e ha’no’a kuleemmaki ajajuwwi duuchchi eettene lame bocendeexxe kino’ni hana hedheman.

11 Shoole tomme barranna hashsha muuxendeechchi uduma Duuchchi Woddik Gootti lame bocendeexxa kino iittanni bocendeexxa kakotixxa kino ane’ni uwwe. 12 Ookkoneechi uduma Duuchchi woddiki Gootti, «Kexxettexxi, Gibtse’n fulchiteettak atik ardi batto’eemmaxxe’e rakke’e butti’a dirri: ani insa’ne’e ajajeennake ajajanaa’ni ikki woddi bayyante’en: baqinseexxa fakkuwwa ifi’a giisse’nen» hiyye ane’ni kule. 13 Higgeenn Duuchchi woddiki Gootti ane’ni hiyyeeqic, «konnee arda uudenne: dhugaanda kunni ardi gooba miccireeke ardani: 14 Ani insa’ne’e balleesse summa insa’neekanna buttatenaa’ni balleesse’e birona’a ane’ni waali: ateena insa’nee irra jabakenna heddo arda atee’e assannon» hiyye. 15 Tennexxee eettene kooba’ni giira bubbaa’naa eettenee lame bocendeexxa kakotixxa kino lamiinxe anganni abixxenneshshanni eettene koobanaa’n illee iima hige dirreennen. 16 Dhugaandinni Duuchchi woddik Gootti ha’no Mageno ajajeemmake oranaa’ni ikki woddi fuldine worqe*9:16 Worqe Fula. 32:2-4 uudi. baqinseexxa jabbetixxa fakkenna ifi’a giissexxine Duuchchi Woddike Gootta’n ha’no cubbo hujjineexxa aninna uudennen. 17 Tenneexxee lamiinxa bocendeexxa kino anga anixxe’ni abixeennaxxa aadhdhe ha’no edo butta darebbe butuche birenen. 18 Ookkoo’ninna Duuchchi Woddike Gootti edo fuggoxxa yaane hujati mufeti ke’aashsha assitaaxxa cubbo hujjineemmaxxe’e mittechchonna afo’o anke’ni maqeebe’noggi shoole tomme barranna hashsha higgeenni Duuchchi Woddike Gootti edo albik gonbisemennen. 19 Ha’noo’o biro’a fuggo aaremeemmaxxe’e: aninna Duuchchi woddike Goottixxa mufenna aare sodaatttinaan: yaane kinni Duuchchi woddiki Gootti higgeenna anixxa soodachcho laqe.✝9:19 Ibr. 12:21. 20 Duuchchi Woddik Gootti Aarooni’i balleesso’a fuggo aareemman: ookkone wodda Aarooni’anna soodatennen. 21 Ha’no eettene jabbexxa fakke giissiyyo cubbo hujjineemman; tennexxe’e eettenee jabbexxa fakke aadhennexxi giirate’n baqqaashsha assennen. Ookkonechchi uduma baqqemmaxxa buttuchche bullete kaddaa qico’n dayennexxi eettene bulle koobatenaa’n adadee yaa’anemake wodi’i giddo xeerrenne. 22 Tebeerraa’ni, Maasahiinna Qiibiro Hataawwi’n Duuchchi woddika Gootta mufachchiisennen. 23 Duuchchi Woddiki Gootti Qaadesi Barinnee’ni ha’no’o, «Alalle qabattine ha’no’a uwweennaka boga dhaaldine qadaada ifike assedhe» hiyyeexxi ergee wodda ha’no kinni Duuchchi Woddik Gootti ha’nooke Magenike ajaja’ni jallattine; isi hiyyeexxa dhugaate hitine adhdhitineba’a; isi’aanna ajajendineba’a.✝9:23 Lak. 13:25; 14:38; Lan. 1:21; Ibr. 3:16. 24 Ani ha’noo’o ergennexxe yannanaa’n telchi qico’n Duuchchi Woddike Gootta’n jallitineeshshann hexxineen.

25 Duuchchi woddiki Gootti ha’noo’o biraaxxa haaso’emmaxxee eettene shoole tomme barranna hashsha Duuchchi Woddik Gootti edo albik gonbiisemennen. 26 Hiyya’ni Duuchchi woddike Goottibaa’a soodatene qic, «Ee, Lumike Duuchchi Woddik Gootta Magenoo atixxe lumoxxe hunnanni woddettekanna jabaxxe hirre atixxinninnaa Gibtsee’n fulchitettaka atike geego kadeeka atika arda birtoxxe’e. 27 Erganjuwwa atika Abirihaami, Yisaaqinna, Ya’iqoobi hedi: konne ardixxa gooba micciira, fuggonna cubbo insa’neexxa uuddoxxe’e. 28 Iitta kada gophphoole kinni Duuchchi Woddik Gootti insa’ne addachchiisemmashshanni arda ifika ookkone bogiba’a e’yisha dande’a gophemmaxxeenna insa’ne’e gibeemmaxxe’e, ‹Qiilla gammoojje’ni insa’nee shiyo’a aadhe fulche› hinaani. 29 Yaane kinni insa’ne atixxe jabaxxe hunnanninna jabaxxe hirre atixxenni aaxxe fulchiteettakenna geego kadeeka arda atiken» hiyye.