1 Duuchchi woddiki Gooti atiki Mageni uwwa'neeke boga'n hedha'neeka arda kutti asse biree'na qachchuwwakanna miniwwa boojite ookko'o booteeffatte hexxatto wodda; 2,3 Duuchchi woddiki Gootti atiki Mageni hexxattoshsha uwwa'neeka boga saseba qoodde mitti mittingixxe oddo'n mitte mitte qachcha igaari: manjo anga sa'ee manni ookko'a baqate fulaaka ora giissi: ookkonechchi uduma anga sa'eek mitti manji konnee qachchuwi giddii'n mittiinbaa baqatee lubbo gataan: 4 Mitti manji halo afebaaka dedhiki mitte manjo anga sa'olee konne qachuwwi giddii'n mittiinba mare ifi gatisa dande'aan. 5 Fakkeennake'e; lami manni haqqe qurquuratee maree'na mitti haqqe qurquraa'nanni qoce sukke'atenaa'n fulde wele manjo shiltoole; shiyalli konne sase qachchuwi giddii'n mittiinbaa mare ifi gatisowal. 6 Hedheeki adabeessatiki qachchi; bayyate kadool kinn; halo fulatee seera afe'eeki reyeeke manjike mini hadinni welti abinde balleessa afebaanga manjichcho dedha mufeti shiyaaxxe hexxeen: ikki manjichchi halo afebaanga toliinka manjichcho shiyeek dedhikitemman. 7 Sase qachchuwwa gargari footottaa'a ajaja'neeki tenne buutonnitene.

8 Duuchchi woddiki Gootti atiki Mageni edike atike anuuwwi'aa kakoti kokeesseemmaashshanni boga ati'a ba'lisool, 9 ani techcho ajajaannek seera duuchcha muuxxe Duuchchi woddika Gootta atika Mageno eetottolenna isi hiyyaake seera'n me'itottole konnee boga ati'aa uwwaammaxxee wele sase adabeessatika qachchuwwa lebbe gargar foy. 10 Tenneenna assitattok Duuchchi woddiki Gootti atiki Mageni booteeffatte hexxotta'a qadaada atike asse uwwa'neke boga'n qajeeli manjixi munde ookko cophphabaashshanna atinna tenne daafenni qorendabexxoshshaten.

11 Yaane kinn mitti manji naaphunteti shene huyye wele manjo anga sa'eechchi uduma lubbo gatisatee konne qachchuwwi giddii'n mittiinbaa baqatoole; 12 Anga sa'eeki manjichchi hedha'neeke qachchiixxi geedhe anga sa'eemmaka manjichcho qachchi giddii'n ergisse aaxxowwaal: insa'nenna halo fullaashsha hadiinxe anga'n sa'issine uunowwaal. 13 Isoo'o ijje marartinoqqe: duuchchiinxe yaane'n eloxxi calli ati'a kaddaashsha anga sa'ee manjo Isira'eeli giddii'n fulchi.

14 Duuchchi woddiki Gootti atiki Mageni ifike fichcha asse ofoldottaa'a ati'aa uwweeke qadaada'ninna olla'i atikixxe oddo'n ediwoddixe ila'ni gabalate'n kaasemmeka beessisa dhiibboxxe'e.✝

15 Mitte manjixxa balleessa afatee'e mitte dhugaa calli geltabaan: mitte manjo balleessanjoke kadeexxa kokatee lame yookaan sase manjo hasisaan.✝ 16 Mitti elobaak manji wele elobaaka manjo balleessanjoke asse ku'loole, lame yookaan sase manni naqaashummati kula hasissaan. 17 Lamiing Duuchchi Woddik Gootti magenooffatema'nee booncho'n eettene yanna'n ergatendammaxxe hayyonna qeesole edo shinqowwaal. 18 Hayyoole anga sa'emmaka manjichcho jabeessine qorrowwaal: ikki manjichchi Isira'eelxe gosake ifixxe sanne'n dharik ku'loole, 19 Ku'lemeeke'e murremmaxxi murte iso'ni higgaan: iita hexxeexa elobaaxa yaane duuchcha konne qicinni ifi iimii'ni sa'issexxatton. 20 Manni duuchchi tennee laqa'emmaxxee langaxxa iitta hexxeexxa fuggoxxa yaane ati giddo assaba'a. 21 Murtetinna; lubbo balleesseeka, isixxanna balleessa, ille balleesseeka isixxanna balleessa, isso enqeeka isixxanna inqa, anga kuteeka isixxanna kuta, lekka enqeeka isixxanna enqa, iitta hexxeexxa elobaaxa yanne assaaka manna marartoxxe.✝