1 «Ani telcho ati edo eebbatenaa'ninna badinotenaa'ni fi'litattoshsha ati'aa waaleennen: Duuchchi woddiki Gootti ardiinxe oddo'n shorree booncho'n hexxe isoo'o qaabbattettele 2 Ati gosa atixinni wolt Duuchchi woddike Goottiba higgettelenna telcho ani uwwaannek Duuchchi woddike Goottika seeruwi'a godobi mittin hexxe ajajendaattele; 3 Duuchchi woddiki Gootti atiki Mageni mitte godobinni atee'e gattowaal hiyyaan: Duuchchi Woddik Gootti atee'e ardiinxe oddo'ni shorreexxe bakka duuchchanaa'n hiisseexxi haaroba duroonsamman. 4 Buttatixxe gabala qico'n xeerendine'e hexxinoolenna midde Duuchchi woddiki Gootti atiki Mageni mitteba bukki asse aadhe dagaan: 5 Konne qicinni edik annuwwi atik hedhemmake boga higgeen dhaaldatton: ikki bogginna edike annuwwi irra dureessakenna horte bira saxxattoshsha assaan. 6 Duuchchi woddika Gootta atika Mageno mitte godobinna shenitte hedhonni eetattoshsha, hedhotinna hexxattoshsha Duuchchi Woddik Gootti atik Mageni sanne atixxixxa qalbe jila offo'lishaan. 7 Tennee badino duuchcha atee giba'neeke'ninna miiccammake naapha'n hiissaan: 8 Atinna higgeen isi'a ajajendatton: ani telcho uwwaannek isika ajajuwwa xonxommatati heqqexxatton: 9 Hujjaattexxe yaane duuchcha'ni Duuchchi woddiki Gootti ate'e duroonsaan: oose atixxa; horateetteka horenna fichchi giddixxi karra duuchcha raxxee missaashsha assaan: Duuchchi woddiki Gootti edika annuwwa atika duroonse celqi asse ifi'a gammademmashshan ateenna duroonse gammadaan. 10 Tenneena assa'neek konne seeriinke maxaafi giddo borreessemeeka ajajuwwanna seeruwwa heqqedhati mitte godobinninna mitte heduminni Duuchchi woddike Gootta atike Magenibaa higgottoleten.

11 «Ani telcho uwwaanneki ajaji hara ha'ureeke yookaan atenaa'n bayyateebaan: 12 ‹Isi hiyyaaxa lanqe ajajemmonnaa ayyete mareex no'a aadha› hite laqqabexxoshsha; kunni seeri hedheeb iimate'nitebaan. 13 ‹Isi hiyyaaxa lanqe ajajemmonnaa Abbaayati wido foofexxi ayyete no'a aadha?› Hite laqqabexxoshsha; isi hedheebi abbaayati widobaan. 14 Hiyyichchi ha'no'a hara shiqon hedheen: heqqexxottaanna afo'oke'ninna qalbe giddo hedheen.✝

15 «Ani telcho hedhotanna qananumma rewotanna elletenaa'n yookaan rewotenaa'ninna ba'netenaa'n fi'litotta'a ati'a waaleennen: 16 Ani telcho ajajaanek Duuchchi woddike Gootta atke Magenike ajajuwwi'a ajajendottole, seerake'n me'ittotole, ajajuwwa, seeruwwakanna aada duuchcha heqqexxottole lubboti hexxatton: bira saxxatton: Duuchchi woddiki Gootti atiki Mageninna martattoke boga duuchcha'n atee eebbisaan. 17 Yaane kinni qalbe atixxen udumi'a higge'enna ajajema gophphee'e wele magenuwwi'a kumbu hittota'a sobendetexxi konne magenuwwa magenoofatottole, 18 Yoona baxxina'neexxa telcho ani ate'e xexxe'achchisaannen. Yordaanoosika galaana foofe ofoldattoke boga'n qeerra baro hexxabexxon. 19 Hedhotenaa'ninna rewotenaa'n; Duuchchi woddik Goottixxe eebbana'ninna badinonaa'n eetettexxa fi'litottaa ati'a waaleennen: fi'litinaa woddanna iimatanna butta dhugaa ati'a abixxannon: Tennexxee ha'noonna sanne ha'nooxi duuchcha lubboti hexxinaashsha hedho fi'le. 20 Duuchchi woddika Gootta atika Mageno eeyyi: Isi'a ajajem: Isoo addati: tinninna ati'a hedhotenaa'n caala edike annuwa atike Abirihaami'a, Yisaaqi'anna Ya'iqoobi'a kakateemmashshanni marte ofoldattoke boga'n qeerra boro hexxatton» hiyye.✝