1 Duuchchi woddike Gootta atike Mageni'a shenendinni ajajendottolenna ani techcho ati'a uwwaanneka ajaja duuchcha xexxe'achchoti hordoffottole, Duuchchi Woddik Gootti atik Mageni buttate'ni hedha'neeke gosa gosake ardi iima atee'e umoke assaani. 2 Duuchchi woddika Gootta atika Mageno ajajendottole; tinni eeba duuchcha atixxe kaddaan.

3 Ati qachchake'ninna fichchiki eebbisendattoni.

4 Duuchchi Woddik Gootti oose atixxa, boga atikixxa midha, laliinxa jabbe, gedhebiinxanna re'etixxa beltanna eebbisan.

5 Atixxe doonexxa midhanna qiricco atixxa eebbisaan.

6 Ati e'yate'ninna fulate'ni eebbisendatton.

7 Duuchchi Woddik Gootti ate'ni ke'aaka atika naaphuwwa ati edo insa'ne injifatemmaashsha assaani. Insa'nenna atiba'a mitte oranaa'ni dangaan torbaane ora'ni xeeremmaani.

8 Duuchchi woddiki Gootti qoqqoba atikanna elootte huccitettexxa karra duuchcha eebbisaan. Duuchchi Woddik Gootti atik Mageni ati'a uwwa'neeke boga'ni ate'e eebbisaan.

9 Duuchchi woddike Gootta atike Magenika ajajuwwa heqqexxottolenna isi hiyya'neeke ora'ni me'itaatole, isi uwwanno hiyye'e addachiisemmashsha woyyoomeeke ifike arda ate'e assaan. 10 Ookkonechchi uduma buttate'n hedheeki ardi duuchchi, atee'e Duuchchi woddiki Gootti summa isikinni ye'eexxa uude'e sodaataan. 11 Duuchchi woddiki Gootti ati'a uwwo'a edike annuwwa atike'e kakateemmake boga'ni heddo oose heddo horenna gurte ko'itattoxxa midha, celqe hitattoxxa durumma ati'a uwwaan. 12 Duuchchi Woddik Gootti ati hexxetteke bogi'a xeena mayete'ni uwwateenna, huccittetechcho duuchcha eebbiso'a, iimatixxa eebbatixxa hula ati'aa banaani. Atinna heddo gosa gosake ardi'aa liqeessitatto malee'e ayyenaa'ninna liqeeffattabexxon. 13 Duuchchi woddiki Goottinna ate'e umoke assaa malee'e eegete assabaan. Techcho ati'a uwwa'neek Duuchchi woddike Gootta atike Magenika ajajuwwa xonxoommachchoti heqqitottole, haanonna kaddo ati lumoke malee'e ijje shiixxexxabexxon. 14 Wele magenuwwa hordofati, insa'ne'aanna ergatemat tochcho Ani ati'a uwwaanneke ajajuwwanaa'ni middi'a bita'i'a higgoxxe.✝

15 Yaane kinn Duuchchi woddike Gootta atike Mageni'a ajajema gophphottole techchixxe barra'ni, Ani ati'a uwwaanneka ajajuwwanna seeruwwa isika duuchcha xonxoommatte hordofa gophphoottole, konneechchinni butti'a hexxeexxi Duuchchi Woddike Goottixxi badino atee hanqattabaan. 16 Ati qachchake'ninna boga atike'ni huccitettexxe midhanninna badinendatton. 17 Atixxi doonenna atixxe midhaxxi qiricco badinendaan. 18 Oose atixxa, boga atikixxa midha, laliinxa jubbuwwa, gedhebiinxanna re'etixxa beltanna badinaan. 19 Ati mini'a e'yate'ni badindatton; fulate'ninna badinendatton. 20 Ati Duuchchi Woddika Gootta waalde fuggoxxa huje hujatenaa'ni kexxeexxa, booso atixxi rakke baxxe kuttii muddatto qico'ni anga atixxi hucciteemmachcho duuchcha'ni Duuchchi Woddik Gootti badino, weekenshanna xixichcho isika ate'ni ibisaan. 21 Duuchchi Woddik Gootti ati dhaaldotta'a e'yitaatteke boganaa'ni ate'e balleessa qico'ni, bala ate'ni ibisaan.✝ 22 Duuchchi Woddik Gootti ati baxxattoqico'ni huqqisake dhukkuba, eebbinjo, fulaantichcho, jabaka eebbinjo, caama, midhate'ninna waagenna, buquna itti ibisaan.✝ 23 Ati iimi darre hexxeexxi iima sageettotishsha, ati hunda hexxeexxa buttanna sibiljiinsha jabeessannon.✝ 24 Duuchchi Woddik Gootti buttate'ni ganaaka xeena bukotibaanna huurinba'a jijjiiraan; kunniichchuwwinna ati baxxatto qico'ni iimi'ni butti'a ate'ni ganaani. 25 Duuchchi woddiki Gootti atike naaphuwwi edo ate'e injifatendattoshsha assaan. Ati insa'neeba mitte darree'ni daggatton; yaane kinni insa'ne edii'ni torbaane darre'ni baqattaton, atinna buttatixxe mootumma duuchcha'a salphinnike kaddatton. 26 Renshi atiki iimixxe ci'uwwaanna buttike biniinchuwwi'a itate kadaan, tennee ci'uwwa shorraaki hedhabaan.✝ 27 Duuchchi Woddik Gootti fayyitabexxoke Gibtseke fulaantichchi dhukkubbinni, lumo misira malaata'neexxe madanni, qanxoti ate'e waye uudisan. 28 Duuchchi Woddik Gootti maraattattoshsha, ille baxxattoshshanna doonsa kiyya hitattoshsha ate'e seldo uudisaan. 29 Balla'i dukkana giddo tirimmisa'ni me'ammashsha, atinna barra saafo'a tirmmissa'ni me'itatton. Assitattoxxi duuchcha ati'a qajeeldabaan. Barra barra'ninni miicndatton, mulqendatton: ate'e gargaaraak hedhebaan. 30 Ati dubarra aaxxotta'a kadhattatton: yaane kinn weli manji ati hunidii'ni isee'e aadhe isenni welti diiphaan. Ati mine ijaadhdhitatton; yaane kinni giddo galdabexxon. Woyine kaarsexxatton: yaane kinn isinaa'ni gumma ittabexxon. 31 Ati uuddaa'naanni Jibichchi atiki gorra'emaan, konne maalanaa'ninna iittechchonna afo'o atike'ni maaqqabexxon. Harrichchi atikinna hunnandinni atena'ni aadhemaan. Ati'aanna hiissemabaan. Gedhebi atikinna atike naaphuwwi'a uwwemaan, konnee gedhebo anga insa'neexxenaa'ni ibisaaki hedhabaan. 32 Labbaxxinna meyyaxxi atixxi oose wele bogike gosa gosake ardi'a uwwendaan, anga insa'ne'ni ke'issatee hunna affabexxon, techcho soodo danguuni hita'ni ille atixxi duuchchi wodda insa'ne'e heqqande'ni garjitaan. 33 Boga atike'ni huccitettexxa midha duuchcha buttike manna itaani, hexxetteqico'ni ate'ni fuggoxxinna miiccami ate'ni bira saxxaa malee'e ati'a woyyoottaaxxi yaane hexxabaan. 34 Uudaattexxi yaane duuchcha ate'e maraachchitaan. 35 Duuchchi woddiki Gootti ate'e lekkatenaa'ni ke'isse'e umiin qico'ni tare sa'aake fayyabaakenna wixxirri assitaaxxa mada, gulubo atike'ninna lekka atixxe'n ibisaan. 36 Duuchchi woddiki Gootti ateenna ate'ni hana moosisemaaka moyanjo, atinna ediki atiki annuwwi, egendinebaake gosa gosake ardiba'a ha'noo adhdhee me'aan. Ookoonna ati haqichchokena'ninna kinjokennaa'ni giissemeeka wele magenuwwa magenooffatatton. 37 Duuchchi Woddiki Gootti ati e'yitattoshsha akeeka'neeke boga'ni gosa gosake arda duuchcha'ni ati salphatteetteke, jibbendeettekenna cee'mendeetteke kaddatton. 38 Fichchi atiki giddo heddo sanne facaassatton, awwaaneessi itaammaxxe'e bukki assitattoxxi heenoxxe kaddaan. 39 Corroqa ittammaxxe'e atinna woyinetika hiddichcho kaalsexxe'e kuufissatton, yaane kinni woyinetenaa'ni ha'witabexxon, roddetanna bukki assexxabexxon. 40 Atike boga duuchcha'ni ejersiink haqqichchi hedhaan, yaane kinn isinaa'ni gumma harcaatammaxxe'e zayite isixxa issattabexxon. 41 Atinna labbaxxanna meyyaxxa oose i'litatton, yaane kinn insa'ne booji'naammaxxe'e insa'ne atinni welti he'nabaan. 42 Haqquwwa atixxanna fichcha atiki giddo hexxeexxa midha duuchcha awwaanesinki haagani itaan. 43 Atixxe oddo'ni hedha'neeki wele bogik manji ate'e sa'e nophpha'ni me'aa wodda, ati kinni jale isixxe kadde'e butti'a higgaton. 44 Isote ati'a liqeessa malee'e ati isi'a liqeessitabexxon. Isi umoke kada ati kinni eegete kaddaton. 45 Tinni badino duuchcha ate'ni daggaan, atinna Duuchchi Woddika Gootta atika Mageno ajajema gophpheettaxxeenna isi ati'a uwweeka ajajanna aada heqqedha gophpheettaxxe'e, ati baxxatto qico'ni tinni baluwwa duuchcha ate'e hanqattabaan. 46 Insa'nenna ati'anna hore atixxe'e duuchchi woddi'a beessisakenna saadinote kandaan. 47 Kaddo malee'e ati duroondetto wodda Duuchchi woddika Gootta atika Mageno gammadda'ninna ilillissa'ni isi'a ergatema gophpheettaxxe'e, 48 solo'ikinna dheeboti, daaratinna jabaxxe hiyyonni, Duuchchi woddiki Gootti, ate'n ke'isake atike naaphuwwi'a ergattatton. Isinna atee'e balleessaa qico'ni gooba atike'ni sibljiinka qanbara dukinsaan. 49 Duuchchi woddiki Gootti laagada insa'neka egendebexxoka gosa gosake ardika sannachcha bayyi boganaa'ni ate'ni ergaan, insa'neenna sinbiriinsha ate'ni ke'issaan. 50 Insa'nenna geercho ulfeessabaakera, oose mararabaak uunda wodda yo'oshsha sodaachchisaake gosa gosake ardan. 51 Insa'nenna ate'e balleesinaa qico'n laliinxa, gedhebiinxanna re'etixxa horte atixxanna fichchi giddixxa midha duuchcha indaan; Insa'nenna atixxi booso baxxaa qico'ni huccitettaxxe midhanaa'ni, lalo, gedhebo, re'etixxa horte duuchcha, iittanni woyinenna ejersiinke haqichchixxa gumma midde ati'a gatisabaan. 52 Ati addattaattek lumola jabaka gollifachchotika qachchuwwa dalla'uwwi diigemaa qico'ni boga duuchcha'ni hedheeka qachchuwwa atika duuchcha abidaan. Duuchchi woddiki Gootti atiki Mageni ati'a uwwa'neeke boga'ni hedheka qachchuwwa duuchcha buqaan. 53 Yaane kinni naaphi atik ate'e buqe'e rakkisa wodda, weekenshatenaa'ni kexxeexxa, Duuchchi woddik Gootti atik Mageni, ati'a uwweexxa labbaxxenna meyyaxxe oose atixxika maala ittaton. 54 Wele waalin oddo atixxe'ni shaqqaki lafilagati manji midde ifike dayyi'a kaddo eeya'neexxe are ifixxeenna kadi gattemmaxxe oose ifixxe'e mararabaan, 55 ittanni isi itaammake oose ifixxike maalanaa'ni ittelchonna insa'ne giddi'ni welekee uwwabaan. Tinni duuchchanna kaddaa'naa atika qachchuwwa duuchcha naaphuwwi abideemmaxxe'e, ate'ni geltaaxxe jabaxxe rakkonaa'ni kexxeexxa konneechcho calla isi'aa gateemman. 56 Atixxe oddo'n hexxeexxi shaqqaxxi lafilagatto tenne shaqquntenninna lafilagatumate'naa'ni kexxeexxa lekka isexxa buko tuqqe egendebaaxxi manjichcho, eeta'neenga iseka aro'o ittanni ildeenga labaka beltonna meyyaxxa belto ise'ni maachonna lanbabaan. 57 Gadaameesa isekenaa'ni fulemmachchonna ildemmaxxa ifixxa oose corfatta'neen. Isenna tenne'e assita'nechchi rakkote'ni hexxemma wodda atiki naaphuwwi qachchuwwa atika buqe atee'e rakkisaamma wodda, insa'nee'e shoxxe itto'a hiteeten.✝ 58 Konne maxaafi giddo borreessendeexxi konne seerik hiyyichchuwwi xonxoommachchoti hordofa gophphottolenna manbe'inkanna sodaachchisaaka Duuchchi woddike Goottike atike Magenika summa ulfeessa gophphoottole, 59 Duuchchi woddiki Gootti sodaachchissaaxxanna lumo qico rakkonna qeerra baro turtaaxxa bala, fayyabaaka dhukuba ate'ninna horte atixxe'ni Duuchchi Woddik Gootti ibisaan. 60 Isinna sodaattaatteka Gibtseka dhukkuba duuchcha ate'ni idagaan, kunni dhukkubuwwi atenaa'ni citabaan. 61 Duuchchi woddiki Gootti konne seeriinke maxaaf giddo borreesendebaaxxa, heene bifaka dhukkubanna baxxaatto qico'ni rakko ate'ni idagaan. 62 Ha'noke Duuchchi woddike Gootta ha'noke Mageni'a ajajema gophphineemmaxxe'e, ha'no iimatixxe urjeshsha bira saxxineemmaki hee'no'mitinaan. 63 Duuchchi woddiki Gootti ha'noo duroonse laakoossa ha'nokanna bira sa'isa'issee'na iso'o gammachiisa gophphineemmaxxe'e, isi ha'noo balleesse booso ha'nooxxa kutti assati gammadaan. Tennexxe'e dhaaldino'a e'yitina'neeke boganaa'ni goshendinan. 64 Duuchchi woddik Goottinna boga duuchcha'n hedheeke gosa gosake ardi duuchchixxe, oddo'ni ate'e xeeraan. Ookko'ni atetenna kadi ediki atik annuwwi egendinebaaxxa haqichchokenaa'ninnaa kinjokenaa'ni hujemeeka wele magenuwwa magenoofattaton. 65 Ookkone gosa gosake ardixxe oddo'n nage'a affabexxon, lekka atixxa uggitattoka booncho affaboxxon. Ookonna Duuchchi woddiki Gootti weekendeexxa sammo, halchat garjiteexxa illenna godoba kultitattoxxa hedino ati'a uwwaan. 66 Rewunnuni hiyyoti hashshanna barra soda'a wo'mati, lubbo atixxi nage'a alfa gophati, duuchchi wodda ruphphi hita'ni hexxatton. 67 Godobi atiki soda'ati wo'meemmaxxeenna ille atixxi uuddaammaxxee yaanenaa'ni kexxeexxa bogi soodaa woodda, «Maye hedhe hashsheele» hashshaa wodda kinni, «Maye hedhe soodeele» hitatton. 68 Langaxxa higgabexon hiyyenneke ora'ninna Duuchchi woddiki Gootti hoboloti Gibtse'a ate'e hiissaan. Ookko'ninna labbakinna meyyaki garboole insa'nexxe kaddinaasha naaphoole ha'nooxxe'e ifi gurgurate'e umo ha'nooka shiqishshinaan; ha'no kinni hiraaki hedhebaan.