1 Torbaxe woggake muuxama'n maallaqa liqeessitetteke manni duuchchi'a duuchchin wodda liqesse'neemmaka maallaqa insa'ne'aanni waali. 2 Tinnina Isira'eelichcho dayyo ifikee maallaqa liqeesseki duuchchi liqeessedheemmaka maallaqa waalowwaal: tinni wogga Duuchchi woddiki Gootti manna duuchchanaa'n liqa waale sa'a'neexxe wogga kaddeemmaxxe Isira'eelixxe gosanaa'n maallaqa liqeesseeka hiisse adhdhoqqe. 3 Atike boga'n keessummumma dage ofo'leeke manji'a liqeessitetteka maallaqa hiissaashsha laqa dandeettatton: Isira'eelixe gosa'a liqeessitetteka maallaqa kinni hiisaashsha laqqoxxe.

4 Kaddomale'e Duuchchi Woddiki Gootti atiki Mageni dhaaldota'a ati'a qadaada atike asse uwwa'neeke bog giddo birasa'isse ate'e eebisaammaxxe oddo atixxe'n hiyyeessi afemabaan. Ani techcho kulaanneka ajajuwwa duuchcha laqqe Duuchchi woddike Gootta atike Mageni'a ajajendottole; Duuchchi woddiki Gootti ate'e horte quba saxxattoshsha assaan. 5 Tinni kaddaachchi Duuchchi Woddike Gootta atike Mageni'a hara ajajendottolenna techcho ati'a uwwaanneka konnee ajajuwwa duuchcha xexxe'achchoti hordoffatto wodda callan. 6 Duuchchi woddiki Gootti atike Mageni hiyyemmashshanni eebbisaammaxxe, ati heddo gosa gosake manni'a liqeesitatton; heddo gosa gosa manna galchitato malee ayyi hundanna galdabexxon.

7 Duuchchi woddiki Gootti atiki Mageni ati'a uwwa'nee boga'n hedheeke qachcha duuchcha'n hiyyeessi mitti hedhool dayyo atike kademmaxxe ookkone manjo'n godoba jabeeffattoxxe; maallaqakanna hoyyexxoxxe. 8 Tenne mannii'n anga affetteechcho duuchcha mitte mami belo isi'a liqeessi.✝ 9 Laqi gataaxxi torbaxxi wogga gelteen hita'na rakkichcha atike dayyi'a liqa hoyyexxoxxe; iitta hedheeka elobaaka yaado qalbete'n uggudhitoxxe'e; liqa hoyyexxottole rakkichchi dayyi atik Duuchchi Woddike Goottiba'a raaraan: ookkone wodda ate'n cubbote kaddaan. 10 Tenne mannii'ni qoxxinni beloo ifixxe uwwashsha mitte godobinini uwwi: tennenaa'n kexxeexxa Duuchchi Woddik Gootti atik Mageni hujjaattexxe hujenninna kaddo wele yaane duuchchan ate'e eebbisaan. 11 Buttate'n fedheexenni rakkichchinna hiyyeessi gophemabaan; tennexee ookko'o hexxeexxa rakkiyyenna hiyyeeyye dayyuwwa atika gargaartattoshsha ajajaanne.✝

12 Isira'eelixxe gosa giddii'n labbakenna kado meyyaki mitte manji garba assedhe ate'n ifi gurgudhdhoole; jaane wogga ergatemeechchi uduma torbaxxe wogga'n garbummatenaa'n fulaashsha assitatton: 13 Garbummatenaa'n iso'o fulchitatto wodda anga duwwixinn geegeessitoxxe: 14 Duuchchi woddiki Gooti ati'k Mageni uwweexe karranaa'n gedhebi giddii'n, midhatenaa'ninna woyineti bulbulonaa'n uwwa eeyyanteti isi'a uwwi. 15 Konneechi edo atinna Gibtseke boga'n garba kaddeettaaxxanna Duuchchi woddiki Gootti qullo fulcheexxa deetoxxe: aninna techcho konnee ajaja ate'n kulaanneki tenne daafenaa'n kexxeexinniten.

16 Dedha atiba hedheki garbichchi «atinni afo'i weli aagemmaxxe'e ateenna mini hado atika eeyye me'abe'non» hiyyoole, 17 atike minike mikkilisanjo'n mutik mansha isixxa uri; ookkonechchi uduma rewoti qici'n atike garba kade hedhaan: meyyaxxenna kaddoole iittanni assi. 18 Isoonna mine atikenaa'n nage'iki fulchitatto wodda mitti garbichchi jaane wogga'a uwwa'neexxe la'o iima ati'a assemmaxxee ittanna yaaddoxxe. Yoona ati eloxxa isi'a assitoottole Duuchchi woddiki Gootti atik Mageni jiro atixxa duuchcha eebbisaan.✝

19 Horattetteke; lalo, gedhebo, konne horattetteke heddo hori giddi'n edise ilemeeka labaka duuchcha Duuchchi Woddike Gootta atike Mageni'a gargar foyeme hedhaasha assite waali; edisse ilendeexxa sangooluwwati huccitoxxe; iittan gedhebuwwi giddii'ni edise ilemeerika orda cirtoxxe.✝ 20 Isi fi'leeke boonno'n atinna mini hadi atik wogga wogga'ninni Duuchchi Woddike Gootta atike Mageni edo konneechchuwwa ittaton. 21 Yaane kinn laloke'n, gedheboke'n komachchiissaachchi mitte afoole fakkeennake'e lekka naafoole, ille ba'oole, yookaan wele rakkonna afeeke kadoole, konneechchuwwa Duuchchi Woddike Gootta atike Mageni'a tolchake assite shiqishshoxxe. 22 Iitta hedheeka hore lalo gedhebo mine ha'nooge'n itte; battumma fuldineeke yookaan fuldinebaake kaddinoolenna Gadansakanna Geedunjo ittinammashshanni duuchching konneechuwanna ittinaan. 23 Mundetanna butta dhangalaase malee'e ittinoqqe.✝