1 Yoona Duuchchi woddika Gootta atika Mageno eeyyi; isi atenaa'ni hasaaxxa, aada isixxa:

Isika seeranna ajaja isika duuchchi wodda heqqedhi. 2 Duuchchi woddike Gootta ha'nookee Mageniinka xixichcho, tinninna isixxa hunnaamette anga, jabaxxa isixxa hirre uuddee baretteexxi oose ha'nooxxee kaddebaak ha'note kaddinemmaxxe'e techcho qalliyye. 3 Gibtse giddo, Gibtseke moyanjo Feri'ooni'ninna sike boga duuchcha'n assemmaka beessisuwwanna hujeexxa yaanuwwa,✝ 4 Gibtseke sannachuwwa'n, fadhaduwwa insa'neeke'ninna fadhadiinxe insa'nexxe gaarruwwa'ni ha'no'o shorraamma wodda Eritiriinxe Abbaayya giddo insa'nee Duuchchi Woddik Gootti hitta liqiinsemmaashsha asseexxi bireexxa qaabbatte.✝ 5 Qiilla gammoojjenaa'ni kaba geltinaa qico'ni ha'no'a asseexxa uuddeexxi ha'nooxxe oossebaan. 6 Roobelka belto Eeliyaabixxe oose Daataninna Aberoomii'i insa'neeke mini hadinninni, insa'neeke duunkaanuwwinninna insa'neeke hor duuchchinninni Isira'eelike ardixxe ille edo butta hitta haanniteexxi insa'ne'e liqiinsiteexxa ha'noxxe oosebaan uuddeexxi.✝ 7 Ha'nooxxi ille kinni Duuchchi Woddik Gootti hujeexxa huje duuchcha uudde'een. 8 Tennexxee Yoordaanosi fooffine'e dhaaldinaaka boga e'yitino'anna abixxitino'a hunna alfitinaashsha ani techcho ha'no'aa uwwaanneka ajajuwwa duuchcha heqqedhdhe. 9 Seera isikanna heqqexxinoole Duuchchi Woddik Gootti edike annuwwa ha'nookeenna horte insa'neexxee duuchchi'a uwwo'a kakateemmaka ookkone elokenna shamoke boga'n qeerraka baro hexxinaan. 10 Kunni dhaaldaatteki bogi ookkone giddii'n fuldetake hiddichuwwaken wode'e ha'wisammashsha sanne rolkitetteke fichchi giddo mammarenda'n wode'e ha'wilsitaattake Gibtseke bogishshatebaan. 11 Yordaanosi'i fooffettexxi dhaaldotta'a me'itaattek bog kinni xeena iimi'n ha'wa'neeke koobuwwatikenna dhooquwwa callike bogan. 12 Kunni bogi Duuchchi Woddik Gootti atik Mageni isi'a xexe'ata'neeke, woggatike ke'itonaa'n woggatike muuxami qico'n Duuchchi woddik Gootti ifixxen uuda'neeke bogan. 13 Ani techcho ha'no'asa uwwaneeka ajajuwwa addatensha heqqexxinoole, tinninna Duuchchi woddika Gootta ha'nooka Mageno eetinoole, mitte godobinni, shenitte hedhonni isi'a ergatendinoole, 14 Midha ha'nooxxa, woyyine ha'nooxxanna, ejersiinxe zayiteka haqqichcho bukki assexxino'aa mayetikanna haarsika xeena boga ha'nooke'ni ganaaxxe yanna'inni gansiisannon. 15 Hore ha'nookee arso bira saxxe'e hexxaashsha assanon; ha'nonna godditine'e ittinaan. 16 Yaadi ha'nook ha'noo dedhisee'na'a wele magenuwwa magenooffattine sagadinabaashsha heqqedhdhe. 17 Wele magenuwwa magenooffattinoole Duuchchi woddike Goottixxi mufe ha'no'n bubbaan; isinna xeeni ganabaashsha, buttinikinna midha fulchabaashsha iima cufaani; ha'nonna Duuchchi Woddik Gootti ha'no'a uwwa'neeke eloke boginanaa'ni ikki woddi baxxinaan.✝ 18 Konne anika hiyyichchuwwa godoba ha'nooke'ninna sammo ha'nooxxe'n galchedhdhe; iso'o anga ha'nooxxe'ni beessisiinshanna usudhdhitine'e kallachcha ha'nooke'ninna uggudhdhe. 19 Konnee ajajuwwa atixxe oose'ninna barsiisi; mine atike'n ofoldato woddanna, ora me'itatto wodda, dhiiphphato woddanna, kexxatto wodda konne ajajuwwixxa haaso'we. 20 Mine atikike mikkilanjo'ninna atike dalla'ixxe hulluwwa'n konne ajajuwwa borreessi.✝ 21 Tenne'e assitinoole Duuchchi Woddik Gootti edike ha'nooke annuwwi'a uwwo'a kakateemmake boga'n ha'nookinna oose ha'nooxxik bari buttati iimi darre hexxeexxe iimuwwatike barishsha qeerredhdhaan. 22 Duuchchi woddika Gootta ha'nooka Mageno eetinashsha, ora isike duuchcha'ni me'itinaashanna isinni mittoondinaashsha hordoffino'a ha'no'a uwwaaneka konnee ajajuwwa duuchcha xonxoommachchot heqqedhdhe. 23 Ookkonechchi uduma Duuchchi Woddik Gootti konne gosa gosaka arda duuchcha ha'no edii'ni fulchaan; ha'nonna, ha'noo irranna lumookenna jabake kadeeke gosa gosake arda dhaaldinaan. 24 Lekka ha'nooxxenni hexxineek bogi duuchchi ha'nooke kadaan; ha'nookee bogixxi gabalanna qiilla gammoojjenaa'n Libaanosi qico'ni, Efiraaxisike galaanibaa'ni kexxe'e dhidhimi darre'n hexxeexxe abbayaqico'n geltaan. 25 Huuni manjinna ha'no'o dande'e injifatabaan; Duuchchi woddiki Gootti ha'nook Mageni ha'no'a uwweemmaxxe addachchiisashshanni ha'nooxxa alalshanna ha'noxxa sodaachchisa martine geltineeke boga duuchcha'ni uggaan.✝ 26 Kunnise ani, techcho eebbatenaa'ninna yowwichchokenaa'ni mitte fi'litino'a ha'no'o edo uggeennen 27 Ebisema techcho ani ha'no'a uwwaanneka Duuchchi woddike Gootta ha'nooke Magenika ajajuwwa duuchcha muuxxinoolte kadda wodda, 28 Yowwensha kinni Duuchchi Woddike Gootta ha'nooke Magenika ajajuwwa muuxa gibiyyo, egendinebaaka ha'no wele magenuwwa hordofatee'e ani ha'no'o ajajaanneke orinaa'ni fuldinooleten. 29 Dhaaldota'a martaatteke ookkone boga'n Duuchchi woddiki Gootti atik Mageni atee'e aassaa wodda eebisa isixxa Geriizanixxe kooba hana, woyya isika kinni Geebaalixxe kooba hana lallabbatton.✝ 30 Tinni koobuwwa afendaabi Yordaanoosi wido arishsho e'yitamma darre'n hedheeke oranaa'n dhidhimi darre'ni Araba giddo hexxaammaxxe Kenaanitotike bogi giddo Geligeela albi edo Moorexxe lumolla haqquwwa birabaan. 31 Duuchchi Woddik Gootti ha'nok Mageni ha'no'a uwwa'neeke boga'ni aagineexxi giddo hexxino'a Yordaanoosi'i fooffino'ate kaddeemmaxxe'e, boga ookkone'e dhaaldineexxi isi giddo hexxinaaxxa yanna, 32 techcho ha'no'a ani uwwaanneka seeruwwanna aaduwwa duuchcha muuxiyyotee xexxe'achcho asse.