1 «Leewwito qeesole; wele dhiisin madad Leewixxe gosa gosaki mini hadi Isira'eelixxe gosa gosake mini hadinni welti ifike hinaaka qadaada anfebaan: isixxe bakka'n Duuchchi woddike Gootti'a shiqaaka tolchanna uwwa inda'n he'naan. 2 Dayyuwa insa'nekee Isira'eelixxe oddo'ni qadaada anfeebaan: haaso'emmashshann Duuchchi woddiki Gootti fichcha insa'neeken.✝

3 «Jibichcha yookaan Gedhebiinka buruussa tolchaa wodda qeesole Haye, Boqotanna, Gadhaachcha adhdhitowwaal. 4 Huccitettexxe midhanaa'ni, woyineti bulbulonaa'n, ejersiinxe zayitenaa'n, sirete'ni cirtetteettaxxa gedhebiinxa orda midde mittiichi gatebaangi umiinxe uwwa assite'e uwwi. 5 Insa'nexxe oddo'ni duuchchi woddi'a qeesete kande ergatemmaashsha Duuchchi Woddiki Gootti Mageni Leewwixxa gosa fi'le'een.

6 «Mitti Leewwichchi hedha'neeke fedheeke Isira'eelike qachchi giddo Duuchchi woddiki Gootti fila'neeke boonchibaa dagatee halcha lumoxxa afoole; 7 Ookko'o ergatendammaxxee Leewwito dayyuwwishshanni Duuchchi woddike Gootta ifike Mageni edo hedhe ergatemowwaal. 8 Mini hadika karra gurgure maallaqa adha'noolena midde isinna ifixi oosuwwa wele qeesolle adhdhita'neexxe qixxe'n adhdhaan.

9 «Duuchchi woddiki Gootti atiki Mageni uwwa'neeke bogibaa martatto wodda; ookko hedha'neki ard huja'neexa elobaaxa yaane duuchcha hordoffoxxe. 10 Atixxe oddonaa'ni ayyinna labba belto; yookaan meyyaxxa giirate'n tolchoqqe: yookaan dhariinka beessisa kulaaki, hayyaataaki, gojotik manji hedhoqqe.✝ 11 Yookaan diginte daggamaak, fuggichcha hafuura ye'edhaak, moraakinna ekedha haaseessaak atixxe oddo'n afemoqqe'e.✝ 12 Konneechchuwwa hordofaak duuchchi Duuchchi Woddike Gootta atike Mageni edo jibbendeexxenna elobaaxe yaanen: ati edi'a me'itettexxe qixxe'n Duuchchi Woddiki Gootti atik Mageni arda ati edii'n fiissa'neek iitta hexxeexxa elobaaxxa battitte yaane hunjammaxeeten. 13 Ati kinni Duuchchi Woddike Gootti'a addatendeetteke manjo kadiyo hasissaan» hiyye.✝

14 Ookkoneechchi uduma Muussenna kunni boga insa'neeka nageessite dhaalchissaatteki ard morsisatanna xanote eenan: ati kinni Duuchchi woddiki Gootti atik Mageni tennee'e assitotaa eeyabaan. 15 Duuchchi woddiki Gootti ha'nooki Mageni gosa ha'nooxi giddii'n iitta anishsha hedheeka wabeeka filowwaal: Isi hiyyaaxa duuchcha laqqine ajajemme.✝ 16 «Siinaxxe kooba iima bukki hitineemma wodda reyaannen hite sodaatati Duuchchi woddiki Gooti atiki Mageni langaxxa ate'n haaso'abaashshanna manbe'iinke beessisinni leelleexxa sodaachissa'neexxe giira ifi ege'nishshaa'naa uuddabexxoshsha hitee laqqeettan» hiyye. 17 Tennexxee Duuchchi woddiki Gootti hiyye qic: «Seerinigen qortuman. 18 Atishsha hedheeka wele wabeeka dayyuwi insa'neeki giddii'ni filannon: isi haaso'aka hiyyichcho uwwannon: ani ajajennexxa duuchcha ardakee haaso'aan: 19 Anike summinni haaso'a'neeke wabeekika hiyyicho laqabaaka duuchcha ani iso'o qorannon.✝ 20 Yaane kinni ani ajajebe'noxa feeteenxa yaane anike summin haaso'ate'e wo'laanaaka wabeeka, yookaan wele dharichcha magenuwwike summin haaso'a'neeki wabeek shiyemowaal» hiyye.

21 Atinna qalbeti, «Mitti wabeekichchi haaso'a'neek raagi Duuchchi woddike Gootti ga'mii'n uwwendebaaxe kaddeexxa mayiki foye ege'nanno?» Hite dedha laqqatoxxe hexxeen. 22 Mitti wabeek Duuchchi woddike Goottike summinni haaso'ee'naa hiyyeexi muuxema gophphoole; iikki wabeek futti hiyyeeshshanni haaso'eexxe malee'e Duuchchi woddike Gootti ga'mii'n uwwedee'naa haaso'eeke hiyyichcho kada gophemmaxxee sodaattoxxe.