1 Muusenna Isira'eelike ardi'a tennee duuchcha haaso'e ke'eechchi uduma; 2 Hiyyee qici; «Yoona anxi wogga dhibbanna diddama kaddemmaxxe'e ta'in edi'a ha'noo akeeka dande'abe'non: konneechchi uduma ani Yordaanoosika galaana foofabo'noxa Duuchchi woddiki Gootti ane'n kule'een.✝ 3 Duuchchi Woddi Gootti atiki Mageni ati'a edo sa'e me'aan; konne gosa gosaki arduwwinna ati edii'n insa'nee ballessaan; atinna boga insa'neeka dhaaldattoni; Duuchchi Woddik Gootti haaso'emma qicinni Mageni Iyyaasu edise foossaan. 4 Duuchchi Woddik Gootti Amooritotika moyanjuwwa Sewooniinna Oogi'i boga insa'nengenninni balleessemmashsha konneeranna balleessaan.✝ 5 Duuchchi Woddik Gootti insa'nee ha'no edo sa'isse ha'no'a uwwaan; ha'nonna insa'ne'n ha'no'o ajajennexxa duuchcha insa'ne'n assitina. 6 Jabaatte, worbe shenumma ha'no'ni hexxowwaali: insa'ne'e soodaattinoqqe, godoba gurtinoqqe: Duuchchi Woddik Gootti atik Mageni atinni welti hedheen: ha'no'o dedhabaan: waalabaan» hiyye.

7 Konneechchi uduma Muuse Iyyasu'u ye'eexi Isira'eelike ard duuchchi edo hiyyee qici; «Jabaatte, worbe, shenummandinni hedhi: Duuchchi woddiki Gootti edike annuwi'a kakatemmashshanni boga adhinaashsha arda filde qophexxaattek atenden: 8 Duuchchi woddiki Gootti umi isingenni atinni wolt hedhe akeekaan: hunabaan: hara waalabaan: tennexxee sodaattoxxe: godoba gurtoxxe» hiyye.✝

9 Muusenna ookkonee seera borreesseexxi Duuchchi Woddike Goottika kakotika taabota dukkammaxxe qeesole Leewwixxe horte'anna Isira'eelike ardike akeesanjuwwi duuchchi'a uwwe. 10 Ookkonechchi uduma Muuse insa'nee hiyye ajajee qic: «Liqi waalemaaxxa duuchchin woddi'a torbaane woggake muuxxama'n fooqiinka ayyaana wogga wogga'n ulfeessemammaxxe barra'ni,✝ 11 Isira'eelik ardi duuchchi Duuchchi Woddike Gootta atike Mageni edo isi fi'leeke booncho'n bukki hinaa wodda konne seera insa'nee edo haaseessi. 12 Duuchching Duuchchi Woddik Gootti hiyya'neexxa lanqeexxi barantaashsha, sodaantashshanna konne seerika hiyyichcho duuchcha xonxomante heqqe'naashsha labbakanna, meyyakanna, oosetanna, qachchuwa ha'nooke'n keessumummati hedha'neeka mannanna mitteba bukki asse. 13 Konne qicinni Duuchchi Woddike Gootta ha'nooke Magenika seera laqqeebaaxxi horte ha'nooxxi duuchcha isixxa laqqaaxxe hexxeen: Tennexxee Yordaanoosi'i fooffine dhaaldina'neeke boga'n he'naake baro duuchcha'n Duuchchi Woddike Gootti'a ajajensha barantowwal» hiyye.

14 Konneechchi uduma Duuchchi woddiki Gootti Muusee hiyyee qici; «Dedha atixxe lubbo'n daggaaxxi yaane hexxaan: akeekaashsha ajajuwwa uwwonnaa Iyyaasuu yexxe atinna isi Duuchchi woddiki Gootti ulfinniki leela'neek duunkaani giddi'a shikki hiyye» hiyye. Muusenna Iyyaasu ookkone duunkaaniba marre: 15 Duuchchi woddiki Goottinna duunkaani iima duumanchik leelle; iikki duumanchinna duunkaaniinxe huddume iima uurre.

16 Duuchchi woddiki Gootti Muuse'e hiyyee qici; «Yoona ati rerte'e edike annuwa atikibaa me'itottaaten; ookkoneechchi uduma kunni ard isin wolt ageemmaxxa kako waalan. Aneenna dedheexxi mara'neeke boga'n hexxeexxa adibaaruwwa magenooffataan. 17 Tinni kaddaa wodda ani insa'ne'n mufeti gargaritti hiissannon: yaada anka insa'nenaa'n sho'edhannon: inisa'neenna renne mundaan: insa'nee'ninna heddo elobaak dhukub abidaan: Ookkone wodda; ‹Tinni rakko no'o'n dagge'ebi Mageni no'ok oddo no'oxxe'n hedha gophemmaxxeetebaa?› Hinaan. 18 Miseelchixxa fakkuwa magenoofatat hunjeexxe cubboxxe daafen Ani ookkone wodda ijje gargaarabe'non.

19 «Tennee faaro borreessite Isira'eelike arda'n barssiisa'n faarsinaashsha assi: tinni faaronna insa'ne'n dhugaa anxe kaddaan. 20 Edike annuwwa insa'neke'e kakatenneshshanni malebikinna adoti celqe hiyye duroome bogibaa insa'ne'e imarannon: insa'nenna ookko'o inde goddinee furdanteexxa yanna anee'e deenaan: aangemmaxxa kako waallexxi wele magenuwa magenooffantaan. 21 Heddo jabaxxi rakko geltaa wodda tinni oose insa'nexe'n dedhendabaaxxi faaro farsendaa wodda tinni insa'ne'n dhuga'a kulendaan. Insa'ne'a uwwonna afo'o sa'enneke bogibaa marre gennebaang edigam ta'anni maa yaada anfeexa ege'neennen» hiyye.

22 Eettene barra Muuse faaro borreessexxi Isira'eelike arda'n barsiise.

23 Konneechchi uduma Duuchchi woddiki Gootti Neweka belto Iyyasu'u; «Jabaat shenummaniddinni hedhi: Ani uwwonnaa afo'o sa'enneke bogibaa Isira'eelika arda aaxxe imartatton: aninna atinni wolt hedhannon» hiyye.✝

24 Muusenna konne seerika hiyyichchuwwa muuxamini qico'n maxaafake'n borreesseechchi uduma; 25 Muuse Duuchchi woddike Goottika kakotika taabota ba'exxa'neexxi leewwito hiyyee qici; 26 «Mageniiki seeri borreesemeek konne maxaafa aaxxineex; Duuchchi woddike Gootta ha'nooke Maginik kakotike taaboti bira ugge: konneqicin ardake'n dhugaa kulatee insa'ne'a kaddaan. 27 Isira'eelik ardi hittee qico jallaameyyenna fuggaaleyyet kandeexxa ani ege'neennen: ani ifi ege'ne insa'nen hedheennexxenninni midde Duuchchi woddike Gootta'n jallineeshshanni he'neen: anxe rewo uduma fa'i konne caala jallinaan: 28 Tennexxee tenne duuchcha kulonnaa gosa insa'neexixxa hayyooletanna arda galchitammaxxa sooreesuwwa ani'a bukki assi: Ani iimate'ninna buttate'n ku'le waalannon. 29 Anxe reyo uduma ku'lenneka ajaja waalle ke'ne battootto yaane hunja'neexa ege'neennen: Duuchchi woddike Gootti edo elobaaxxa yaane hunje iso mufachiinsaammaxxe aareexxi fuggoxxinni ke'aan» hiyye.

30 Konneechchi uduma Muuse bukki hoyye hedheek Isira'eelik ya'i duuchchi edo tenne faaroxa hiyyichchuwwa ke'itokenaa'n aadhe muuxamiqico'n haaseesseen.