1 Eettenne yanna Duuchchi Woddiki Gootti anee hiyyee qici, «Edi woddixxishsha hexxeexxa lame kino boccetteexxi aniba'a koobbati hana fuli; saaxinetanna haqichchik giisi. 2 Ani atii enqitettexxe edi woddixxe bocendeexxe kino'ni hedhemmaka hiyyichchuwwa tenne bocendeexxe kinuwa'ni borreessannoni; atinna tenne bocendeexxa kino saaxine giddo uggitatoni.»

3 Tennexxee ani waaccotike haqichchika Taabota giissennen; ediwoddixxishsha hexxeexxa lame kino boce'e giissennen; lamiinxa bocendeexxa kino anga abixxennexxi koobate'ni fulenne. 4 Duuchchi woddiki Goottinna koobati hunda bukki hitineemmaxxa barra giirati giddo hedheexxi ha'no'a haaso'emmaka edi wodda borreessemmanga tomme ajajuwwa tenne bocendeexxe kino'ni borreesse. Duuchchi Woddik Goottinna tennee bocendeexxa lame kino ane'ni uwwe. 5 Ookkonechchi uduma koobatenaa'ni hige dirrenne; Duuchchi woddiki Gootti ane'e ajajemmashshanni saaxine giddo tenne bocendeexxa kino uggenen; eetene yannannaa'ni saffe'e yoonna ookkonni hexxeeni. 6 Isira'eeliki ardi Bi'eeroti'ni Bine Ya'iqaani hiyyemaake wode'inke baleessuwwibaa'ni ke'eexxi Moosera'a me'ine; Aarooninna ookko re'e moogeme; beleti isik Ali'aazaarinna isixxe bakka'ni qeesome. 7 Isira'eelik ardinna ookkoo'n ke'neexxi Gudigaada hiyyemaake boonchiba'a me'e; ookkoo'ninna heddo wode'inxi muummuwwa hexxemmaba Yooxibaata hiyyemaake bogiba'a me'e. 8 Eettene yanna Duuchchi Woddike Gootti'a ergatemo'a isike ardi edo uurro'a summi isikenni arda eebiso'anna isika kakotika taabota duko'a Duuchchi Woddi Goottik Leewwika gosatika mine gargar foye; techchonna Leewike gosatike minike ardixxi ergatensha tennende.✝ 9 Leewwito dayyuwwi ifikixxe oddo'n qadaada yookaan qoobbo afagopheechchi tennenaa'ni kexxeexxen; Duuchchi Woddik Gootti atik Mageni insa'ne'n kulemmashshanni issa'nek qadaad Duuchchi Woddike Goottan. 10 Aninna siretixxe yannashshanni, koobate'n shoole tomme barranna shoole tomme hashsha turennen; eettenee yanna Duuchchi woddiki Gootti higgeenni soodachcho anixxa laqeen; ha'noonna bira eeyyeba'a.✝ 11 Tennexxe'e Duuchchi Woddiki Gootti ane'e, «Missi, insa'neeke edike annuwwaa uwwonaa kako aagennaka boga e'ye'e dhaalashsha konne adara akeeki» hiyye.

12 Ta'anna koo Isira'eeli Duuchchi woddiki Gootti atiki Mageni atenaa'ni hasa'neechchi maachcho? Duuchchi Woddika Gootta atka Mageno sodaattottaa'a, isika ora duuchchanna me'itottaa'a, isoo'o eetotta'a, mitte godobinninna, shenitte hedhonni isi'a ergattottaa'a, 13 eloxxi ati'a kaddo'anna techcho Ani ati'a uwwaanneka ajajuwwanna aaduwwa heqqexxottaateba?

14 Iima, iimati iimidarre hexxeexxi iimuwwa, buttanna ise giddo hedheechchi duuchchinna Duuchchi woddike Gootta atike Mageniken. 15 Yaane knni Duuchchi woddiki Gootti edika atika annuuwwa ifike assedho'a haseexxi insa'ne'e eeye; techchonna kaddeeshshanni insa'neexxe horte ha'no'o gosa gosake ardi duuchchana'ni gargar foye fi'le. 16 Tennexxee qalbe ha'nooxxa jila ofo'le; ta'anni udumi'a yoona gooba ha'nooka micciirtinoqqe'e. 17 Mayee? Duuchchi woddik Gootti ha'nooki Magen magenoke hiyyemeechchi duuchchike Mageno, gootoletike gootta, Lumoke Magenon, hunnaameessakenna sodaateme'eke, gamisabaake, mattakanna adhdhabaaken.✝ 18 Isi anna affebaaxxe oose'anna aro'i reyeexxe melaalle'a dhuga'a muraaken; isi annafee boga'n hedhaaka manna eye'e itaachchonna oddoonno uwwaaken. 19 Tennexxee ha'nonna Gibtse annafee boga'n hexxinemmaxxee ha'nooke boga'n hedheeka annafee bogi manna eeyye. 20 Duuchchi Woddika Gootta atika Mageno sodaati; isoona magenooffat; isinninna mittoomi; summi isikenni kakati. 21 Saaddattok isoten; ille atixxenni uudettexxa eettenee lumollanna sodaachchissaaxxa yaanuwwa ati'a asseek atike Mageno. 22 Atike edik annuwi aade Gibtse me'e wodda torbaane tomme mannaman; ta'a kinni Duuchchi Woddik Gootti atik Mageni atee'e iimixxe urjeshsha horte faqqattoshsha asseen.✝