1 Ta'anna koo Isira'eelike arda hedhoti hexxinaashsha ha'noke annuwwiki Duuchchi Woddiki Gootti Mageni ha'no'aa uwwaake boga'ni e'yitinaashshanna Dhaldinaashsha ha'noo ani barachchiisaanneka seeruwwanna aada laqqine heqqeedhdhe. 2 Ani ha'noo ajajenneke ajaja'ni lebbinoqqe'e; isinaa'ninna xe'yishshinoqqe'e; yaane kinni ha'no'aa uwwaanneka Duuchchi Woddike Gootta ha'nooke Magenoka ajajuwwa heqqedhdhe.✝

3 Peeritsoorixxe kooba'ni Duuchchi Woddiki Gootti asseexxa duuchcha ha'no uudine'een; tinninna tenne kooba'ni Ba'aalte hine he'na'neexxa misile magenoonfataaka duuchcha isi olete asse'een.✝ 4 Duuchchi Woddika Gootta Mageno ha'nooka hordoffineek ha'no duuchchiing kinni kunni techchi qico'ni hedhoti hexxineeni. 5 Duuchchi Woddiki Gootti anki Mageni ha'noo'n kulonna'a anee ajajeemmaka seeranna aada duuchcha ha'no'n barachchiise'eennen; ookkone dhaaldino'a e'yitina'neeke boga'n hexxinaa wodda konne ajajuwwa ajajemme. 6 Konne seeruwwa uuddaaxinni laqeek, «Dhugaandinni kunni lumok ard beekakenna qalbeeffachchotiken» hiyya'neeke gosa gosake arda'n tinni ha'nooxxi xexxe'achchonna ha'nook beekumi ha'nooxxa qalbeefachcho leellishshaammaxxee konnee seeruwwanna tennee aaduwwa xexxe'achchoti heqedhdhe. 7 No'o isoo soodantanno wodda duuchcha Duuchchi Woddik Gootti no'ok Magen no'aa shiqaashsha, hoone gosake lumoke arda isik magenuwwi isi'a shiqaak? 8 Techcho ani ha'noo edo uggeenekee seerishsha hexxeexxa, qullte kaddeexxa aadanna seera afeek weli lumok gosatik ardi hoontesi? 9 Ille ha'nooxxinni uudineexxa yaanuwwa deetinoqqe'e; iittanni hedhoti hexxineeke barro'n tinni yaanuwwa godoba ha'nookenaa'n baxxabaashsha calla heqqedhdhe; ifinna xonxoommatte; tennee yaanuwwa ha'nooxxe oose'ninna ha'nooxxe oosexxe oose'n barachchiisse. 10 «Insa'nenna ookkone boga'ni he'naa wodda duuchcha anee ulfeessa barantaashsha oose ifixxe'ninna barachchiinssaashsha hiyyichcho anika laqo'a arda ani edo bukki assi» anee hiyyee wodda Koorebi Duuchchi Woddiki Gootti ha'nook Mageni edo uurritineemmaxxa barra qalli hiyye. 11 Kooba dimma dukkananna raachcho'eeki duummanchinni buqqemee'na'a bubenikinna iima geyaa qico'n gubattaamma wodda dagineexxi koobati hunda uurritine.✝ 12 Ookkenee wodda Duuchchi Woddiki Gootti giirati giddo ha'no'n haaso'e; ha'noonna isika haaso'iinka hafuura laqqinee malee'e bifa uuddinebaan. 13 Isi eettene ifixxa kako tinninna hordoffino'a ha'noo ajajeemmaka ookkonee tomme ajajuwwa ha'no'n kule; isoonna lame bocendeexxe kino hananna borreesse.✝ 14 Yordaanosii'i fooffineexxi dhaalidinaa bogi giddo hordofinaaxxa aadanna seera ha'non barachchiisonnaa ookkonee wodda Duuchchi Woddik Gootti anee ajaje.✝

15 Siinaxxe kooba hana Duuchchi Woddiki Gootti giira giddo ha'noo'n haaso'eexxa barra mitte bifanna haranga affineemmabaan; tennexxee ha'no umo ifika heqqedhdhe. 16 Tennexxee labbakixxe yookaan meyyaxxixxe bifaxxa fakke giissexxine battoottinabaashsha heqqedhe'e.✝ 17 Yookaan Buttate'n hedheeke hoone hori biniinchixxa iittan heene keelik phirri hitaaxxe ci'axxa fakke, 18 Yookaan hoone godobik me'aachuwwixxa fakke, wode'i giddo hexxaaxxe heene qulxu'muwwa fakkee giissexinoqqe'e.✝ 19 Iimi'aa qokki hite'e arishsho, bagenjokanna urjuwwa, iittanni iimattixxa daduwwa duuchcha uudato wodda sobende konnechchuwwa magenoonfataboxxoshsha, Duuchchi woddiki Gootti atik Mageni iimati butti'a hedheeke gosa gosake ardi duuchchi'a qoobbo asseexxi uwweemmaxxa yaane duuchchanna magenoonfattaboxxoshsha heqqedhi. 20 Ha'noo kinni iitta telcho hexxineeshsha qadaada isike kaddino'a Duuchchi Woddik Gootti ha'nook Mageni ha'noo sibilo baqinsammaxxe boosumma fakkaataak Gibtseke boginaa'n fulcheexxi iyyedage.✝ 21 Ha'nooxxe buutonni Duuchchi Woddik Gootti ane'n aareemmaxxee Yordaanoosi foofabe'noshshanna Duuchchi Woddik Gootti ha'nook Mageni ha'no'aa qadaadake asse uwwaake ookkone eloke boga'n e'yabe'noshsha afo'o sa'e.✝ 22 Tennexxee ani Yordaanoosi'i foofabe'no; ha'no kinni fooffineexxi ookkonee eloka boga dhaaldino'aaten. 23 Duuchchi woddiki Gootti ha'nook Mageni ha'no'aa aageexxa kako deetinoqqe'e heqqedhdhe; Duuchchi Woddik Gootti ha'nook Mageni ha'noo hoyyeemmaxxa hoonchixxa fakke ifi'a giissexxinoqqe'e. 24 Duuchchi woddik Gootti ha'nook Mageni ittaaxxe giiran; hinaattichcha Magenon.✝

25 Oose i'litinee oosetixxa oose uudineexxi ookkone boga'n qeerraxxa wogga ofoldinaaxxa yanna Duuchchi Woddike Gootta ha'nooke Mageni edo fuggoxxe kaddeexxa heene bifaxxa fakke giissedhati ifi battossitineexxi Mageno mufachchiissinoqqe'e. 26 Tennee assitinoole Yordaanoosii'i fooffineexxi dhaaldinaake boganaa'n iikki woddi baxxinaaxxa telchixxa barra ha'noo'n iimatanna butta dhugaa abixxeennen; ookkone booncho'n qeeraka baro hexxinabaan; muda ha'nooxxi dhugaaten. 27 Duuchchi woddiki Gootti gosa gosake ardi giddo ha'noo xeeraan. Duuchchi woddiki Gooti ha'noo xeeraake gosa gosake arduwwi giddo ha'noo'n lubbo galaak hee'noke manna callan. 28 Ookkonna afabaake yookaan laqabaake yookaan itabaake yookaan ulatabaake manjixxi anga giissiteeka haqichchiinkanna kinjiinka magenuwwa magenoonfattinaan. 29 Yaane kinni ookko hexxineenbaa'n Duuchchi woddika Gootta ha'nooka Mageno mitte godobinninna wo'ma hedhonni halsitinoole isoo alfitinaan. 30 Wixxirri hine'naa tinni yaane duuchcha ha'no'n geltaa wodda eettenee yanna udumike baro'n Duuchchi woddike Gootta ha'nooke Magenibaa ille iima higgineexxi isi'a ajajendinaan. 31 Duuchchi Woddik Gootti ha'nook Mageni uwwaake Mageno kadeemmaxxee ha'no waalabaan yookaan balleessabaa yookaan annuwwa ha'nookee kakateexxi kokkeesseemmaxxa kako dedhabaan.

32 Mageni manjo buttate'n dadeexxe barranaa'n ha'noo hexxinemmabaa edi darre hedhemmake edike barixxe qorre; iimatike mitte darreke kasinaa'n wele darreke kasi qico'n qorre; iitta hexxeexxi lumoxxi yaane kadde yookaan laqende egendeesi? 33 Giirati giddo ha'noo Mageniinka haaso'a laqinemmashsha wel ardi laqeexxi lubbo galaasi? 34 Duuchchi woddiki Gootti ha'nook Mageni ille ha'nooxxinni uuddinaa ha'noo'n Gibtse assemmashsha hega uushshoti, mambe'anna masso yaanuwwa assati, bagedik, isixxe hunnaameette anganninna jabaxxe isixxe hirrenni, yookaan lumoxxa bara bara assitaaxxa yaane assati wele gosake ardi giddii'n mitte gosaka arda ifike assedhe adhdheek weli mageni hedheesi?

35 Duuchchi Woddik Gootti is Magenoke kadeexxa isi gadhi darre weli mageni hedhebaaxxa egendino'a tennee yaanuwwa egendino'a assende.✝ 36 Ha'noo barachchiiso'a iimatenaa'n haaso'a ifka laqqinaashsha asse; buttate'ninna sodaachchissaaxxa ifixxa giira uuddinaashsha asse; giira giddi'ninna haaso'a isika laqqine. 37 Ha'nooka annuwwa eeyeemmaxxee, insa'ne uduma horte insa'neexxa ha'noo fi'leemmaxxe'e ifixxe jabaxxe hunnanni Gibtsee'n ha'noo fulcheen. 38 Telcho bogi ha'nooke kadeemmashsha ha'noo caala lumollammanna jajjabba gosa gosaka arda ha'no edii'n fulchiyyoti ha'noo insa'neeke boga'n e'yisheexxi qadaada ha'no'aa uwwo'aaten.

39 Yoonaa iimate'n buttate'n Duuchchi Woddik Gootti Magenoke kadeexxa telcho ege'ne; godobanna galchedhdhe isoo malee weli Mageni hedhebaan. 40 Ha'no'aanna ha'noo uduma ha'nooxxe oose'a eloxxi kaddaashsha Duuchchi Woddik Gootti ha'nook Mageni ha'no'aa duuchchi woddi'a uwwaake boga'n wogga ha'noxxi qeerrexxaashsha telcho ani ha'no'o ajajaanneka isika seeranna aada heqqedhdhe.

41 Eettenee yanna Muuse Yordaanoosii'ni boroti darre'n hedheeka sase qachchuwwa foyye. 42 Tennee asseechchinna edi wodda naaphake kadeebaaka manjo danoti shiyeek manji konne qachchuwwi giddi'n mittinbaa baajeexxi lubbo gataashshaten. 43 Kunni qachchuwwinna; Roobelke gosatike mini'a qiilla gammooje giddo goorote'n hedheeka Beetsoorka qachcha, Gele'aditotike gosatike mini'a Gele'adi giddo hedheeka Raamotika qachcha, Minaaseke gosatike mini'a Baasaani giddo hedheeka Golaanike qachchinaa'ni gargar hinigaasha asseen.✝

44 Kunni Isira'eelitote'n Muuse kuleek seeruwwi konnee butti'a hedheeken; 45 Kuninna Gibtsee'n fullee wodda Muuse Isira'eelitotee uwweemmaxxi akeette, aaduwwanna seeruwwi konneeraman; 46 kunninna insa'ne Gibtsee'n fullee wodda Muusenna Isira'eelito injifateemmake Haseeboni hedhaammake Amooritotika moyanjo Sewoonike bogi giddo Yordaanoosinaa'n borot darre'n Beetipe'ori bira hexxeexxe dhooqa giddo he'nemma woddan. 47 Insa'nenna Yordaanoosi'ni boroti darre'n hedheeka isika boganna Baasaanika moyanjo Oogika, lamiinge Amooritotike moyanjuwwika boga adhdhine qadaada ifike asse'ne. 48 Kunni bogi Aroonixxe dhooqake kasa'ni hedheeke Aro'eerike qachchinaa'n Seewoonixxe kooba qico'n, kunninna Harmooni'eemike galaani qico'n geyaake kada wodda 49 Yordaanoosii'n boroti darre'ni hedheeka Araba duuchchanna Feesikixxe koobuwwa butti darre hexxeexxa Arabaxxa abbaayya mittenba abideeken.