1 Naaphuwwa atika loldota'a duulo me'itatto wodda; fadhadokanna fadhadiinxa kaamolenna; hunna atixxi iima hedheeka manna uudatto wodda Gibtseke boganaa'n fulcheek Duuchchi woddiki Gootti atiki Mageni atinni welti hedheemmaxxee sodaattoxxe: 2 Lola ibbinebaa edi gama qeesichchi manniiba shiqqe hiyyaa qic, 3 Isinna: «Ha'no Isira'eelike arda! Laqqe! Ta'a yoona duuliinbaa me'itina'neen: naapha ha'nooka konnee'e sodaattinoqqe! Mee hunna ha'nooxi gooffowwal: raafendinoqqe! 4 Duuchchi woddiki Gootti ha'nook Mageni ha'noonni wolti me'ammaxxee midditte alfitinaan» hiyye.

5 Ookkonechchi uduma duulok ajajammaki manni duulamma manna'n hiyyaa qic, «Haaro mine ijaadhdhekinna giidhdhebaaki manji ha'nooxe oddo'ni meya hedhee? Hedhoole isi hadi'a higowwaal: isi duulo maraba dedha reyoole mine isika wele manjo giidhdhaan. 6 Yookaan woyinetike hiddichchika golqo kaalse umoke'n ra'iseeka bukki assedheb aak manji meya hedhee? Iitta hedheeki manji hedhoole hadi'a higowwaal: dedha duulo mareeba reyole woyinti bulbulo wele manjo la'onfaatan. 7 Aadhate'e dubarra kadhateek meya hedhee? Dedha iitta hedheeki manji hedhoole hadi'a higowwaal: dedha isi duulo mareeba reyoole isi kadhatemmaxxi belto wele manjixe are kaddaan» hiyye.

8 Ookkonechchi uduma akeekisanjuwwi, «Duulokee ajajaammaki manni higgeenni wele qortuma qora'noolle ha'nooxe oddo'n sodaate godoba gureeki manji meya hedhee? Iitta hedheeki manji dedha hedhoole hadi'a higowwaal: dedha iitta hedheeki manji hedhoole wele kanna daafaan» hiyyowaal. 9 Duulokee ajajaammaki manni; haaso'a konnee calla birreechi uduma mitti mittinige gamo'a ajajalluwwa fillowwaal.

10 Mitte qachcha balleessatee duuldinaa wodda edinse irbo uunaashsha nage'iinxa bukki fullaashsha lassi: 11 Dalla'iinxa ifi ifixxa hula ba'ninoole irbo uunaashsha nage'iinxa bukki fulloolenna ha'urtaaxxa huje ati'aa hunjowwaal. 12 Yaane kinn konne qachchiki ard irbo uunabe'non hine atee'e adhete'n ke'oole qachcha duuchcha buqqine abidde. 13 Duuchchi woddki Gootti atiki Mageni qachcha duuchcha atixxe anga'n sa'isse uwwaa wodda qachchi giddo hedheeka labballo duuchcha shilte biri. 14 Kaddoolena melaalletanna oosuwwa; horekanna qachchi giddo hexxeexxa karra duuchcha ifi'a boojite adhdhitatton: naaphiinxa karra duuchcha ifi'a la'oonfata dandeettatton: Duuchchi woddiki Gootti atiki Mageni kooneechcho duuchcha ati'aa sa'isse uwwaan. 15 Yoona ati hexxetteke boganaa'n hara bayyatte hedheeke gosa gosake ardixxe karra atixxe assexxebexxoka qachchuwwa hunnati abixxitatto wodda assitattoxxi konnechchinn butti'a hexxeexxen.

16 Duuchchi woddiki Gooti atiki Mageni qadaada atike asse uwwa'neeke boga'n hedheeka qachchuwwa duulde adhdhitatto wodda kinni giddo hedheeka manna shilte biri. 17 Tennexxee Keexitotixxe, Amooritotixxe, Kenaanitotixxe, Feeriizitotixxe, Hiititotixxe, Iyyaabussitotixxe gosuwwa duuchcha'ni Duuchchi woddiki Gootti ha'nook Mageni ajajemmashshanni konnee arda booso insa'neexxa balleessite biri. 18 Iitta assitina'neekinna yorte insa'neexxe dharichcha insa'neeka magenuwwa magenoofanta wodda busha kaddeexxa yaane duuchcha ha'no'aa barsiisati Duuchchi woddiki Gootti ha'nooki Mageni eeyabaaxa cubbo hujjinaashshaten. 19 Mitte qachcha booji'ate'e qopheeffattinnaa wodda lumoxxa yanna dooyyitina'n sa'issitinoole haqqetixxa gumma ha'no ita dandeettinaaxanna haqqetinna manjiinishsha dooyya gonphaammaxxe'e haqqe qurquurtoxxe. Dooyyitattaxxa haqqe woxxe balleessitaatteki manjoke ati'a kado'aatee? 20 Wele gummissa'nebaaxa haqqe kinn qachcha boojite anga ibirsexatto qico'ni woxxe tuulda'n dooyate'e eldaashsha la'onfata dandeettatton.