1 Duuchchi woddiki Gootti atik Mageni dhaaldotta'a e'yitattoke boga'ni ate'e iyyedagaa wodda heddo manna ate'e sa'aaka lumolammanna jajjabba kadeeka torbaane gosa gosaka arda: Keexito, Gergerisiito, Amoorito, Kenaanito, Feeriizito, Hiititotinna Iyyaabusito ati edii'ni insa'ne'e fulchano wodda;✝ 2 Duuchchi Woddik Gootti atik Mageni insa'nee atixxe anga'n sa'isse uwwee'na atinna injifatte duuchchiinga kutti assite biri; atinna insa'nenni weli aaggoxxe'e; insa'ne'aanna o'ittoxxe'e. 3 Ati dubara atika insa'neexxe labbaxxe oose'a heerunsiisse yookaani labbaxxe atixxe oose'a dubarra atika aadhisse insa'nenni balloondoxxe'e. 4 Tenne assitottole oose atixxi anee hordofa waalde wele magenuwwa magenoonfattaashsha assinammaxxe'e tennenaa'ni kexxeexxa Duuchchi Woddik Gootti yo'oshsha ate'ni mufate iikki woddi atee balleessammaxxeeten. 5 Yoona insa'ne'e assitinaaxxi, tolchimalchuwwa insa'neeka findigge, magenoonfatammaxxa fakkuwwa insa'nexxa butuchche; Asheera hiyyemmaka meyyake magenixxa fakke diige; magenuwwa insa'neekixxa fakkuwwa giirati gubbe;✝ 6 Ati Duuchchi woddike Gootta atike Mageni'a woyyichcha arda kaddeettaxxee; Duuchchi Woddiki Gootti atiki Mageni ifike ardanna geego isi'a kaddotta'a buttatike arda duuchchanaa'ni ate'e fi'leeni.✝

7 Duuchchi woddiki Gootti ha'noo eeyeekinna fi'le'eki wele mannanaa'n laakkoossiki bira saxxineexxetebaan; laakoossi ha'nooki arda duuchchanaa'ni hara shiixxokemmani. 8 Yaane kinni Duuchchi woddiki Gootti ha'noo jabaaxxe hirre ifixxenni fulchcheki; garibummati hexxinaamake boganaa'ninna Gibtseke moyanjixxe anganaa'ni ha'noo wodeeki Duuchchi Woddiki Gootti ha'noo eeyemmaxxeenna edike annuwwa ha'nookee aageemmaxxa kako heqqedheemmaxxeeteni. 9 Tennexxe Duuchchi woddiki Gootti atiki Mageni Magenoke kadeexxa ege'ni; isoo eeyaakaranna ajajuwwa isikanna heqqedhaake jaalala isixxixxa kaako kuma ilaaqico'ni heqqedhaake xuurameesa Magenoni. 10 Yaane kinni isoo gibaakara insa'ne uundaa'naanni halo insa'ne'ni fulaani; turebaangi halo insa'ne'ni fulaani.✝ 11 Tennexxee ani telcho ati'a uwwaanneka ajaja; aadanna seera anika xexxe'achchoti horidofi.

12 Konnee seeruwwa laqqottolna xexxe'achchoti heqqexxottole; Duuchchi woddiki Gootti atiki Mageni edike annuwa atike'e kaako aagemmashshanni; atinninna welti aageemmaxxa jaalalatixxa kako heqqedhaani. 13 Isi atee eeyaan, atee eebbisaani, bira saxxe hortattoshsha assaani. Ati'a uwwo'a edike annuwwa atikee kakateemmake boga'ni i'litattoxxa oose, atike bogixxa karra, midhdhuwwa, haaroxxa woyyinenna ejersiinxa zayite, hore atikika, laluwwa, gedhebokanna re'e eebbisaani. 14 Ardi duuchchi irra ati eebbisendattoni; atiki labbakinna meyyaki mannji yookaani hori atiki labbakinna meyaaki horabaaki hedhabaani. 15 Duuchchi woddiki Gootti huuni dhukubi duuchchi ate geyabaashsha heqqaani; Gibtseke boga'n hexxetta wodda ookkonee egendetteka elobaaka dhukkuba atee gibaake duuchcha'ni male'e ate'ni idagabaani. 16 Duuchchi woddki Gootti atiki Mageni atixxe anga'ni sa'isse uwwaaka arduwwa duuchcha mararteboxxongi bira hasissaani; insa'ne magenoonfantaammaxxa fakkuwwa magenonfatati fonxorote'ni e'yitoxxe'e.✝

17 «Kunni gosa gosatiki ardi no'o irra jajjabbake kadeemmaxxe'e hitta assinee insa'nee bogakenaa'ni fulchinanno?» Hite'e godobi atik giddo heddattoxxe hexxeeni.

18 Yaane kinni Insa'nee sodaattoxxe: Duuchchi woddiki Gootti atik Mageni Feri'ooni'ninna Gibtseke arda duuchcha'n asseexxa adda qalli hiyyi. 19 Lumollamma bala, mambe'inka beesisuwwanna maso yaanuwwanni Duuchchi Woddiki Gootti atiki Mageni hunnaameete anganninna jabaxxe hirre isixxenni fulcheexxa ille atixxenni uuddeetteni. Duuchchi Woddiki Gootti atiki Mageni ati ta'a sodaattaatteke gosa gosake ardi duuchchi edo assemmashshanni ta'anna assaani. 20 Iittani Duuchchi woddiki Gootti atik Mageni lubbo gate'e atenaa'ni sho'omeekiir midde ba'aaqico'ni insane'ni alayyonna soda'a uggannon. 21 Atinni hedheek Duuchchi woddiki Gootti atik Mageni lumokenna sodaachchisaake Mageno kadeemmaxxe'e kunni arduwwi atee'e sodaachchisoqqe'e. 22 Duuchchi woddiki Gootti atiki Mageni konnee gosa gosaka arda shiixxishe shiixxishee ati edii'ni insa'ne'e fulchaan: biniichuwwiink laakkoossi atikee loola'ni heddatabaashsha duuchchiinga mitte yanna'n ati bira hasissabaan. 23 Duuchchi woddiki Gootti atik Mageni kinni insa'ne ba'naa qico'ni alayyo jabaka ugge anga atixxe'n insa'ne'e sa'issee uwwaan. 24 Mowonjuwwa insa'neka anga atixxe'n sa'issee uwwaan: summi insa'nek dedhemaashsha assitatton. Insa'nee'e birtatto qico'ni atee'e injifata dande'aaki mitti manjinna hedhebaan. 25 Insa'ne magenooffantaammaxxe fakkuwwa'ni giira wori: ise'ni hana hedhemmaka birretika sibljonna worqe gaabbite ifi'a gatilsitooxxe'e: iitta assa gophphottole Duuchchi Woddike Gootta atike Mageno'ni diqachchiissaaxxe'e kaddeemmaxxe'e ate'e gugguffachchiissaan. 26 Battitte yaane mine atikibaa'a yookaan ifi'a adhdhitoxxe'e: iitta assitottole atinna isishshanni baxxabexxoshsha haranga gibi: isinna ba'nete'e foyemeeke kadeemmaxxe'e boshshedhi.