1 Ookkoneechchi uduma Duuchchi Woddik Gootti Iyyaasuu'u hiyyee qici: «Sodaattoxxe'e, alaltoxxe'e sannachcha atika aaxxe'e fulde Ayike qachchika manna loli. Gayika moyano, arda, qachchakkanna boga atixxe anga'ni sa'isse uwweennene. 2 Atinna Iyyaariko'ninna iseke moyanjo'ni assitettexxa duuchcha Ayikenna iseke moyanjo'ni lebbe assitaton. Yaane kinni booji'otanna hore ifi'a a'litinaan; atinna qachchi udumii'ni saxxe'e insa'ne siyantebaaba loldota'a qophpheefati» 3 Tennexxe Iyyaasu iski sannachchi duuchchi Ayii'i lollo'a fulle; Iyyaasunna adhe ege'neka sase tomme kuma loliinka manna qopheefate'e hashsha duulchisexxi, 4 hiyye ajajee qici «Qachchi udumii'ni riphphe; qachchakena'n bayyatinoqqe'e ha'no duuchchiing qophphefatine heqqedhdhe. 5 Aninna aninni welti hedheek duuchchi qachchiinbaa shinqannon; manni konneechchi edo assemmashshanni no'o lolo'a dagaa wodda no'o kinni baanjannon; 6 insa'nenna edi wodda baqantenshaanni baqantaancho ‹insa'ne'aa labbee'naa qachchakenaa'n insa'nee bayyinsanno qico'ni duuka no'oxxa dangaan› no'onna insa'ne edii'ni baqantannon. 7 Ha'nonna sho'ondinebaa'n fuldineexxi ookkonni qachcha abidde; Duuchchi Woddik Gootti ha'nooki Mageni ookkonne qachcha anga ha'nooxxe'ni sa'issee uwwaan. 8 Ha'noonna qachcha abiddinaa wodda giirati gubbe. Duuchchi Woddik Gootti ha'noo ajajeexxa asse; yoona ani ha'no ajajeennen.»

9 Ookkoneechchi uduma Iyyaasu manna erge; insa'nenna marreexxi Ayii'n dhidhimi darre'ni Beeti'eelixxenna Gayixxe oddo'ni hedheeke booncho'ni rinphe; Iyyaasu kinni ookkonne ardi welt gale.

10 Langa baro gorsa Iyyaasu bariisa ke'eexi labballo bukki asse; isinna Isira'eelike sooresuwwi edo he'ne akeenka'ni Ayi'a fulle. 11 Isinni welt hedhemmaki loliinki manni duuchchi fule qachchiinba dage geye; ookkoneechchi uduma Ayii'n middi darre'ni oddote'ni hexxeexxe dhooqa wido qecence. 12 Iyyaasu ediseexxi onde dhibba ifika loliinka manna fileexxi qachchi'ni dhidhimi darre'ni Beeti'eelixxenna Ayixxe oddo'ni riphasha assemman. 13 Ookkone qachchibaa'n middi darre'n hedhammakaara ookkoonn qachchiba'ni dhidhimi darre'ni sho'nemmaka loliinka manna duuchcha booncho booncho ifika abixxinaashsha asse; ettene hashsha Iyyaasu ifixxe dhooqaba mere.

14 Ayik moyanji tennee uude wodda, isinna ookkone qachchik labballi duuchchi Isira'eeli'i lolate'e bariisanni ke'exxi Arebake kallachchake'ni hedheeke boonchibaa dange. Yaane kinni moyanji ookkone qachchi udumii'ni ripheeki loliinki manni hedheexxa ege'nemmabaan. 15 Iyyaasunna Isira'eel duuchcha injifatemachcho labbee'na qiila gammoojebaa baqante. 16 Ayik manni duuchchi insa'ne'e shorrino'a ye'emme; insa'nenna Iyyaasunna shorrine; konne qicinni Gayik manni ookkone qachchina'ni bayyantaasha assine. 17 Isira'eeli shorrate'e Ayi'ninna Beeteli'i fulebaaki labballi hedhemmabaan; ookkone qachcha banne waaleexxi Isira'eeli'i shorrine.

18 Ookkoneechchi uduma Duuchchi Woddik Gootti Iyyaasuu'u hiyyee qici: «Bagedo atika Ayike qachcha'n ke'issi; ani isoo anga atixxe'ni sa'isse uwwannoni» hiyye. Iyyaasunna bagedo Gayi'a hiisedhe. 19 Isinna tennee asseshshanni ripheemmaki manni sho'omemmaba'ni rake edi'a fuleexxi abixxinemmaka ookkone qachcha giirati gunbe.

20 Ayik manni udumi'a wirri hiyye uudaa wodda, ookkone qachchixxi wiliille iimi'a tuqutuqu hitaa'na anfe. Yaane kinni qiila gammoojje'a baajjammaxxi Isira'eeelto dudduro insa'ne'ni uunemmaxxe'e hoone darre'ninna kaddo insa'ne fullaaki ori hedhemmabaan. 21 Iyyaasunna Isira'eeli duuchcha ripheemmaki manni ookkone qachcha buqeexxanna qachchakenaa'ni wiliile iimi'a tuqutuqu hita'na anfeexxi uudumi'a hinge Ayika manna shinne. 22 Ripheemmaki manni ookkone qachchinaa'ni fuleexxi insa'ne'ni guule; isexxe'e Isira'eelik manni erqe kayyi'ni insa'ne'e fula kuntemaxxe'e Gayika manna oddote'ni bunqe; Isira'eelitonna ookkone mannanaa'ni mitti midde gatebang shilte birte. 23 Yaane kinni insa'ne Ayika moyanjo lubbo hedhe'naanni Iyyaasubaa aa'ne dange.

24 Kaddeqic Isira'eelito Ayika loliinka manna duuchcha shorrinemmake diida'ninna qiilla gammoojje'ni insa'nee shinne birreechchi udumanna mitte mittenga wolaantichchik shinne birreechchi uduma; ookkone qachchiba hingeexxi ookko'o futti hiteeka duuchcha shilte birte. 25 Eettene barra'ni mudeeki Ayik meyyakinna labbaki ardi tommenna lame kumammani. 26 Iyyaasu Ayi giddo hedhaammaka manna duuchcha bukki assaa qico'ni lolake'e ke'issemmaxxa anga ifixxa udumi'a hiissedhemmaban. 27 Yaane kinni Isira'eelito Duuchchi Woddik Gootti Iyyaasuu'u ajajemmashshanni ookkone qachcha'ni futti hiteeka horenna booji'o ifi'a adhdhite. 28 Tennexxee Iyyaasu ookkone Ayika qachcha gube duuchchi woddi'a oltixxe tuulonna telchi qico'ni gammoojje kadde gattaashsha asse. 29 Isinna Ayika moyanjo haqichchi iima fanse; renshakanna galgal qico'ni okkonni hedhaashsha waale; arisho e'itechi uduma Iyyaasu rensha dirrinsaashshanna dalla'inxe hula'ni hunnaashsha ajaje; renshi hana lumolla kino tuulle: tinni kino telchi qico'ni okko'o hexxeen.

30 Ookkoneechchi uduma Iyyaasu Ebaalixxe kooba'n Isira'eelike Duuchchi Woddike Gootti Mageni'a tolchimalcho giisse. 31 Duuchchi Woddike Goottik erganji Muuse Isira'eeli ajajemmashshanni Muuse seeriinke maxaafa'n hiyyendemmashshanni tolchimalcho sibili tuqebaake kinjin giisineexxi ciincatikanna mitoomika tolcha tolchine.✝ 32 Muuse borreessemmaka seera Iyyaasu Isira'eelike ardi edo kinjoke'n hana borreesse.✝ 33 Isira'eelika arda ebisaashsha edi wodda Duuccchi Woddiki Gootiki erganji Muuse ajajemmashshanni Isira'eelike ardk akeekisanjuwwi, ja'labuwwi, hayyichchuwwi, insa'nekinna iittanni Duuchchi Woddike Goottika kakotika taabota dukkeexxe Leewwito alba wirri hineexxi taabotiike middi bita'ii'n uurrineemman; Duuchchi Woddike Goottik erganji Muuse Isira'eelika arda eebbinsaashsha akeette uwwee wodda edi wodda ajajeemmashshanni gamisi manni Geriizaani hiyyendaaxxe kooba edi darre gamisi kinni Ebaalixxe kooba edi darre uurre.

34 Ookkoneechchinni udumi'a Iyyaasu seerinke maxaafa'n borreessemmashshanni seeriinke maxaafixxa eebaanna yo'wwichcho duuchcha haaseesse. 35 Iyyaasu Isira'eeliki ardi duuchchi melaalluwwa oosuwanna weli mannina hedheexxe oddo'n Muuse ajajemmake seerana'ni mittekanna gatisebaang haassesse.✝