1 Eettene yanna Yordaanoos wido dhidhimi darre'ni hedhammak Amooritotik moyanjuwwi duuchchi eettene abbaayyake qarqara'ni hedhammak Kenaanitotik moyanjuwwi duuchchi Duuchchi woddik Gootti Yordaanoosi foonfano qico ookkone galaana Isira'eelike ardi edo hitta basseexa lanqe wodda alayyik qexxerrine; Isira'eelitotanna ifinaa'n hoyyedhatixxa onna gonphe; 2 Eettenne yanna'ni Duuchchi Woddik Gootti Iyyaasu'u «Qaraxxa cabbe aaxxe jila ofoldebaaxxa Isira'eelito higeenna jila ofo'lish.» 3 Iyyaasunna qaraxxa cabbe aadheexxi jila ofo'latike tullichcha hiyyemmammaba Isira'eelito jila ofo'lishshe. 4 Iyyaasu Isira'eelto jila ofo'lisheexxi buuto Gibtsee'ni fuleek lolakee geyeek laballi duuchchi Gibtse'n fulchi uduma orake'ni qiilla gammoojje giddo rennemmaxxeeten. 5 Ookkone fuleek ardi duuchchi jila ofo'lemmani; Gibtsee'n fulleechchinni uduma gammooji qiili giddo me'ate'ni he'neena'a ilemeek kinni jila ofo'leemabaan. 6 Duuchchi Woddik Gootti no'o'a uwwo'a annuwwa insa'neke kako aagemmaxxa konne ado buuriinka boga uundabaashsha kakatemaxxee Gibtsee'ni fulee wodda lolake geyeemmaki labbali duuchchi, Duuchchi woddike Gootti'a ajajema gophemmaxxe insa'ne renne mundaa qioc'ni Isira'eelito gammoojje qiilli giddo shoole tomme wogga jeekina'nemman.✝ 7 Tennexxe bakka'ni insa'exxa labbaxxa oose ke'ise; me'ate'n he'neemma wodda jila ofo'laa gonpheemmaxxee shoggoringimi he'nemman; konneerra Iyyaasu jila ofo'lishe. 8 Ardi duuchchi jila ofo'leechchi udumi'a mada fayyitaa qico ookkoo he'nemmaxxe kaamebe giddo turre.

9 Ookkoneechchi uduma Duuchchi woddik Goottinna Iyyaasu'u, «Techcho Gibtseke bogika salphinne atenaa'ni goggo'misheenen» hiyye. Tennena'ni kexxeexxa ookkone boonchiki summi telchi qico'ni Geligeela* hiyyeme.

10 Isira'eelito Iyyaarikoke diida'n Geligeela kaambe oltite hexxeena'a ookkone agenjixxe tommena shoolgaxxe barraxxe hashsha sa'atika ayyaana ulfeesine. 11 Sa'atike ayyaan uduma eetteneen barra ookkone bogixxa gumma tinninna gamami eeyyebaaxxa kebbonna kossemeeka tisha inde. 12 Ookkone bogixxa gumma indeexxa barra menni uurre; ookkoneechchi uduma Isira'eelitotee menni uwwemeba'a; yaane kinni eettene wogga Kenaanike bogixxa gumma inde.✝

13 Iyyaasu Iyyaariko bira hedheexxi tamasse uudaa wodda wolaantichcha abixxeek mitti dargaggeess isi edo uure'naa afe; Iyyaasunna isiba'a shiqeexxi, «Ati no'oxe gamo moo yookaan naaphiinxe?» Hiyye iso'o qore. 14 Isinna, «Waawo'o ani Duuchchi Woddike Goottike sannachike akeekisanjo kadennaxxee kunse dage'ennen» hiyyeexxi iso'n hiise haasoe'e.

Iyyaasunna albik butta gonbiseme sagadeexxi iso'o, «Anke gootta ane'e atike erganji'a maa erga affe'ette?» Hiyye.

15 Duuchchi Woddike Goottike Sannachik sooresinna Iyyaasu'u, «Urriteettexxi bakka woyyittete kaddeemmaxxee kophe atixxa lekkatenaa'n fulchedhi» hiyye; Iyyaasuna ajajemmeemmashanni asse.