1 Injifate boga abideechchi udumi'a Isira'eeliki ardi duuchchi Seelo bukki hiyyeexxi Mageno magenoonfataaka duunkaana ookko olte.

2 Isira'eelike ardinaa'n qadaada alfemmabaaki gateemmaki torbaani Isira'eelixxe gosaki mini hedheemman. 3 Tennexxe Iyyaasu Isira'eelike ardi'a iyyee qici: «Duuchchi Woddik Gootti ha'nooke annuwwiki Mageni adhdhitino'a ha'no'aa uwweemmaka boga hitta abixxitinebaaki turtina? 4 Sase sase manjo ookkone Isira'eelixxe gosake torbaane minina'n fille, ookkone bogi giddo duuchcha mammareme'e bogi hitta hedheexxa towante borreessinaashsha ergannon. Oookkoneechchi uduma insa'ne illee iima hinge'e anibaa dangaan. 5 Insa'ne towantaaki bogi torbaane Isira'eelike mini'a qoodemaan. Yihudake miniki ardi bita'i darre'n Yooseefike miniki ardinna middi darre'n uwwememmaka ifi finga qoobbo'n he'naan. 6 Konne torbaaneba qoodemake boga leelshaaxxa borro anib'a iyyedagine'naa Duuchchi Woddika Gootta ha'nooke Mageni edo ha'no'aa hixa ibinsannon 7 Leewwitotike miniki ardiki qoobbi qeesummati Duuchchi Woddike Gootti'a ergatatee kadeemmaxxe'e ha'noosha insa'ne geyaaki bogiink qoobbi hedhabaan. Roobelik, Gaadikinna gamisi Minaaseke miniki ardi Yordaanoosike galaananaa'ni boroti darre'n hdheeka boga Duuchchi Woddike Goottiki erganji Muuse ediseenni insa'ne'a uwwena'a adhine'en.»

8 Manni boga dooyyat me'ebaa edi darre Iyyaasu, «Boga okkone duuchcha'ni mammaremme; borreesitine anibaa illee iima dagge ani kaba Seelonni Duuchchi Woddik Gootti laqe hixa ha'no'aa ibisannooni» hiyye ajaje. 9 Manni kinna bogi giddo duuchcha mammaremeexi qachchuwwi duuchchi hitta torbaane minike ardi'a qoodemaaxxa borroti shiqinse. Ookkoneechchi uduma Iyyaasu hedhdheeba Seelo'a hinge dange. 10 Iyyaasunna Seelo Duuchchi Woddika Gootta laqeexxi hixa ibisee; wele gateek Isira'eelik mitte mittenge mini'a arda insa'neke ba'liniinxe qixxe'n boga qoode.

11 Biiniyamike minike ardi'a geyeeki geegi uwweme: insa'ne'a uwwemeeki bogi Yihudanna Yooseefike minike ardixxe oddo'niten: 12 Inisa'neke bogixxi gabala Yordaanoosik galaananaa'ni kexxeexxi Iyyaarikoke middanaa'ni alallee qabate fuldeexi dhidhdhim darrenaa'ni hedheek koobati bogi giddii'n saxxeexi Beeti'awween hinaaka gammoojje qiilla qico'n marte gelteen: 13 Tinni gabala bita'i darre'ni edi wodda Looza hinammake Beeti'eeli'a alalle sa'eexxi adadde Beetihoronexxe kooba gamii'ni adaddee Axaaroti Adaarike qachchibaa dirraan. 14 Tinnii gabala wele gamanaa'ni tenne koobake dhidhiminaa'n bita'i darre'n wirri hiteexxi Qiriyatibaali yookaani Qiriyatiyi'aarimi hiyyemaake Yihudake gosati minike ardike qachchiba'a saxxe'e me'itaan; Tinni dhidhimi darrexxe gabalan. 15 Bita'i darexxi gabala dhidhimi darree'n Qiriyatiyi'aarimike kasanaa'ni kexxe'e Nefitohaake qachchixxe muummuwaba'a saxxe me'itaan 16 Ookko'inna gabala Henomike beltixxe Dhooqa albi edo hexxeexxe kooba hundi dirree'ni muguggi hiyyaan; tinni koobanna Raafayimixxe dhooqaba'n middi darre'ni hexxeexxen. Ookko'ni kexxeexxi bita'i darre'n Henomixxe dhooqaba'n saxxe'e Iyyaabusake ardke bogike kasanaa'n saxxe'e Enirogeeli geltaan. 17 Ookkoneechchi uduma middi darre'n Ensheemeshi'a wirritaan; ookko'inna Aduumimixxe tarbake ori alibi edo Geelilootia me'itaan; iittanni Roobelike beltika kinjo Boohaanibaa dirritaan. 18 Middi darre'n Betiraabake kaasana'n saxxexxi adade Arebaa dirritaan. 19 Gabala middi darre'n Beetihogilake kasana'ni saxxeexxi bita'idarre'n Yordaanoosike galaani mare e'yaake Maxinetixxe Abbaayya qico'ni qaxxaamure sa'aan. Tinninna bita'i darrexxe gabalaan. 20 Boroti darrexxi gabala Yordaanoosike galaanan. Tinni duuchchi Biiniyamike minike ardi'a uwwemeeke bogixxe duuchchi darrexxe gabalan.

21 Biiniyamike minike aanchi aanchike ardiki qachchuwwi Iyyaariko, Beetihogila, Emeqeetsetsi, 22 Beeti'araba, Zemarayimi, Beeti'eeli, 23 Awiimi, Faara, Ofira, 24 Kefara'ayinay, Tsofininna Geba'i hiyyemaake laakkoossiki tomenna lamme qachchuwwanna qarqarake'n hedhemmake shiixxaramma qachchunni mittenba. 25 Welikinna Geba'ooni, Raama Be'eeroti, 26 Mitsiphpha, Keefiira, Mootsa, 27 Reeqeemi, Yirphe'eeli, Taraala, 28 Tsela'i, Elefi, Iyyaabusi yookaan Iyyerusaalemi Gibi'a iittann Qiryatitemman qarqara insa'neke'ni hedheemmak loolk laakkoosinna tommenna shoole qachchuwwaman. Yoonna kunni duuchchi Biiniyamike miniki aanchi aanchike ardi'a uwwemeeken.