1 Qeerraake bari uduma Duuchchi Woddik Gootti Isira'eelika arda qarqraake'n hedheeke naaphinaa'n gatiseexxi nage'iki he'naasha asse. Ookkone wodda Iyyaasu yo'osha cimeemmani. 2 Tennexxe Iyyaasu Isira'eelika arda duuchcha, Geedhuwwa, sooresuwwa, hayyichchuwanna Ja'labuwwa duuchcha ye'e mitteba bukki assexxi hiyyee qici: «Kunnise ani ta'a cimee gopha'ni dageennen. 3 Duuchchi Woddik Gootti no'oki Mageni no'oo gargaaro'a arda duuchcha hitta asseexxa uudineen. Duuchchi Woddiki Gootti no'oki Mageni ha'no'aa loleen. 4 Ani injifatenneke ardikanna wele gateeke ardika Yordaanoosike galaani'n boroti darre'n dhidhimi darrenaa'n Mediteranixxe Abbaayya qico'n hedheeka boga duuchcha ha'nooxxe gosake mini minike ardi duuchchi'a geegoke kadaashsha uweennen 5 Duuchchi Woddik Gootti ha'nooki Mageni naaphi ha'nooki ha'no edi'n baajaashsha asse'e bogakenaa'n fulchaan; Duuchchi Woddiki Gootti ha'nooki Mageni uwwanno hiyyemmaka insa'neka boganna adhdhitinaan.

6 «Tennnexxe Muuse seeriinke Maxaafi giddo borreessemmaka ajaja duuchcha jabaqicin xexxe'atina'n heqqedhdhe isonaa'n middi'aana bita'i'a higginoqqe'e. 7 Ha'noo giddo gateeke konne ardinn welti gudditinoqqe'e, isa'neka dharichcha magenuwwika summa yexxinoqqe'e insa'ne'ninna kakatinoqqe'e, insa'ne'a ergatendinoqqe'e insa'ne'ni sagaddinoqqe'e. 8 Yaane kinni ta'iqico'ni assitinemmashanni Duuchchi Woddike Gootta ha'nooke Mageni'a shiqqineeke kadde.

9 «Duuchchi Woddik Gootti lumolluwwanna hunnameessa arda ha'no edi'n shorreen; telchiqico'n uurre loleki hedhebaan. 10 Duuchchi Woddik Gootti ha'nooki Mageni ha'no'a lolannoni hiyye adachchiisemmaxxe'e ha'nooki mitti kumma insa'neka shorran.✝ 11 Tennexxe Duuchchi Woddika Gootta ha'nooka Mageno jaba qicinn eeyye.

12 «Yaane kinn ha'no Magenokenaa'n bayyatineexxi ha'no giddo gateemmake ardinni mitteke kaddinoole ha'no insa'nexxa dubarte insa'nenna kinni ha'nooxxa aa'ne'naa firondinoole 13 Duuchchi Woddik Gootti ha'nooki Mageni konne arda ha'noo edi'n shorrabaaxxa ege'ne. Yaane kinni Ha'no konne eloke boginaa'n baxxinaa qico'n insa'ne dudduro ha'nooke kuta, ille ha'nooxxe uchcho ittanni lekka ha'nooxxe'e gufotanna fonxorote kandaan.

14 «Higgee reyo gatachcho kada gopheemmaxxe'e aninna turene qico turabo'non; Duuchchi Woddik Gootti ha'nooki Magen uwwo'a addachisemaxxa elolla yaane duuchcha mittetinna gattebaang ha'no'aa assexxa godobi ha'nookinna qalbe ha'nooxxi egendeen. 15 Duuchchi Woddik Gootti ha'nooki Magen elolla yaane ha'no'a assemmashshann ittann Isi ha'noa'a uwweeke konne eloke boganaa'n ha'no balleesssa qico'n elobaaxxa yaane duuchcha ha'no'ni iyyedagaan 16 Duuchchi Woddik Gootti ha'nooki Mageni ha'no'a aagemmaxxa kako diiggineexxi wele dharichcha magenuwwa magenoonfattina'n heeshshi hitina'n ulfeesitinoole Duuchchi Woodiki Gootti ha'no'n mufataan; uwwemmake konne eloke boginaa'ninna iikki woddi baxxiinaan.»