1 Gele'adichchi Yoftaahe janna loliinke manjomman; isik anninna Gele'aditemman; isixxi ammanna yabaabultotemman. 2 Iittanni Gele'adixxi are Gele'aadi'a labbaxxi oose ilde'ee. Insa'nenna nophphiineexxi Yoftaahee, «Ati wele amanaa'ni ilendeettaxxee'e no'oke mini hidinaa'n qadaada affeeboxxen» hine isoo shorrine. 3 Tennexxee Yoftaahe ifike dayyuwwanaa'n baaje'e Xoobi hiyyemaake boga'ni ofo'le; ookkonna baashe bukki hiteexxi duuka isixxa me'ite.

4 Heenoxxe yanna uduma Amoonito Isira'eeli'n lola ke'issitee wodda, 5 iikki Gele'adik sooreessuwwi Yoftahee iyyedgatee Xoobike bogibaa me'ite. 6 Insa'nenna Yoftaahee, «Amoonitoti welti lola inbonnaa'a dageteexxi no'oo akeeki» hine.

7 Yoftaahenna insa'ne'n, «Anee gibbineexxi anke annike mininaa'ni shorritineemmabataa? Ta'ata rakko ha'noo'n geltammale anee hassinaa?» Hiyye.

8 Gele'adik sooreessuwwinna Yoftaahee, «Yoona no'o ta'a atibaa dangeennen; Amoonito lollonaa'a ke'i welti me'inno; Gelaadi giddo ha'naanneke no'oo duuchchingike ati sooreessa kaddatton.»

9 Yoftaahenna Geli'adinika akeekisanjuwwa hiissexxi, «Amoonito lolonaa anke bogibaa anee hiisitinoolenna Duuchchi Woddik Gootti insa'ne anga anxe'ni sa'isse uwweele ani dhugaandinn ha'nooke sooreessa kadannoo?» hiyye insa'nee qore.

10 Gele'adik sooreessuwwinna «Duuchchi Woddik Gootti dhugaa kula no'oxxen; hitettexxa duuchcha dhugaaten assinannon» hine. 11 Tennexxe Yoftaahe Gele'adike sooreessuwwinni welti me'e; iikki ardikinna isoo ifike sooreessanna ajajjallo assedhe; Yoftahenna ookkonee haase'eemmaka hiyychcho duuchcha Mitsipha Duuchchi Woddike Gootti edo lebe haaso'e.

12 Ookkoneechchi uduma Yoftaahe Amoonitotika moyanjo'n, «Atinni maa lola afee'naate boga anka dagge loldettek?» Hiyyati erganjuwwa erge.

13 Amoonitotik moyanji Yoftaaheke erganjuwwa'n, «Tennee assennechchi Isira'eelik ardi Gibtsee'n fulle wodda Aaroonikenna Yaaboqike galaanuwwixxe oddo hedheekanna Yordaanoosika galaana qico'n hedheeka anka boga adhdhineemmaxxeeten; ta'anna nage'inginni ani'a hiisse» hiyye.

14 Yoftaahenna ookkonee erganjuwwa higgeenni Amoonitotike moyanjibaa ergeexxi, 15 hiyyee qici:

«Yoftaahe hiyya'nee qici: Isira'eelik ardi Mo'aabikanna kadi Amoonitotika boga adhdhe'ebaan. 16 Isira'eelik ardi Gibtsee'n fullee wodda qiilla gammoojje darree'n Diimmoxxe Abbaayyabaa ookkoo'ninna Qaadeesi'a me'e. 17 Isira'eelik ardinna Eedoomike moyanjo, ‹Atike bogi giddii'n sa'nonna'a maganneten eettii no'aa uwwi› hiyyati erganjuwwa isibaa erge; Edoomik moyanji kinni isi hiyyeexxa laqeba'a. Mo'aabike moyanjibaanna iittanni erge; isinna isi'a eetti uwwebaan. Tennexxee Isira'eelik ardi Qaadeesi ofo'le.✝

18 «Ookkoneechchi uduma Eedoomikanna Mo'aabika boga dooneexxi, eettene qiilla gamoojje giddo me'ati Mo'abii'n boroti darre'n dangeexxi Arinoonike galaani wido kaambe oltine. Mo'aabixxi gabala Arnoonike galaana kadeemmaxxee Mo'aabixxe gabalabaa e'yinebaan.✝

19 «Ookkoneechchi uduma Isira'eelik ardi Haseebon hedheeke Amooritotika moyanjo Siihoonibaa erganjuwwa ergeexxi, ‹No'o ifike bogibaa me'innonnaa atik bogi giddii'n sa'nonnaa eetti no'aa uwwi› hiyye. 20 Siihooni kinni Isira'eelik ardi isixxe galcha giddii'n sa'o'aa eetti uwwatee Isira'eelika arda addatebaan; isinna ifika sannachcha bukki asseexxi Yahaatsi'n kaambe olteechchi uduma Isira'eelika arda lole.

21 «Ookkoneechchi uduma Duuchchi Woddik Gootti Isira'eelik Magen Siihooninna isika arda duuchcha Isira'eelixxe anga'ni sa'isse uwwe. Insa'nenna injifante Isira'eelinna ookkone boga'ni hedha'neeka Amooritotika boga duuchha ifi'ni hiisedhe. 22 Aroononike galananaa'n Yaaboqike galaan qico'n eettene qiilla gammoojjenaa'n Yordaanoosike galaan qico'n hedheeka Amooritotika boga duuchcha abixxine.✝

23 «Tennexxee Duuchchi Woddik Gootti Isira'eelik Mageni Amoorito arda ifike, Isira'eeli edii'n shorreexxi fulchee uduma ati ookkone boga adhdhittotaateeta? 24 Magen atik Kemooshi ati'a uwweeka adhdhite sammite ofo'ldabexxoo? No'o kinni Duuchchi Woddik Gootti no'ok Mageni no'o'a uwweeka qadaada duuchcha dhaallanon. 25 Ati Mo'aabika moyanjo Sefoorika belto Baalaqi saxxattota? Isi Isira'eelinni lolemeemata? Yookaan loleemata?✝ 26 Isira'eeli Haseeboninna qarqara iseke'n hedhemmake olla'uwwan, Aro'erininna iseka loola'uwwa'n, iittann Arinoonike galaani qarqara hedheeka qachchuwwa duuchcha'n sase dhibba wogga ofoleemma wodda mayee eettenne yanna insa'nee adhdhagophineemma'a? 27 Ani atee balleessebe'non; atik kinni ane'n duuldeetexxi anee balleesite'eeten; yoonna iikki murte uwwammak Duuchchi Woddik Gootti Isira'eelixxenna Amoonitotixxe oddo'n techcho murowwaal.»

28 Amoonik moyanji kinni Yoftaahe ergeexxa era konnee qiconna lummisebaan.

29 Ookkoneechchi udma Duuchchi Woddike Goottik hafuuri Yoftaahe'n dirrei. Yoftaahenna ke'eexxi Gele'adinna Minaaseke boguwwixxe oddonaa'n sa'eexxi me'e; Gele'adi darre'n hexxeexxi Mitsipha qaxxaamure Amooni'n duule. 30 Yoftaahenna hiyya'n Duuchchi Woddike Gootti'a wereegee qici, «Amoonito anga anxe'n sa'isite uutotole, 31 Amoonito lole injifate ille iima higanonoxxa yanna ediseexxi anee qophedha anke minixxe hulanaa'n fulaak huuni manjinna Duuchchi Woddike Goottike kada; aninna isoo ciincatike tolchi'a shiqisannon.»

32 Ookonneechi uduma Yoftaahe Amoonito lolatee fule; Duuchchi Woddik Goottinna isoo anga isixxe'n sa'isse uwwe. 33 Aro'eerinaa'n Miniiti qico'n ookko'ninna Abeeli Kiramiimi qico'n hedheeka lame tomme qachchuwwa balleesse; Amoonitotinna Isira'eeli'a hirende.

34 Yoftaahe Mitsipha hedheek ifike minbaa ille iima hige; kunse isixxi belto okole gande sirbita'n isoo qophphpexxo fulde; isenna isi'a mitte belto callamman; ise gadhi darre labbake kadi meyyaxxa affeemmabaan. 35 Isinna isee uudeexxa yanna yaadoti seemma ifixxa dareexxi «Aanne anxe belto'o anee mancaasete! Waala dande'abe'noka wereega Duuchchi Woddike Gootti'a wereegeennaxxee ane'n jabbaxxa rakko iyyedaggette» hiyye yaaddoti oodhe.✝

36 Isenna isoo hitee qici: «Anke annaa! Mittele Duuchchi Woddike Gootti'a werreegeeten; atik naapha Amoonito ta'a Duuchchi Woddik Gootti ati'a halo fuleemmaxxee werreeggeetaka werreega ane'n muuxi. 37 Yaane kinni mitte yaane calla ani'a assitota'a atee kadhataannen; heeruma gophaannaxxee anixxe jaaluwwanni welti koobuwwa'n qabate mammarema'n lame agenjo oodhannoshsha anee geegeessi.»

38 Isinna «Kexxe me'i» hiyya'n lame agenji'a me'itaashsha assee; isenna heeruma gophphaammaxxe ifixxe jaaluwwanni koobuwwatibaa mi'ineexxi oo'ne. 39 Lame agenji uduma ifike annibaa higge; isinna werreegeemmaxxa ise'n asse; isenna dubarichchotemman.

Eettene yannanaa'n tinni Isira'eelike arda'n barratendeexxe kaddeexxi 40 Isira'eelik dubarri Gele'adichcho Yoftaahexxa belto hedhati wogga wogga'n fulla'n shoole barra ise'a yaadaan.