1 Isira'eelk ardi Mitsipha bukki hinee wodda, «No'o giddii'ni mitti manjinna ifixxa meyyaxxa belto Biiniyaamik manni'a heerunsiissoqqe» hine afo'o weli sa'neennan. 2 Isira'eelik ardi Beeti'eeli'a dageexxi Mageni edo galgali qico'ni ofolleexxi hafuura gikki assine'e oo'neen. 3 Insa'nenna hinee qici, «Ee, Duuchchi Woddike Gootta Isira'eelike Magenoo! Tinni maaye'e Isira'eel'ni kadde? Techcho Isira'eelk mini hadi giddii'n hitta gophemmaa?» Hine. 4 Eettenee bariisa iikki ardi tolchimalcho giisseexxi ciincatika tolchanna mittoominka tolcha ookko shiqishe.

5 Ookkoneechchi uduma iikki Isira'eelk ardi Mitsiphaa Duuchchi Woddike Gootti edo bukki hinanno wodda ookko'a dagebaak gateek huun manjinna isi shiyemmowwaal hine jabaxxa kako kakanteemmaxxee «Iisra'eelke mini hadi duuchchi Duuchchi Woddike Goottike ya'ibaa dagebaak gateek ayyetee?» Hine qorre. 6 Iikki Isira'eelk ardi dayyuwwa insa'neke Biiniyaamik manni'a lumoshsha yaandeemmaxxee, «Telcho Isira'eelk mini hadi giddii'n mitte gosa baxxe'en. 7 No'oxxe meyyaxxe oose giddii'n konne Biinyaamike manni'a aadhinsabo'noxxa Duuchchi Woddike Goottike summinni kakanteenaxxe'e weli gateeki are alfaashsha maa assinanno?» Hine.

8 Ookkoneechchi uduma Insa'ne hinee qici: «Isira'eelik mini hadi giddii'n Mitsipha Duuchchi Woddike Goottik ya'i edo fulbaak gateek ayyetee?» Hine qore. Iyyabiisi Gele'aadi giddii'n mitti manjinna kaambetiba'a ookkone ya'iba dagebaaxxa anfe. 9 Insa'nenna ookkone sannachcha laakkoono'aa mitti mittingika summa ye'naa wodda Iyyabiisi Gele'adik manninaa'ni mitti manjinna hedhemabaan. 10 Tennexxe'e ya'i ookkone tommenna lame kuma jabaka manna ergineexxi, «Martinne Iyyabiisi Gele'adi'ni hedheeka manna melaalendinnni oosendinni welti wolaantichchik shiwwe.» 11 Insa'nenna «Assiyyo hasisaaxxi ookkone labballo duuchcha iittanni heerundeexxa melaalle duuchcha shiltine birre» hine ajaja uune. 12 Insa'nenna Iyyabiisi Gele'adii hedha'neke ardi giddii'ni shoole dhibba duuddo dubara anfe; tennexxe insa'nee'e Kenaanike boga'ni Seelo hiyyemaake looliba aa'ne dange.

13 Ookkoneechchi uduma iikki ya'i duuchchi Riimmoonixxe rassa'ni hedheeke Biiniyaamike manniba'a nage'iinka dhaansa erge. 14 Tennexxe ookkone wodda iikki Biiniyaamiki manni udumi'aa hige; weli gatteexxa Isira'eelito reyotenaa'n gateek Iyyabiisi Gele'adii'ni booji'eme dageeka dubaruwwa insa'ne'a uune. Yaane kinn ookkone dubarki laakosi duuchchinge geyaakemabaan.

15 Duuchchi Woddik Gootti Isira'eelike mini hadixxe oddo'ni mittunte hexxabaashsha asseemmaxxe'e ardi Biiniyaamixxee'e yo'oshsha yaade. 16 Ookkone ya'iki akeekisanjuwwi hiyyee qici, «Yoonna Biiniyaamike mini hadik dubarri muddeedheen; eega gateeke labbali'a are habaa'ni alfa dandeenannoo? 17 Isira'eelik mini hadi giddii'ni mitti mini hadi midde ba'abaashsha ta'a hedhoti hedheek Biiniyaamik mani hadi dhaaldaaxxa sanne ifi'a hasisaan. 18 Kaddo malee no'o giddii'n mitti manjinna dubarcho ifixxa Biiniyaamichchokee aadhisoole yowwemeeke kadeexxa kakateemmaxxe'e dubarra no'oka aa'naashsha eetti'i insa'ne'a uunabo'non; 19 yaane kinni Beeteli'ni bita'i darre'ninna Beeti'eeli'ni Sekemi'a me'amake orii'n boroti darre'ni iittanni Leboonii'ni bita'i darre'ni hedheeke Seelo Duuchchi Woddike Goottik ayyaani wogga woggande'ni ulfeeseman.» 20 Tennexxe Biiniyaamito insa'nee hinee qici: «Martine woyinetke hiddichchiink booncho'ni sho'omme; 21 ookko'o riphphine insa'ne gaadde. Seelok dubarri siribake ookko'a dagaa wodda, woyinetike hiddichchiinke boonchonaa'ni ha'no fuldineexxi ookkone dubar giddii'ni ifi ifi'aa arete kaddaaxxa aadhdhe; ookkonnechi uduma insa'ne Biiniyaamixxe galchabaa a'litine me'e. 22 Annuwwi insa'neekinna dayyuwwi insa'nek kaddabaan hinoole, ‹Lolii wodda mitte mittengee are assedhatee aane'naxxi duullasha assine tirtirsineenaxxe'e ballo no'aa gattowwaal hiyye; ha'noonna eetti ha'nooxinn no'aa uwwa gophphineemmaxxe'e asse'neennek hunnati kako ha'nooxxa diigine ballesanote kadinabaan› hitine hiissichcho no'aa uutineele eloxxemman.»

23 Iikki Biiniyaamik mani hadinna insa'ne'ni kulndeeshanni assine; iikki dubar siribamma wodda lmitti mitting manji mitte mitte dubara are ifixxe assedho'aa adhdhe me'e; ookkoneechi uduma insa'nenna ifi ifke bogiba hinge; qachchuwwa insaa'nekanna qammalchine ookko'o hedha sanfe. 24 Eettene yanna Isira'eelik ardi ookkone booncho waalexxi ifi ifike miniba, ifi ifke bogibaa, ifi ifixxe gosabaanna ifi ifke mini mini hadibaaduuchchi me'ate'e qophpheefante: mitti mittingi ifi ifike mini minibaanna mini hadibaa me'ine.

25 Ookkone baro'ni Isira'eelik boga'n moyanji hedhemmabaan; mitti mitting manji duuchchi ifi'a eloxxe fakkaatee leelitteexxa assaaman.✝