1 Ookkoneechchi uduma Daani'ni Bersaabehi qico'ni hedheek iittanni Gele'adike boga'ni hedha'neek Isira'eelik ardi duuchchi mitte manjichcha kandeexxi fulle; insa'nenna Mitsiphake boga'n Duuchchi Woddike Gootti edo bukki hine. 2 Isira'eelk ardinna mini mini hadik soorsuwwi duuchchi, iittanni buttika lola lola'nik shoole dhibba kuma geeyek loliinka miya ka'leek sannachchi eettene bukki'ni afemeemman. 3 Biiniyaamik mini hadi Isira'eelki ardi Mitsipha'a dangeexxa lanqe. Ookkoneechchi uduma Isira'eelk ardinna, «Tenni fuggoxxi huje hitta muuxendeexxa no'o'ni kulle» Hine. 4 Tennexxe iikki shiixxoxxi are isixxi shiyendeemmak Leewwichchi hiyyee qici, «Aninna shiixxoxxi anxi are eettene hashsha sa'issatee'e Biiniyaamixxe galcha'ni hexxeexxe Gibi'a me'inenen. 5 Gibi'ak manninna ane'e shiyatee'e galeenneka mine hashsha dange bunqe; insa'nenna shiixxoxxe anxe arenni weli duuka yabaabullee'na rerte. 6 Aninna shiixxooxxe anxe areka rensha kukkutenchi uduma mitti mittinga kukkute'e, mitti mitteng Isira'eelke boga duuchcha'ni erganneni. Aninna tennee assineelchi iikki ardi Isira'eel'ni salphisaaxxanna hunjabaaxxa huje muuxxeemmaxxeten. 7 Ta'anna ha'noo Isira'eelk ardi duuchchi tenne yaanexxe'e mar'atte; murte ha'nooxxa uwwe.»

8 Ardi duuchchi mitteba higeexxi hiyyee qici, «No'o giddii'ni mitti manjinna duunkaani giddi'a e'yinabo'non; mittikinna ifike minibaa marrabe'non. 9 Yaane kinni assinannoxxi yaane hixa ibinsenexxi Gibi'ake boga'n lola kelisaaka manjo fillanon. 10 Insa'nenna Isira'eeli'ni hunjeexxe battitte yaane Biiniyaamixxe galcha'ni hedheeka Gibi'aka arda adhdhatee'e duulake sannachchi'aa gala'a uwwaashsha Isira'eelk mini hadi duuchchixxe oddonaa'ni dhibbakenaa'ni tomme, kumakenaa'ni dhibba, tomme kuminaa'ni mitte kuma manna dhaanbannon.» 11 Tennexxe Isira'eelk ardi duuuchchi ookkone qachcha'ni lola ke'issate'e mitteba bukki hine.

12 Isira'eelik mini hadi Biiniyaamik mini hadi duuchchi'a erganjuwwa hine erginee qici, «Ha'nooxxe oddo'ni assendeexxi tinni fuggoxxi huje maachcho? 13 Ta'anna insa'nee shinne tennee fuggoxxa huje Isira'eelk giddii'ni fugusino, ookkone Gibi'aka baashshe manna no'aa sa'isitine uwwe.»

Yaane kinn Biiniyaamik ardi ifixxe gosaka Isira'eeltotika yaada adhdhineemabaan. 14 Tennexxe insa'ne Isira'eelk arda lolatee Biiniyaanuke qachchuwwa duuchchanaa'ni bukki hineexxi ifi ifike qachchanaa'ni Gibi'a dange. 15 Eettene barra ifi ifike qachchannaa'ni dageek Biiniyaamik manni laako'eme, laakosi insa'nekinna Gibi'ake manni gadho wele lame tommenna jaane kuma wolaantichcha kadheek manni hedheman, Gibi'aa'ninna torbaane dhibba filemeek manni laako'eme. 16 Ookkonneer giddii'ni filemeek torbaan dhibb bitaachchiink mannammani; kunniirinna kino qolaanchaakeranna wele dhiisini darbinee'na umiink ordichcho midde qoxaakeerramman. 17 Isira'eelk manni Biiniyaamik mini hado lephphinebaang wolaantichcha kadhdheek shool dhibba kuma loliinka manna bukki assine.

18 Isira'eelk manni ke'ee Beeti'eeli'a dageexxi Magenokanna, «Biiniyaamika manna lolatee oddo no'oxxenaa'ni ayyete edis fulaa?» Hine qorre.

Iikki Duuchchi Woddik Goottinna, «Yihudak gosatik mini hadi edise duulowwaali» hiyye hiise.

19 Gorsa bariisa Isira'eelk manni ke'eexxi Gibi'ake bogi bira qecence; 20 Isira'eelk manni Biiniyaamika manna lolatee'e me'ine; Gibi'a giddo assinaake loli'a ifi ifika booncho abixxine. 21 Biiniyaamik manni Gibi'a'ni fulle; eettene barra Isira'eelito giddii'ni lame tommenna lame kuma manna shinne. 22 Kaddo malee'e Isira'eelito weli'aan weli jajjabaanteexxi sirtixxa barra toora abixineemmake booncho'ni higgeen ifi ifika booncho abixine. 23 Isira'eelk manni fuleexxi galgal qico'ni Duuchchi Woddike Gootti edo oo'ne. Insa'nenna hiisinexxi Duuchchi Woddika Goottanna, «Dayyuwwa no'oka Biiniyaamika manna lollonaa higgeen fullano?» Hine qorre.

Duuchchi Woddik Goottinna, «Eetti martine insa'ne lolle» hiyye.

24 Langa baro Isira'eelik manni Biiniyaamike sannachchibaa duule. 25 Iitte wodda Biiniyamik manni Isira'eelika manna lolatee Gibi'a'ni fulle; higgeen wolaantichcha ka'leeka tommenna saddeeta kuma manna shinne.

26 Ookkoneechchi uduma Isira'eelk ardi duuchchi Beeti'eeli'a fule; insa'nenna ookko oo'na'ni Duuchchi Woddike Gootti edo ofolle. Insa'nenna eettene barra bogi hashshaa qico'ni agabo goddo honse; insa'nenna Duuchchi Woddike Gootti edo ciincatika tolchanna mittoommiinka tolcha shiqinshe. 27 Isira'eelk manninna Duuchchi Woddike Goottixxa fedhi qorre. Ookkone wodda Mageniink kakotik taabooti ookko hedheman; 28 ookkone baro'ni Aaroonik labbak belti, Ali'aazaarik labbaka belto Finihaasi Duuchchi Woddik Gootti edo ergatemaammaxxe Isiraa'elk manni Duuchchi Woddika Gootta, «Dayyuwwa no'oke Biiniyaamika manninni welti lola inbonna langaxxa fullanno moo waallanno» hine qorre. Duuchchi Woddik Goottinna, «Soodo anga ha'nooxxe'ni sa'isse uwwannon fulle!» Hiyye.

29 Ookkoneechchi uduma Isira'eelk manni Gibi'a qarqara'ni riphee gaada'neka manna uggine. 30 Insa'nenna sakka baro Biiniyaamika sannachcha lollo'a fulle; insa'nenna konneechch edo assinemmashsha Gibi'aka manna lollo'a ifi ifika booncho abixxine. 31 Biiniyaamik manninna ookkone sannachchixxa duuka fullee wodda ookkone qachchinaa'ni bayyante me'inaashsha assemme. Insa'nenna edi woddishshanni ookkone sannachcha'ni lola sanfe; ookko'ninna Beeti'eeli'aanna Gibi'a me'amake oruwwa'ninna weldeenate'ni sase tomme Isira'eelika manna shinne.

32 Biiniyaamito, «Konneechchi edo assinenneshshanni insa'ne'e shinne birrennen» hine. Isira'eelik manninna bado insa'nexxe'ni, «Udumi'a hinge'nexxi ookkone qachchi giddii'n ookkone lumoke ho'lichcha'ni insa'ne fulchino» hine.

33 Isira'eelk manni duuchchi hedhemake boonchonaa'ni udumi'a hingeexxi Be'aalitaamari'a enqe'ne booncho abixine. Gibi'ake diida'ni riphphe'e heqqitaammaxxi Isira'eelito xalli hite leelite. 34 Ookkoneechchi uduma Isira'eelk ardi duuchchanaa'ni filemeek tommi kumi manni Gibi'a edii'ni lola ke'isse. Loli itti jabaatatenaa'ni kexxeexxa, Biinyaamito ba'nee insa'nexxi shiqqa'ni daggeexxa egeneemmabaan. 35 Duuchchi Woddik Goottinna Isira'eelik ardi Biiniyaamika manna lole injifantaasha asse. Eettene barra Isira'eelik ardi Binyaamik manni giddii'ni lame tommenna onde kumanna mitte dhibba manna shinne. 36 Ookkoneechchi uduma iikki Biiniyaamik manni injifateemmeexxa egenne. Isira'eelik ardi kinni Gibi'ake loola'ni riphe gaada'neek bagedo'ni ifi addanteemaxxe'e Biinyaamke manni'a booncho wocci assine. 37 Ookko ripheemmak manni rakeexxi Gibi'a baaje, sho'omeemakinna fuleexxi ookkone qachcha duuchcha wolaantichchiinke shinne. 38 Ookko ripheemak manninna ookone qachchinaa'ni jabaxxi wiliile hurretishsha ke'isinaashsha Isira'eelk mannixxenna ripheeke mannixxe oddo'ni beesisi uggemmeeman. 39 Isira'eelik arda tenne uudeshanni illee iima udumi'a higaashsha weli aange. Insa'nenna Biiniyaamik manni lolake'ni midditte alfineexxi Isira'eelke loliinke manni giddii'ni insa'ne sase tomme manna shinnemmaxxe'e, «Konneechchi edo assineeneshanni ta'anna insa'nee kutti assineenen» hine afo'o fulche'naaman. 40 Yaane kinni wiliile duummachchiinsha iimi'a fuldaamman. Biinyaamik manni uudumi'a uuda wodda iikki qachchi duuchchi giirati abideme bubbe iimi'a fuldaa'na uunde. 41 Ookkoneechchi uduma Isira'eelk ardi udumi'a enqedheexxi insa'nee lole miidhe; ookkone wodda Biiniyaamk manni rakko insa'ne'ni gelteexxa anfeexxi yo'oshsha alanne. 42 Tennexxe insa'ne Isira'eelk ardi edii'ni udumi'a enqe'neexxi qiilla gammoojek bogika ora baanje, kaddo malee'e insa'nenna bagedokenaa'ni baanje fula dandeenebaan; gargar hedheeke ifi ifik qachchanaa'ni dageek Isira'eelk manni insa'nee ookkoni shiye bire. 43 Isira'eelk ardi Biiniyaamik loliinka manna bunqeexxi Gibi'a'ni boroti darre hedheeke boonchi qico'ni shorrine madada insa'neka kutti assine. 44 Ookkone lola'ni Biiniyaamik manni giddii'ni jabak tommenna saddeeti kumi sannachchi shiyeme. 45 Insa'ne giddii'ni gateek higeexxi qiilla bogibaa Riimmoonixxe rassabaa baaje wodda, Isira'eelik manni orake'ni onde kum amanna insa'neka shilte. Higgeen Gidi'oomi qico'ni hordoffe daggeexxi lame kuma manna lenbe shinne. 46 Eettene barra wolaantichcha ka'leek lame tommenna ondi kumi Biiniyaamik manni loliinke diida'ni ibe; kunni duuchchi jabake loliinke mannaman.

47 Yaane kinn jaane dhibbi manni udumi'a qiilla gammoojje giddo hedheeke Riimmoonixxe rassabaa baaje; insa'nenna ookko'o shoole agenjo ofolle. 48 Isira'eelik ardi Biiniyaamike bogibaa higeexxi insa'neka qachchuwwa duuchcha iittanni horekanna ookko'o alfineechcho duuchcha wolaantichchinn shinne. Insa'nenna ookkone loola'ni hedheeka qachchuwwa duuchcha giirati gunbe.