1 Ookkonneechchchi uduma Efireemik manni Gedewoonii'i «Midiyaamito loldotaa martette wodda mayee no'o ye'a gophette? Mayee iitta hexxeexxa yaane no'o'ni assitette?» hineexxi lumooshsha isoo aallante.

2 Isinna hiisseexxi «Ani assennexxee'n ha'no assitinneexxi saxxabaata? Efireemixxe woyinetixxi feshile mayete'n bukki hiteexxi aageexxe Abi'eezerixxe woyinenaa'n caldabaata? 3 Mageni Midiyaamike mannika akeekisanjuwwa Oreebiinna Ze'ebi'i shiltine injifattinaashsha anga ha'nooxxe'n sa'isse'e uwwe'en; ha'no assitinemmaxxenni wel fakkataaxxi ani assa dande'annaxxi maachchommata?» Isinna tennee haaso'ee wodda mufe insa'nexxi hashshibbi hite.

4 Eettene yanna'ni Gedewooninna isik sasi dhibbi manni Yordaanoosike galaanika foonfe; gonphe midde hexxoolenna naapha ifika shorrina'nemman. 5 Sukooti genneeshshan Gedewoon qachchi giddike manna'n hiyyee qici, «Midiyaamik moyanji Zebahinna Silimanaa'a shorrate'n hana hedheennaxxee anik manni yo'oshsha gophe'eni rakkine indaachcho insa'ne uwwe» hiyye.✝

6 Sukootik sooreessuwwi kinni «Atike sannachchi'a ita mayeete uunaannok? Zebahinninna Silimanaa'a haano boojitettexxeeteta» hine.

7 Gedewooninna «Eloxxen! Duuchchi Woddik Gootti Zebahininna Silimanaa'a anga anxe'n sa'ise uwwaxxe yanna'n qiilla gammooje'n utetinna qu'muudoti ha'noo amaaxxannon!» hiyye. 8 Gedewooninna Phini'eeli'a mareexxi ookko hedha'neeka manna ookkoneenni qortuma qore; yaane kinni Phini'eelik manninna Sukootik manni hiissemmanga woldinga hiissichcho hiissine iso'n kulle. 9 Insa'nenna Phini'eelika manna «Lole injifate'e nage'ik higanno wodda qachcha ha'noka heqqatixxa xellephpho diigannon» hiyye. 10 Eettene yanna Zebahelinna Silimana tommenna onde kuma kadaake ifi ifike sannachchinni welti Qerqeri hiyyendaaxxe bakka'n he'nemman; kunninna borotike ardikenna loli giddo reyeemake dhibbanna lame tomme kuma wolaantichcha ka'leeke sannachchanaa'n gateekemman. 11 Tennexxee Gedewoon qiilla gammoojjeka ori darree'n Nobahikenna Yogibehake dhidhim darree'n sa'eexxi naaphiinka sannachchi keekatebaang fenxe hiyyate'n hedhee'na'a isoo lole. 12 Lami Midiyaamik moyanjuwwi Zabahelinna Silimana baanje; yaane kinni Gedewon shorre insa'ne abide; sannachchuwi insa'neek duuchchinna alayik henkekki hiyyaashsha asse.

13 Iyyo'aasik belti Gedewooni Hereesixxe kooba darree'n lolakenaa'n illee iima hige. 14 Isinna Sukootike mannanaa'n mitte dargaggeessa booji'eexxi isoo qore; iikki dargaggeessinna Sukootika torbaane tommenna torbaane sooreessuwwikanna geedheka summa isi'a borreesse. 15 Ookkoneechchi uduma Gedewooni Sukootike mannibaa dageexxi insa'nee « ‹Zebahelinna Silimanaa'a boji'itebexxon; mayeeteta ta'a solo'we gaggabeeke atike sannachchi'a ita uunnaanneki?› hitineexxi ane'n gacifatine'eemman. Ta'a kinni Zebahelinna Silimani kunse anxe anga'n ibbe'een!» Hiyye. 16 Ookkoneechchi uduma utenna qu'muudo gammoojje'n aadheexxi Sukootike qachchika sooreessuwa gane. 17 Phini'eeli hexxeexxa qachchiinxe heqqaxxa kinjiinxa xelleephpho diige; ookkone qachchi giddo hedheeka labbalo duuchchanna shiye.

18 Ookkoneechchi uduma Gedewoon «Taaboori shiltineemmak manni hitta dhekemma?» Hiyye Zebahelinna Silimanaa'a qore.

Insa'nena iso'n «Atee fakkanta'nemman; mitti mitting moyanjinke belto fakkaataamman» hine.

19 Gedewooninna insa'ne'n «Insa'ne anxe amaxxe oosexxe dayyuwwamman; sila ha'no insa'nee shiya waldineele aninna ha'noo geyabe'noxxa Duuchchi Woddik Goottik Summinni kakataannen» hiyye hiise haaso'e. 20 Ookkoneechchi uduma angafa belto ifika Yeterii'i «Ta'a tennee insa'nee shiyi!» Hiyye ajaje. Yeteri kinn oosete kadeemmaxxee godoba gure wolaantichcha fulchedhebaan.

21 Ookkoneechchi uduma Zebahelinna Silimana Gedewoonii'i «Manjixi hunna isike bisixxe qixxe'nite kaddemmaxxee mo yoona atinni no'o shiyi» hine; tennexxee Gedewoon insa'nee shiyeexxi insa'neke gaaluwwike gooba'n hedhemmaka seessuwwa duuchcha aadhe.

22 Ookkoneechchi uduma Isira'eelik ardi Gedewoonii'i, «Ati Midiyaamike mannixxe anganaa'n no'o gargaartetaxxe atinna ati uduma oose atixxi iittan atixxe oosexxi oose no'o mootondine galche» hine.

23 Gedewooninna insa'ne'n «Aninna oose anxinna ha'no mootome galchinabe'non; ha'no mootomma galchaak umi isinginnin Duuchchi Woddike Goottan» hiyye. 24 Isima'eelik manni manshatika worqeti gutichcha uggudha aada insa'nexxe kaddeemmaxxee Gedewoonk sannachchinna insa'neka gutichchuwwa boojineemman; Gedewooninna «Mitti mittingi boojitinemmaka gutichcha hinnuwwe ane'n» hiyye.

25 Isira'eelik ardinna «Gammadik uunannon» hiye. Hirba ookkone'n seemma fannee'naa boojjinemmake manshatika gutichchinaa'n mitti mittingi hana ibse. 26 Gedewooni aadhemak iikki worqetik mashatixxi gutichchuwwi lame tomme kiilo kade; kuninna wele seesuwwa, goobinka seesanna Midiyaamitotik moyanjuwwi oddo'wamaxxa baddeessitte seemma, iittanni ifi ifike gaaluwwike gooba'n hedheemmake seesuwwi gadhi darre. 27 Gedewooninna eettene worqen magenooffachchotixxa fakkuwwa giisseexxi ilememmake qachcha Ofira giddo ugge; Isira'eelik ardi duuchchi Efuude magenoofatati yabaabulemmaxxee iitti Efuude Gedewooni'anna isike mine hadi'a gufote kade.

28 Konne qicin Isira'eelito Midiyaamito injifate; langaxxanna ifi lumminseban; Gedewoon lubbo hedheemma qico'n shoole tomme wogga duuchcha ookkone bogake'n nage'i leelle.

29 Iyyo'aasik belti Yiruba'aali ifike minibaa me'eexxi ookko ofo'le. 30 Isi heddo melaalle aadhemmaxxee torbaane labbaxxa oose afeemman. 31 Sekemike boga'n hexxammaxxi gursumeecho labbaka isi'a ilde; isika summakanna Abemelek hiyye fulche. 32 Iyyo'aasik belti Gedewoon cime reye; ifike anike Iyyo'aasik hirreessiba moogeme; kunni hirreessinna Abi'eezerixxe sanneke qachcha'n Ofira hiyyemaaba afeemmaan.

33 Gedewoon reyeexxi lumo qico turebaangi Isira'eelik ardi Ba'aalii'i magenoonfatati yabaabule; Ba'aaliberiitimi'a sagande. 34 Isira'eeliki ardi qarqarake'n hedhemmak naaphuwwa duuchchanaa'n gargaareeka Duuchchi Woddika Gootta ifika Mageno qalli hineba'a. 35 Iittanni Yiruba'aali hiyyemeek Gedewooni Isira'eeli'a assemmaxxa eloxxa yaane duuchcha qaabbata gophatenaa'n kexxeexxa isike mini hadi'a galata hiissinaake kandeba'a.