1 Isira'eelik ardi higgeen Duuchchi Woddike Gootti edo fuggoxxa yaane hunje; tennexxee Duuchchi Woddik Gootti insa'nee Filisixeemik mannixxe anga'n shoole tomme wogga hiremmaashsha sa'isse uwwe.

2 Ookkone baro'n Tsoori'a hiyyemaake qachcha'n Daanixxe gosik Maanuhe hiyyemaak manjichchi hedhemman; isixxi arenna maseentote kademmaxxee isi'a finna ildeemmabaan. 3 Duuchchi Woddike Goottik iimik erganjinna ise'n leelleexxi isee hiyyee qici, «Kunse ati maseentoten finnakanna ildabexxon; yaane kinni siila'witatton, labbakanna ildatton. 4 Yoonna xexe'ati woyinet bookanna kadi wele machchoosaaka ha'wo ha'witoxxe'e; battitte yaanenna ittoxxe'e. 5 Kunse ati siila'witatton; labbaka ildatton; iikki beltinna amatike gadamesinaa'n safeexxi Naazirichcho kadati Magenokee gargar foyemeke kadammaxxee isike umika ordichcho haado tuqqabaan; isinna Isira'eelito Filsixeemike mannixxe anganaa'n anjira safaan.»

6 Ookkoneechchi uduma iitti manjichcho daggeexxi ifike aro'o'n hitee qici: «Mageniink manji mitti anibaa dageen; isinna Mageniinka iimika erganjo fakkataakenna lumooshsha alalshaakemman; habaan dageexxa isoon qorbe'no; isinna ifika summa ane'n kulebaan. 7 Yaane kinni isi anee, ‹Ati kunse siila'witatton; iikki beltinna amatike gadaanesinaa'n safeexxi reyaa qico'n Magenokee foyemeeke naazirichcho kadammaxxee ta'a woyinetixxa booka machchoositaaxxa yaanenna ha'witoxxe'e; battitte yaanenna ittoxxe'e› hiyyeen hite kulde.»

8 Ookkoneechchi uduma Maanuhe, «Ee, dada duuchchike Goottaa! Ookkonee ilemaaka belto hitta assine nosinannoxxa no'oo barachchiiso'a no'obaa ergitettak iikki Mageniinki manji higeenna dagaashsha assittota'a atee kadhantaannen» hiyya'n Duuchchi Woddika Gootta soodate.

9 Magenikinna Maanuhexxa soodachcho laqe; iima erganjinna iitti manjichcho fichchi giddo hexxee'naa ise'n leelle; eettenna yanna kinni aro'i isike Maanuhe sinni welti hedhemmabaan. 10 Isenna ifike aro'o'n kulatee wiinamik marteexxi iso'n, «Iikki edi wodda ane'n leellemak manjichchi techchonna ane'n leelle» hite.

11 Maanuhenna ke'eexxi are ifixxa hordofe; isinna ookkone manjichchinbaa dageexxi «Anxe aren haasootte'ettak atetemma'a?» hiyya'n isoo qore.

Isinna, «Eeti! Anten» hiyye.

12 Maanuhe, «Haasottettek haaso'i muuxemaa yanna ookkone beltixxi hedho hitta akeekkenda? No'ota isi'a maa assa hassissa?» hiyye isoo qore.

13 Duuchchi Woddike Goottik iimik erganji isoo hiyyee qici, «Are atixxi ani ise'ni haaso'ennexxa duuchcha assitowwaal. 14 Isenna woyinetike hiddichchonaa'ni heene yaanenna ittoqqe'e; woyinetixxe bookanna kaddo wele machchossaachcho ha'witoqqe; battooteexxa yaanenna ittoqqe'e ani ise'ni ajajeennexxa duuchcha heqqexxowwaali.»

15 Ookkoneechchi uduma Maanuhe Duuchchi Woddike Goottika iimika erganjo, «Re'eti buruusa dulle ati'aa qophpheesinanno qico'ni heqqi ballo» hiyye. 16 Duuchchi Woddike Goottik iimik erganji Maanuhee'e, «Ati kaba anee'e tursitottolenna midde shiqishaatexxa heene itanna ani itabe'non. Yaane kinn ciincatika tolcha qophpheessitaattole isoo Duuchchi Woddike Gootti'a shiqish» hiyye. Maanuhenna haasessa'nek Duuchchi Woddike Goottik iimika erganjo kadeexxanna ege'neemmabaan.

17 Ookkoneechchi uduma Maanuhenna Duuchchi Woddik Goottika iimika erganjo, «Haasootettek hiyyichchi muuxemaa wodda galata ati'a shiqinshonnaa summi atiki ayyete?» hiyye.

18 Duuchchi Woddik Goottik iimik erganjinna, «Anki summi mambe'iinke kadeemmaxxe'e, mayee'e anee qortaatte?» hiyye.✝

19 Ookkoneechchi uduma Maanuhenna mitte re'eti buruusanna midhatik tolcha aadheexxi kinoti hana Duuchchi Woddike Gootti'a tolche. Maanuhenna are isixxi illeti uundaa'naani Duuchchi Woddik Gootti mambe'iinxa yaane asse. 20 Eettene giirak bubenji tolchimalchoke'ni iimi'a me'aa wodda Duuchchi Woddike Goottik iimik erganji ookkone buben giddo iimi'a me'e. Maanuhenna isixxi are tenne uunde albik buttinake'n wabbi hine. 21 Duuchchi Woddike Goottik iimik erganji Maanuhe'ninna are isixxe'ni langaxxa leella gopheemmaxxe'e; edise insa'ne'a leellemak Duuchchi Woddike Goottiki iimike erganjo kadeexxa Maanuhe ege'ne.

22 Maanuhenna are ifixxa, «Mageno uundennaxxe'e yoona mami belo no'aa reyonden!» hiyye.

23 Are isixxi isi'aa hiisiteexxi hitee qici, «Duuchchi Woddik Gootti no'oo shiya'neele ciincatikanna midhatika tolcha silaa anga no'oxxenaa'ni adhdhammabaan; iittanni tenne yaane duuchcha no'o'ni leelishshanna iitta hexxeexxa yaane iitte wodda no'o'ni kulammabaan.»

24 Iitti manjichcho labbaka belto ilde; summakanna Somisooni hite fulchite. Iikki beltinna nophphe Duuchchi Woddik Goottinna isoo eebise. 25 Duuchchi Woddike Goottiki Hafuurinna Tsoori'anna Eshita'oolixxe oddo'ni hedheeke Daanike olla'i giddo hedhee'naa'a isoo'o jabeessa safe.