1 Abemeleki reyeechchi uduma Duudik belti Foohok belti Tola Isira'eelii'i wodo'a ke'e: isinna Yisakoorike gosati mininaa'nite kadaa wodda hedhaamabi koobatike Efireemike boga'n Saamiri hiyyemaake booncho'n hedhaamman: 2 Kunni manjichchi Isira'eelike sooreessa kade lame tommenna sase wogga tureechchi uduma lummedhe: isinna Saamiri moogeme.

3 Toola'ni itti aane Gele'adichchi Ya'iiri fileme: Isinna lame tommenna lame wogga Isira'eeli'ni mure. 4 Sase tomme Harre gulufaaxxa sase tomme labbaxxi oose afeeman; isixxi labbaxxi oosenna telchi qico'ni Ya'iirixxe baxxe hiyyende ye'endaaxxe sase tomme qacchcha Gele'adike boga'ni anfeeman. 5 Ya'iirinna reye; Qaamooni giddonna moogeme.

6 Isira'eelik ardi higgeen Duuchchi Woddike Gootta'ni fuggoxxa huje hujje; insa'nenna Ba'aalinna Asitaarooti'i iittanni Sooyiyaka, Sidoonaka, Mo'aabika, Amoonitotikanna Filisixeemitotixxa fakkuwwa magenoonfante. Isira'eelik ardi Duuchchi Woddika Gootta waalemaxxenna isi'a ergatema gonpheemmaxxe'e; 7 isinna Isira'eeli'ni mufateexxi Filisixeemikenna Amoonike mannixxe anga'ni sa'isse uwwe. 8 Amoonitonnaa Filisixxeemito Yordaanoosik galaan wido Amoorike boga'ni Gele'adi giddo hedha'neka Isira'eelika arda tommenna saddeeta wogga wixixxi assine galchine. 9 Amoonito Yihudaka, Biiniyaamikanna Efireemika mini mini hado lollo'aa Yordaanoosika galaana foonfe; Isira'eelik ardinna yo'oshsha wixixxi hiyye.

10 Ookkoneechchi uduma Isira'eelik ardi «Ate'e Duuchchi Woddika Gootta no'oka Mageno waale Ba'aali hinaaka dharichcha magenuwwa hordonfenxi no'oo atee'e balleesineenen» hine Duuchchi Woddike Goottibaa oo'ne.

11 Duuchchi Woddik Gootti hiyyee qici, «Gibtsek, Amoorik, Amoonik, Filisixeemik, 12 Sidoonito, Amaaleeqikenna Ma'oonik ardinna insa'bee'e rakinse; ha'noo'o gargaaaronaa'a anibaa'a raartinene; eega ani insa'nexxe anganaa'ni ha'noo'o anjireemabaa? 13 Ha'no kinni anee waaldine wele dharichcha magenuwwa magenoonfatine'en; tennexxee ani ha'no'o langaxxa anjirabo'non. 14 Ha'noonna martine fi'litineeke dharichcha magenuwwa'n oodhdhe; rakko ha'noo'n gelta woddanna isi ha'noo anjirowwaali!»

15 Isira'eelk ardi Duuchchi Woddika Gootta «No'o cubbo hunjeenen eloxxe labbee'e ate'ni leelliteexxa no'o assi; ballo maganne telchinxa calla no'o anjiri.» 16 Oookkoneechchi uduma insa'nexxe oddo'ni hedheeka dharichcha magenuwwa ifinaa'ni fugusine insa'nenna Duuchchi Woddika Gootta magenoonfante. Isinna Isira'eeli lumoxxe rakko giddo hexxee'naa sammi hiyye uuda dande'eebaan.

17 Ookkoonneechchi uduma Amoonik manni lolakee'e qophpheefate'e Gele'adi giddo bukki hiyyeemma wodda; Isira'eelitonna iittanni bukki hiteexxi Mitsipha hiyyemaaba kaanbe gisexxe qeccecce. 18 Gele'adike ardik soorsuwwinna weli'aan weli «Amoonitote'n lola safaaki manji Gelaadi hedha'neeke manna duuchcha'ni sooreessa kadaani.»